𑌅𑌷𑍍𑌟𑌾𑌵𑌕𑍍𑌰 𑌉𑌵𑌾𑌚 ॥
𑌅𑌵𑌿𑌨𑌾𑌶𑌿𑌨𑌮𑌾𑌤𑍍𑌮𑌾𑌨𑌮𑍇𑌕𑌂 𑌵𑌿𑌜𑍍𑌞𑌾𑌯 𑌤𑌤𑍍𑌤𑍍𑌵𑌤𑌃 ।
𑌤𑌵𑌾𑌤𑍍𑌮𑌜𑍍𑌞𑌾𑌨𑌸𑍍𑌯 𑌧𑍀𑌰𑌸𑍍𑌯 𑌕𑌥𑌮𑌰𑍍𑌥𑌾𑌰𑍍𑌜𑌨𑍇 𑌰𑌤𑌿𑌃 ॥ 3-1॥
𑌆𑌤𑍍𑌮𑌾𑌜𑍍𑌞𑌾𑌨𑌾𑌦𑌹𑍋 𑌪𑍍𑌰𑍀𑌤𑌿𑌰𑍍𑌵𑌿𑌷𑌯𑌭𑍍𑌰𑌮𑌗𑍋𑌚𑌰𑍇 ।
𑌶𑍁𑌕𑍍𑌤𑍇𑌰𑌜𑍍𑌞𑌾𑌨𑌤𑍋 𑌲𑍋𑌭𑍋 𑌯𑌥𑌾 𑌰𑌜𑌤𑌵𑌿𑌭𑍍𑌰𑌮𑍇 ॥ 3-2॥
𑌵𑌿𑌶𑍍𑌵𑌂 𑌸𑍍𑌫𑍁𑌰𑌤𑌿 𑌯𑌤𑍍𑌰𑍇𑌦𑌂 𑌤𑌰𑌂𑌗𑌾 𑌇𑌵 𑌸𑌾𑌗𑌰𑍇 ।
𑌸𑍋𑌽𑌹𑌮𑌸𑍍𑌮𑍀𑌤𑌿 𑌵𑌿𑌜𑍍𑌞𑌾𑌯 𑌕𑌿𑌂 𑌦𑍀𑌨 𑌇𑌵 𑌧𑌾𑌵𑌸𑌿 ॥ 3-3॥
𑌶𑍍𑌰𑍁𑌤𑍍𑌵𑌾𑌪𑌿 𑌶𑍁𑌦𑍍𑌧𑌚𑍈𑌤𑌨𑍍𑌯 𑌆𑌤𑍍𑌮𑌾𑌨𑌮𑌤𑌿𑌸𑍁𑌂𑌦𑌰𑌮𑍍 ।
𑌉𑌪𑌸𑍍𑌥𑍇𑌽𑌤𑍍𑌯𑌂𑌤𑌸𑌂𑌸𑌕𑍍𑌤𑍋 𑌮𑌾𑌲𑌿𑌨𑍍𑌯𑌮𑌧𑌿𑌗𑌚𑍍𑌛𑌤𑌿 ॥ 3-4॥
𑌸𑌰𑍍𑌵𑌭𑍂𑌤𑍇𑌷𑍁 𑌚𑌾𑌤𑍍𑌮𑌾𑌨𑌂 𑌸𑌰𑍍𑌵𑌭𑍂𑌤𑌾𑌨𑌿 𑌚𑌾𑌤𑍍𑌮𑌨𑌿 ।
𑌮𑍁𑌨𑍇𑌰𑍍𑌜𑌾𑌨𑌤 𑌆𑌶𑍍𑌚𑌰𑍍𑌯𑌂 𑌮𑌮𑌤𑍍𑌵𑌮𑌨𑍁𑌵𑌰𑍍𑌤𑌤𑍇 ॥ 3-5॥
𑌆𑌸𑍍𑌥𑌿𑌤𑌃 𑌪𑌰𑌮𑌾𑌦𑍍𑌵𑍈𑌤𑌂 𑌮𑍋𑌕𑍍𑌷𑌾𑌰𑍍𑌥𑍇𑌽𑌪𑌿 𑌵𑍍𑌯𑌵𑌸𑍍𑌥𑌿𑌤𑌃 ।
𑌆𑌶𑍍𑌚𑌰𑍍𑌯𑌂 𑌕𑌾𑌮𑌵𑌶𑌗𑍋 𑌵𑌿𑌕𑌲𑌃 𑌕𑍇𑌲𑌿𑌶𑌿𑌕𑍍𑌷𑌯𑌾 ॥ 3-6॥
𑌉𑌦𑍍𑌭𑍂𑌤𑌂 𑌜𑍍𑌞𑌾𑌨𑌦𑍁𑌰𑍍𑌮𑌿𑌤𑍍𑌰𑌮𑌵𑌧𑌾𑌰𑍍𑌯𑌾𑌤𑌿𑌦𑍁𑌰𑍍𑌬𑌲𑌃 ।
𑌆𑌶𑍍𑌚𑌰𑍍𑌯𑌂 𑌕𑌾𑌮𑌮𑌾𑌕𑌾𑌂𑌕𑍍𑌷𑍇𑌤𑍍 𑌕𑌾𑌲𑌮𑌂𑌤𑌮𑌨𑍁𑌶𑍍𑌰𑌿𑌤𑌃 ॥ 3-॥
