𑌅𑌷𑍍𑌟𑌾𑌵𑌕𑍍𑌰 𑌉𑌵𑌾𑌚 ॥
𑌤𑍇𑌨 𑌜𑍍𑌞𑌾𑌨𑌫𑌲𑌂 𑌪𑍍𑌰𑌾𑌪𑍍𑌤𑌂 𑌯𑍋𑌗𑌾𑌭𑍍𑌯𑌾𑌸𑌫𑌲𑌂 𑌤𑌥𑌾 ।
𑌤𑍃𑌪𑍍𑌤𑌃 𑌸𑍍𑌵𑌚𑍍𑌛𑍇𑌂𑌦𑍍𑌰𑌿𑌯𑍋 𑌨𑌿𑌤𑍍𑌯𑌮𑍇𑌕𑌾𑌕𑍀 𑌰𑌮𑌤𑍇 𑌤𑍁 𑌯𑌃 ॥ 1-1॥
𑌨 𑌕𑌦𑌾𑌚𑌿𑌜𑍍𑌜𑌗𑌤𑍍𑌯𑌸𑍍𑌮𑌿𑌨𑍍 𑌤𑌤𑍍𑌤𑍍𑌵𑌜𑍍𑌞𑍋 𑌹𑌂𑌤 𑌖𑌿𑌦𑍍𑌯𑌤𑌿 ।
𑌯𑌤 𑌏𑌕𑍇𑌨 𑌤𑍇𑌨𑍇𑌦𑌂 𑌪𑍂𑌰𑍍𑌣𑌂 𑌬𑍍𑌰𑌹𑍍𑌮𑌾𑌂𑌡𑌮𑌂𑌡𑌲𑌮𑍍 ॥ 1-2॥
𑌨 𑌜𑌾𑌤𑍁 𑌵𑌿𑌷𑌯𑌾𑌃 𑌕𑍇𑌽𑌪𑌿 𑌸𑍍𑌵𑌾𑌰𑌾𑌮𑌂 𑌹𑌰𑍍𑌷𑌯𑌂𑌤𑍍𑌯𑌮𑍀 ।
𑌸𑌲𑍍𑌲𑌕𑍀𑌪𑌲𑍍𑌲𑌵𑌪𑍍𑌰𑍀𑌤𑌮𑌿𑌵𑍇𑌭𑌂 𑌨𑌿𑌂𑌬𑌪𑌲𑍍𑌲𑌵𑌾𑌃 ॥ 1-3॥
𑌯𑌸𑍍𑌤𑍁 𑌭𑍋𑌗𑍇𑌷𑍁 𑌭𑍁𑌕𑍍𑌤𑍇𑌷𑍁 𑌨 𑌭𑌵𑌤𑍍𑌯𑌧𑌿𑌵𑌾𑌸𑌿𑌤𑌃 ।
𑌅𑌭𑍁𑌕𑍍𑌤𑍇𑌷𑍁 𑌨𑌿𑌰𑌾𑌕𑌾𑌂𑌕𑍍𑌷𑍀 𑌤𑌾𑌦𑍃𑌶𑍋 𑌭𑌵𑌦𑍁𑌰𑍍𑌲𑌭𑌃 ॥ 1-4॥
𑌬𑍁𑌭𑍁𑌕𑍍𑌷𑍁𑌰𑌿𑌹 𑌸𑌂𑌸𑌾𑌰𑍇 𑌮𑍁𑌮𑍁𑌕𑍍𑌷𑍁𑌰𑌪𑌿 𑌦𑍃𑌶𑍍𑌯𑌤𑍇 ।
𑌭𑍋𑌗𑌮𑍋𑌕𑍍𑌷𑌨𑌿𑌰𑌾𑌕𑌾𑌂𑌕𑍍𑌷𑍀 𑌵𑌿𑌰𑌲𑍋 𑌹𑌿 𑌮𑌹𑌾𑌶𑌯𑌃 ॥ 1-5॥
