॥ ಷಷ್ಠಃ ಸರ್ಗಃ ॥
॥ ಕುಂಠವೈಕುಂಠಃ ॥
ಅಥ ತಾಂ ಗಂತುಮಶಕ್ತಾಂ ಚಿರಮನುರಕ್ತಾಂ ಲತಾಗೃಹೇ ದೃಷ್ಟ್ವಾ ।
ತಚ್ಚರಿತಂ ಗೋವಿಂದೇ ಮನಸಿಜಮಂದೇ ಸಖೀ ಪ್ರಾಹ ॥ 37 ॥
॥ ಗೀತಂ 12 ॥
ಪಶ್ಯತಿ ದಿಶಿ ದಿಶಿ ರಹಸಿ ಭವಂತಮ್ ।
ತದಧರಮಧುರಮಧೂನಿ ಪಿಬಂತಮ್ ॥
ನಾಥ ಹರೇ ಜಗನ್ನಾಥ ಹರೇ ಸೀದತಿ ರಾಧಾ ವಾಸಗೃಹೇ – ಧ್ರುವಮ್ ॥ 1 ॥
ತ್ವದಭಿಸರಣರಭಸೇನ ವಲಂತೀ ।
ಪತತಿ ಪದಾನಿ ಕಿಯಂತಿ ಚಲಂತೀ ॥ 2 ॥
ವಿಹಿತವಿಶದಬಿಸಕಿಸಲಯವಲಯಾ ।
ಜೀವತಿ ಪರಮಿಹ ತವ ರತಿಕಲಯಾ ॥ 3 ॥
ಮುಹುರವಲೋಕಿತಮಂಡನಲೀಲಾ ।
ಮಧುರಿಪುರಹಮಿತಿ ಭಾವನಶೀಲಾ ॥ 4 ॥
ತ್ವರಿತಮುಪೈತಿ ನ ಕಥಮಭಿಸಾರಮ್ ।
ಹರಿರಿತಿ ವದತಿ ಸಖೀಮನುವಾರಮ್ ॥ 5 ॥
ಶ್ಲಿಷ್ಯತಿ ಚುಂಬತಿ ಜಲಧರಕಲ್ಪಮ್ ।
ಹರಿರುಪಗತ ಇತಿ ತಿಮಿರಮನಲ್ಪಮ್ ॥ 6 ॥
ಭವತಿ ವಿಲಂಬಿನಿ ವಿಗಲಿತಲಜ್ಜಾ ।
ವಿಲಪತಿ ರೋದಿತಿ ವಾಸಕಸಜ್ಜಾ ॥ 7 ॥
ಶ್ರೀಜಯದೇವಕವೇರಿದಮುದಿತಮ್ ।
ರಸಿಕಜನಂ ತನುತಾಮತಿಮುದಿತಮ್ ॥ 8 ॥
ವಿಪುಲಪುಲಕಪಾಲಿಃ ಸ್ಫೀತಸೀತ್ಕಾರಮಂತ-ರ್ಜನಿತಜಡಿಮಕಾಕುವ್ಯಾಕುಲಂ ವ್ಯಾಹರಂತೀ ।
ತವ ಕಿತವ ವಿಧತ್ತೇಽಮಂದಕಂದರ್ಪಚಿಂತಾಂ ರಸಜಲಧಿನಿಮಗ್ನಾ ಧ್ಯಾನಲಗ್ನಾ ಮೃಗಾಕ್ಷೀ ॥ 38 ॥
ಅಂಗೇಷ್ವಾಭರಣಂ ಕರೋತಿ ಬಹುಶಃ ಪತ್ರೇಽಪಿ ಸಂಚಾರಿಣಿ ಪ್ರಾಪ್ತಂ ತ್ವಾಂ ಪರಿಶಂಕತೇ ವಿತನುತೇ ಶಯ್ಯಾಂ ಚಿರಂ ಧ್ಯಾಯತಿ ।
ಇತ್ಯಾಕಲ್ಪವಿಕಲ್ಪತಲ್ಪರಚನಾಸಂಕಲ್ಪಲೀಲಾಶತ-ವ್ಯಾಸಕ್ತಾಪಿ ವಿನಾ ತ್ವಯಾ ವರತನುರ್ನೈಷಾ ನಿಶಾಂ ನೇಷ್ಯತಿ ॥ 39 ॥
ಕಿಂ ವಿಶ್ರಾಮ್ಯಸಿ ಕೃಷ್ಣಭೋಗಿಭವನೇ ಭಾಂಡೀರಭೂಮೀರುಹಿ ಭ್ರಾತ ರ್ಯಾಹಿ ನದೃಷ್ಟಿಗೋಚರಮಿತಸ್ಸಾನಂದನಂದಾಸ್ಪದಂ।
ರಧಾಯಾವಚನಂ ತದಧ್ವಗಮುಖಾನ್ನಂದಾಂತಿಕೇಗೋಪತೋ ಗೋವಿಂದಸ್ಯಜಯಂತಿ ಸಾಯಮತಿಥಿಪ್ರಾಶಸ್ತ್ಯಗರ್ಭಾಗಿರಃ॥ 40 ॥
॥ ಇತಿ ಗೀತಗೋವಿಂದೇ ವಾಸಕಸಜ್ಜಾವರ್ಣನೇ ಕುಂಠವೈಕುಂಠೋ ನಾಮ ಷಷ್ಠಃ ಸರ್ಗಃ ॥