𑌇𑌹𑌾𑌮𑍁𑌤𑍍𑌰 𑌵𑌿𑌰𑌕𑍍𑌤𑌸𑍍𑌯 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌿𑌵𑍇𑌕𑌿𑌨𑌃 ।
𑌆𑌶𑍍𑌚𑌰𑍍𑌯𑌂 𑌮𑍋𑌕𑍍𑌷𑌕𑌾𑌮𑌸𑍍𑌯 𑌮𑍋𑌕𑍍𑌷𑌾𑌦𑍍 𑌏𑌵 𑌵𑌿𑌭𑍀𑌷𑌿𑌕𑌾 ॥ 3-॥
𑌧𑍀𑌰𑌸𑍍𑌤𑍁 𑌭𑍋𑌜𑍍𑌯𑌮𑌾𑌨𑍋𑌽𑌪𑌿 𑌪𑍀𑌡𑍍𑌯𑌮𑌾𑌨𑍋𑌽𑌪𑌿 𑌸𑌰𑍍𑌵𑌦𑌾 ।
𑌆𑌤𑍍𑌮𑌾𑌨𑌂 𑌕𑍇𑌵𑌲𑌂 𑌪𑌶𑍍𑌯𑌨𑍍 𑌨 𑌤𑍁𑌷𑍍𑌯𑌤𑌿 𑌨 𑌕𑍁𑌪𑍍𑌯𑌤𑌿 ॥ 3-॥
𑌚𑍇𑌷𑍍𑌟𑌮𑌾𑌨𑌂 𑌶𑌰𑍀𑌰𑌂 𑌸𑍍𑌵𑌂 𑌪𑌶𑍍𑌯𑌤𑍍𑌯𑌨𑍍𑌯𑌶𑌰𑍀𑌰𑌵𑌤𑍍 ।
𑌸𑌂𑌸𑍍𑌤𑌵𑍇 𑌚𑌾𑌪𑌿 𑌨𑌿𑌂𑌦𑌾𑌯𑌾𑌂 𑌕𑌥𑌂 𑌕𑍍𑌷𑍁𑌭𑍍𑌯𑍇𑌤𑍍 𑌮𑌹𑌾𑌶𑌯𑌃 ॥ 3-10॥
𑌮𑌾𑌯𑌾𑌮𑌾𑌤𑍍𑌰𑌮𑌿𑌦𑌂 𑌵𑌿𑌶𑍍𑌵𑌂 𑌪𑌶𑍍𑌯𑌨𑍍 𑌵𑌿𑌗𑌤𑌕𑍌𑌤𑍁𑌕𑌃 ।
𑌅𑌪𑌿 𑌸𑌨𑍍𑌨𑌿𑌹𑌿𑌤𑍇 𑌮𑍃𑌤𑍍𑌯𑍌 𑌕𑌥𑌂 𑌤𑍍𑌰𑌸𑍍𑌯𑌤𑌿 𑌧𑍀𑌰𑌧𑍀𑌃 ॥ 3-11॥
𑌨𑌿𑌃𑌸𑍍𑌪𑍃𑌹𑌂 𑌮𑌾𑌨𑌸𑌂 𑌯𑌸𑍍𑌯 𑌨𑍈𑌰𑌾𑌶𑍍𑌯𑍇𑌽𑌪𑌿 𑌮𑌹𑌾𑌤𑍍𑌮𑌨𑌃 ।
𑌤𑌸𑍍𑌯𑌾𑌤𑍍𑌮𑌜𑍍𑌞𑌾𑌨𑌤𑍃𑌪𑍍𑌤𑌸𑍍𑌯 𑌤𑍁𑌲𑌨𑌾 𑌕𑍇𑌨 𑌜𑌾𑌯𑌤𑍇 ॥ 3-12॥
𑌸𑍍𑌵𑌭𑌾𑌵𑌾𑌦𑍍 𑌏𑌵 𑌜𑌾𑌨𑌾𑌨𑍋 𑌦𑍃𑌶𑍍𑌯𑌮𑍇𑌤𑌨𑍍𑌨 𑌕𑌿𑌂𑌚𑌨 ।
𑌇𑌦𑌂 𑌗𑍍𑌰𑌾𑌹𑍍𑌯𑌮𑌿𑌦𑌂 𑌤𑍍𑌯𑌾𑌜𑍍𑌯𑌂 𑌸 𑌕𑌿𑌂 𑌪𑌶𑍍𑌯𑌤𑌿 𑌧𑍀𑌰𑌧𑍀𑌃 ॥ 3-13॥
𑌅𑌂𑌤𑌸𑍍𑌤𑍍𑌯𑌕𑍍𑌤𑌕𑌷𑌾𑌯𑌸𑍍𑌯 𑌨𑌿𑌰𑍍𑌦𑍍𑌵𑌂𑌦𑍍𑌵𑌸𑍍𑌯 𑌨𑌿𑌰𑌾𑌶𑌿𑌷𑌃 ।
𑌯𑌦𑍃𑌚𑍍𑌛𑌯𑌾𑌗𑌤𑍋 𑌭𑍋𑌗𑍋 𑌨 𑌦𑍁𑌃𑌖𑌾𑌯 𑌨 𑌤𑍁𑌷𑍍𑌟𑌯𑍇 ॥ 3-14॥
