സത്യം ജ്ഞാനമനംതം നിത്യമനാകാശം പരമാകാശമ് ।
ഗോഷ്ഠപ്രാംഗണരിംഖണലോലമനായാസം പരമായാസമ് ।
മായാകല്പിതനാനാകാരമനാകാരം ഭുവനാകാരമ് ।
ക്ഷ്മാമാനാഥമനാഥം പ്രണമത ഗോവിംദം പരമാനംദമ് ॥ 1 ॥
മൃത്സ്നാമത്സീഹേതി യശോദാതാഡനശൈശവ സംത്രാസമ് ।
വ്യാദിതവക്ത്രാലോകിതലോകാലോകചതുര്ദശലോകാലിമ് ।
ലോകത്രയപുരമൂലസ്തംഭം ലോകാലോകമനാലോകമ് ।
ലോകേശം പരമേശം പ്രണമത ഗോവിംദം പരമാനംദമ് ॥ 2 ॥
ത്രൈവിഷ്ടപരിപുവീരഘ്നം ക്ഷിതിഭാരഘ്നം ഭവരോഗഘ്നമ് ।
കൈവല്യം നവനീതാഹാരമനാഹാരം ഭുവനാഹാരമ് ।
വൈമല്യസ്ഫുടചേതോവൃത്തിവിശേഷാഭാസമനാഭാസമ് ।
ശൈവം കേവലശാംതം പ്രണമത ഗോവിംദം പരമാനംദമ് ॥ 3 ॥
ഗോപാലം പ്രഭുലീലാവിഗ്രഹഗോപാലം കുലഗോപാലമ് ।
ഗോപീഖേലനഗോവര്ധനധൃതിലീലാലാലിതഗോപാലമ് ।
ഗോഭിര്നിഗദിത ഗോവിംദസ്ഫുടനാമാനം ബഹുനാമാനമ് ।
ഗോപീഗോചരദൂരം പ്രണമത ഗോവിംദം പരമാനംദമ് ॥ 4 ॥
ഗോപീമംഡലഗോഷ്ഠീഭേദം ഭേദാവസ്ഥമഭേദാഭമ് ।
ശശ്വദ്ഗോഖുരനിര്ധൂതോദ്ഗത ധൂളീധൂസരസൌഭാഗ്യമ് ।
ശ്രദ്ധാഭക്തിഗൃഹീതാനംദമചിംത്യം ചിംതിതസദ്ഭാവമ് ।
ചിംതാമണിമഹിമാനം പ്രണമത ഗോവിംദം പരമാനംദമ് ॥ 5 ॥
സ്നാനവ്യാകുലയോഷിദ്വസ്ത്രമുപാദായാഗമുപാരൂഢമ് ।
വ്യാദിത്സംതീരഥ ദിഗ്വസ്ത്രാ ദാതുമുപാകര്ഷംതം താഃ
നിര്ധൂതദ്വയശോകവിമോഹം ബുദ്ധം ബുദ്ധേരംതസ്ഥമ് ।
സത്താമാത്രശരീരം പ്രണമത ഗോവിംദം പരമാനംദമ് ॥ 6 ॥
കാംതം കാരണകാരണമാദിമനാദിം കാലധനാഭാസമ് ।
കാളിംദീഗതകാലിയശിരസി സുനൃത്യംതം മുഹുരത്യംതമ് ।
കാലം കാലകലാതീതം കലിതാശേഷം കലിദോഷഘ്നമ് ।
കാലത്രയഗതിഹേതും പ്രണമത ഗോവിംദം പരമാനംദമ് ॥ 7 ॥
ബൃംദാവനഭുവി ബൃംദാരകഗണബൃംദാരാധിതവംദേഹമ് ।
കുംദാഭാമലമംദസ്മേരസുധാനംദം സുഹൃദാനംദമ് ।
വംദ്യാശേഷ മഹാമുനി മാനസ വംദ്യാനംദപദദ്വംദ്വമ് ।
വംദ്യാശേഷഗുണാബ്ധിം പ്രണമത ഗോവിംദം പരമാനംദമ് ॥ 8 ॥
ഗോവിംദാഷ്ടകമേതദധീതേ ഗോവിംദാര്പിതചേതാ യഃ ।
ഗോവിംദാച്യുത മാധവ വിഷ്ണോ ഗോകുലനായക കൃഷ്ണേതി ।
ഗോവിംദാംഘ്രി സരോജധ്യാനസുധാജലധൌതസമസ്താഘഃ ।
ഗോവിംദം പരമാനംദാമൃതമംതസ്ഥം സ തമഭ്യേതി ॥
ഇതി ശ്രീ ശംകരാചാര്യ വിരചിത ശ്രീഗോവിംദാഷ്ടകം സമാപ്തം