𑌧𑌰𑍍𑌮𑌾𑌰𑍍𑌥𑌕𑌾𑌮𑌮𑍋𑌕𑍍𑌷𑍇𑌷𑍁 𑌜𑍀𑌵𑌿𑌤𑍇 𑌮𑌰𑌣𑍇 𑌤𑌥𑌾 ।
𑌕𑌸𑍍𑌯𑌾𑌪𑍍𑌯𑍁𑌦𑌾𑌰𑌚𑌿𑌤𑍍𑌤𑌸𑍍𑌯 𑌹𑍇𑌯𑍋𑌪𑌾𑌦𑍇𑌯𑌤𑌾 𑌨 𑌹𑌿 ॥ 1-6॥
𑌵𑌾𑌂𑌛𑌾 𑌨 𑌵𑌿𑌶𑍍𑌵𑌵𑌿𑌲𑌯𑍇 𑌨 𑌦𑍍𑌵𑍇𑌷𑌸𑍍𑌤𑌸𑍍𑌯 𑌚 𑌸𑍍𑌥𑌿𑌤𑍌 ।
𑌯𑌥𑌾 𑌜𑍀𑌵𑌿𑌕𑌯𑌾 𑌤𑌸𑍍𑌮𑌾𑌦𑍍 𑌧𑌨𑍍𑌯 𑌆𑌸𑍍𑌤𑍇 𑌯𑌥𑌾 𑌸𑍁𑌖𑌮𑍍 ॥ 1-॥
𑌕𑍃𑌤𑌾𑌰𑍍𑌥𑍋𑌽𑌨𑍇𑌨 𑌜𑍍𑌞𑌾𑌨𑍇𑌨𑍇𑌤𑍍𑌯𑍇𑌵𑌂 𑌗𑌲𑌿𑌤𑌧𑍀𑌃 𑌕𑍃𑌤𑍀 ।
𑌪𑌶𑍍𑌯𑌨𑍍 𑌶𑌋𑌣𑍍𑌵𑌨𑍍 𑌸𑍍𑌪𑍃𑌶𑌨𑍍 𑌜𑌿𑌘𑍍𑌰𑌨𑍍𑌨𑍍
𑌅𑌶𑍍𑌨𑌨𑍍𑌨𑌾𑌸𑍍𑌤𑍇 𑌯𑌥𑌾 𑌸𑍁𑌖𑌮𑍍 ॥ 1-॥
𑌶𑍂𑌨𑍍𑌯𑌾 𑌦𑍃𑌷𑍍𑌟𑌿𑌰𑍍𑌵𑍃𑌥𑌾 𑌚𑍇𑌷𑍍𑌟𑌾 𑌵𑌿𑌕𑌲𑌾𑌨𑍀𑌂𑌦𑍍𑌰𑌿𑌯𑌾𑌣𑌿 𑌚 ।
𑌨 𑌸𑍍𑌪𑍃𑌹𑌾 𑌨 𑌵𑌿𑌰𑌕𑍍𑌤𑌿𑌰𑍍𑌵𑌾 𑌕𑍍𑌷𑍀𑌣𑌸𑌂𑌸𑌾𑌰𑌸𑌾𑌗𑌰𑍇 ॥ 1-॥
𑌨 𑌜𑌾𑌗𑌰𑍍𑌤𑌿 𑌨 𑌨𑌿𑌦𑍍𑌰𑌾𑌤𑌿 𑌨𑍋𑌨𑍍𑌮𑍀𑌲𑌤𑌿 𑌨 𑌮𑍀𑌲𑌤𑌿 ।
𑌅𑌹𑍋 𑌪𑌰𑌦𑌶𑌾 𑌕𑍍𑌵𑌾𑌪𑌿 𑌵𑌰𑍍𑌤𑌤𑍇 𑌮𑍁𑌕𑍍𑌤𑌚𑍇𑌤𑌸𑌃 ॥ 1-10॥
