॥ ષષ્ઠઃ સર્ગઃ ॥
॥ કુંઠવૈકુંઠઃ ॥
અથ તાં ગંતુમશક્તાં ચિરમનુરક્તાં લતાગૃહે દૃષ્ટ્વા ।
તચ્ચરિતં ગોવિંદે મનસિજમંદે સખી પ્રાહ ॥ 37 ॥
॥ ગીતં 12 ॥
પશ્યતિ દિશિ દિશિ રહસિ ભવંતમ્ ।
તદધરમધુરમધૂનિ પિબંતમ્ ॥
નાથ હરે જગન્નાથ હરે સીદતિ રાધા વાસગૃહે – ધ્રુવમ્ ॥ 1 ॥
ત્વદભિસરણરભસેન વલંતી ।
પતતિ પદાનિ કિયંતિ ચલંતી ॥ 2 ॥
વિહિતવિશદબિસકિસલયવલયા ।
જીવતિ પરમિહ તવ રતિકલયા ॥ 3 ॥
મુહુરવલોકિતમંડનલીલા ।
મધુરિપુરહમિતિ ભાવનશીલા ॥ 4 ॥
ત્વરિતમુપૈતિ ન કથમભિસારમ્ ।
હરિરિતિ વદતિ સખીમનુવારમ્ ॥ 5 ॥
શ્લિષ્યતિ ચુંબતિ જલધરકલ્પમ્ ।
હરિરુપગત ઇતિ તિમિરમનલ્પમ્ ॥ 6 ॥
ભવતિ વિલંબિનિ વિગલિતલજ્જા ।
વિલપતિ રોદિતિ વાસકસજ્જા ॥ 7 ॥
શ્રીજયદેવકવેરિદમુદિતમ્ ।
રસિકજનં તનુતામતિમુદિતમ્ ॥ 8 ॥
વિપુલપુલકપાલિઃ સ્ફીતસીત્કારમંત-ર્જનિતજડિમકાકુવ્યાકુલં વ્યાહરંતી ।
તવ કિતવ વિધત્તેઽમંદકંદર્પચિંતાં રસજલધિનિમગ્ના ધ્યાનલગ્ના મૃગાક્ષી ॥ 38 ॥
અંગેષ્વાભરણં કરોતિ બહુશઃ પત્રેઽપિ સંચારિણિ પ્રાપ્તં ત્વાં પરિશંકતે વિતનુતે શય્યાં ચિરં ધ્યાયતિ ।
ઇત્યાકલ્પવિકલ્પતલ્પરચનાસંકલ્પલીલાશત-વ્યાસક્તાપિ વિના ત્વયા વરતનુર્નૈષા નિશાં નેષ્યતિ ॥ 39 ॥
કિં વિશ્રામ્યસિ કૃષ્ણભોગિભવને ભાંડીરભૂમીરુહિ ભ્રાત ર્યાહિ નદૃષ્ટિગોચરમિતસ્સાનંદનંદાસ્પદમ્।
રધાયાવચનં તદધ્વગમુખાન્નંદાંતિકેગોપતો ગોવિંદસ્યજયંતિ સાયમતિથિપ્રાશસ્ત્યગર્ભાગિરઃ॥ 40 ॥
॥ ઇતિ ગીતગોવિંદે વાસકસજ્જાવર્ણને કુંઠવૈકુંઠો નામ ષષ્ઠઃ સર્ગઃ ॥