𑌸𑌰𑍍𑌵𑌤𑍍𑌰 𑌦𑍃𑌶𑍍𑌯𑌤𑍇 𑌸𑍍𑌵𑌸𑍍𑌥𑌃 𑌸𑌰𑍍𑌵𑌤𑍍𑌰 𑌵𑌿𑌮𑌲𑌾𑌶𑌯𑌃 ।
𑌸𑌮𑌸𑍍𑌤𑌵𑌾𑌸𑌨𑌾 𑌮𑍁𑌕𑍍𑌤𑍋 𑌮𑍁𑌕𑍍𑌤𑌃 𑌸𑌰𑍍𑌵𑌤𑍍𑌰 𑌰𑌾𑌜𑌤𑍇 ॥ 1-11॥
𑌪𑌶𑍍𑌯𑌨𑍍 𑌶𑌋𑌣𑍍𑌵𑌨𑍍 𑌸𑍍𑌪𑍃𑌶𑌨𑍍 𑌜𑌿𑌘𑍍𑌰𑌨𑍍𑌨𑍍 𑌅𑌶𑍍𑌨𑌨𑍍
𑌗𑍃𑌹𑍍𑌣𑌨𑍍 𑌵𑌦𑌨𑍍 𑌵𑍍𑌰𑌜𑌨𑍍 ।
𑌈𑌹𑌿𑌤𑌾𑌨𑍀𑌹𑌿𑌤𑍈𑌰𑍍𑌮𑍁𑌕𑍍𑌤𑍋 𑌮𑍁𑌕𑍍𑌤 𑌏𑌵 𑌮𑌹𑌾𑌶𑌯𑌃 ॥ 1-12॥
𑌨 𑌨𑌿𑌂𑌦𑌤𑌿 𑌨 𑌚 𑌸𑍍𑌤𑍌𑌤𑌿 𑌨 𑌹𑍃𑌷𑍍𑌯𑌤𑌿 𑌨 𑌕𑍁𑌪𑍍𑌯𑌤𑌿 ।
𑌨 𑌦𑌦𑌾𑌤𑌿 𑌨 𑌗𑍃𑌹𑍍𑌣𑌾𑌤𑌿 𑌮𑍁𑌕𑍍𑌤𑌃 𑌸𑌰𑍍𑌵𑌤𑍍𑌰 𑌨𑍀𑌰𑌸𑌃 ॥ 1-13॥
𑌸𑌾𑌨𑍁𑌰𑌾𑌗𑌾𑌂 𑌸𑍍𑌤𑍍𑌰𑌿𑌯𑌂 𑌦𑍃𑌷𑍍𑌟𑍍𑌵𑌾 𑌮𑍃𑌤𑍍𑌯𑍁𑌂 𑌵𑌾 𑌸𑌮𑍁𑌪𑌸𑍍𑌥𑌿𑌤𑌮𑍍 ।
𑌅𑌵𑌿𑌹𑍍𑌵𑌲𑌮𑌨𑌾𑌃 𑌸𑍍𑌵𑌸𑍍𑌥𑍋 𑌮𑍁𑌕𑍍𑌤 𑌏𑌵 𑌮𑌹𑌾𑌶𑌯𑌃 ॥ 1-14॥
𑌸𑍁𑌖𑍇 𑌦𑍁𑌃𑌖𑍇 𑌨𑌰𑍇 𑌨𑌾𑌰𑍍𑌯𑌾𑌂 𑌸𑌂𑌪𑌤𑍍𑌸𑍁 𑌚 𑌵𑌿𑌪𑌤𑍍𑌸𑍁 𑌚 ।
𑌵𑌿𑌶𑍇𑌷𑍋 𑌨𑍈𑌵 𑌧𑍀𑌰𑌸𑍍𑌯 𑌸𑌰𑍍𑌵𑌤𑍍𑌰 𑌸𑌮𑌦𑌰𑍍𑌶𑌿𑌨𑌃 ॥ 1-15॥
𑌨 𑌹𑌿𑌂𑌸𑌾 𑌨𑍈𑌵 𑌕𑌾𑌰𑍁𑌣𑍍𑌯𑌂 𑌨𑍌𑌦𑍍𑌧𑌤𑍍𑌯𑌂 𑌨 𑌚 𑌦𑍀𑌨𑌤𑌾 ।
𑌨𑌾𑌶𑍍𑌚𑌰𑍍𑌯𑌂 𑌨𑍈𑌵 𑌚 𑌕𑍍𑌷𑍋𑌭𑌃 𑌕𑍍𑌷𑍀𑌣𑌸𑌂𑌸𑌰𑌣𑍇 𑌨𑌰𑍇 ॥ 1-16॥
𑌨 𑌮𑍁𑌕𑍍𑌤𑍋 𑌵𑌿𑌷𑌯𑌦𑍍𑌵𑍇𑌷𑍍𑌟𑌾 𑌨 𑌵𑌾 𑌵𑌿𑌷𑌯𑌲𑍋𑌲𑍁𑌪𑌃 ।
𑌅𑌸𑌂𑌸𑌕𑍍𑌤𑌮𑌨𑌾 𑌨𑌿𑌤𑍍𑌯𑌂 𑌪𑍍𑌰𑌾𑌪𑍍𑌤𑌾𑌪𑍍𑌰𑌾𑌪𑍍𑌤𑌮𑍁𑌪𑌾𑌶𑍍𑌨𑍁𑌤𑍇 ॥ 1-1॥
𑌸𑌮𑌾𑌧𑌾𑌨𑌾𑌸𑌮𑌾𑌧𑌾𑌨𑌹𑌿𑌤𑌾𑌹𑌿𑌤𑌵𑌿𑌕𑌲𑍍𑌪𑌨𑌾𑌃 ।
𑌶𑍂𑌨𑍍𑌯𑌚𑌿𑌤𑍍𑌤𑍋 𑌨 𑌜𑌾𑌨𑌾𑌤𑌿 𑌕𑍈𑌵𑌲𑍍𑌯𑌮𑌿𑌵 𑌸𑌂𑌸𑍍𑌥𑌿𑌤𑌃 ॥ 1-1॥
𑌨𑌿𑌰𑍍𑌮𑌮𑍋 𑌨𑌿𑌰𑌹𑌂𑌕𑌾𑌰𑍋 𑌨 𑌕𑌿𑌂𑌚𑌿𑌦𑌿𑌤𑌿 𑌨𑌿𑌶𑍍𑌚𑌿𑌤𑌃 ।
𑌅𑌂𑌤𑌰𑍍𑌗𑌲𑌿𑌤𑌸𑌰𑍍𑌵𑌾𑌶𑌃 𑌕𑍁𑌰𑍍𑌵𑌨𑍍𑌨𑌪𑌿 𑌕𑌰𑍋𑌤𑌿 𑌨 ॥ 1-1॥
𑌮𑌨𑌃𑌪𑍍𑌰𑌕𑌾𑌶𑌸𑌂𑌮𑍋𑌹𑌸𑍍𑌵𑌪𑍍𑌨𑌜𑌾𑌡𑍍𑌯𑌵𑌿𑌵𑌰𑍍𑌜𑌿𑌤𑌃 ।
𑌦𑌶𑌾𑌂 𑌕𑌾𑌮𑌪𑌿 𑌸𑌂𑌪𑍍𑌰𑌾𑌪𑍍𑌤𑍋 𑌭𑌵𑍇𑌦𑍍 𑌗𑌲𑌿𑌤𑌮𑌾𑌨𑌸𑌃 ॥ 1-20॥
