॥ 𑌅𑌥 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿 𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥
𑌵𑍈𑌶𑌂𑌪𑌾𑌯𑌨 𑌉𑌵𑌾𑌚 ।
𑌦𑍍𑌵𑌾𑌃𑌸𑍍𑌥𑌂 𑌪𑍍𑌰𑌾𑌹 𑌮𑌹𑌾𑌪𑍍𑌰𑌾𑌜𑍍𑌞𑍋 𑌧𑍃𑌤𑌰𑌾𑌷𑍍𑌟𑍍𑌰𑍋 𑌮𑌹𑍀𑌪𑌤𑌿𑌃 ।
𑌵𑌿𑌦𑍁𑌰𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌤𑌮𑌿𑌹𑌾𑌨𑌯 𑌮𑌾𑌚𑌿𑌰𑌮𑍍 ॥ 1॥
𑌪𑍍𑌰𑌹𑌿𑌤𑍋 𑌧𑍃𑌤𑌰𑌾𑌷𑍍𑌟𑍍𑌰𑍇𑌣 𑌦𑍂𑌤𑌃 𑌕𑍍𑌷𑌤𑍍𑌤𑌾𑌰𑌮𑌬𑍍𑌰𑌵𑍀𑌤𑍍 ।
𑌈𑌶𑍍𑌵𑌰𑌸𑍍𑌤𑍍𑌵𑌾𑌂 𑌮𑌹𑌾𑌰𑌾𑌜𑍋 𑌮𑌹𑌾𑌪𑍍𑌰𑌾𑌜𑍍𑌞 𑌦𑌿𑌦𑍃𑌕𑍍𑌷𑌤𑌿 ॥ 2॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌵𑌿𑌦𑍁𑌰𑌃 𑌪𑍍𑌰𑌾𑌪𑍍𑌯 𑌰𑌾𑌜𑌨𑌿𑌵𑍇𑌶𑌨𑌮𑍍 ।
𑌅𑌬𑍍𑌰𑌵𑍀𑌦𑍍𑌧𑍃𑌤𑌰𑌾𑌷𑍍𑌟𑍍𑌰𑌾𑌯 𑌦𑍍𑌵𑌾𑌃𑌸𑍍𑌥 𑌮𑌾𑌂 𑌪𑍍𑌰𑌤𑌿𑌵𑍇𑌦𑌯 ॥ 3॥
𑌦𑍍𑌵𑌾𑌃𑌸𑍍𑌥 𑌉𑌵𑌾𑌚 ।
𑌵𑌿𑌦𑍁𑌰𑍋𑌽𑌯𑌮𑌨𑍁𑌪𑍍𑌰𑌾𑌪𑍍𑌤𑍋 𑌰𑌾𑌜𑍇𑌂𑌦𑍍𑌰 𑌤𑌵 𑌶𑌾𑌸𑌨𑌾𑌤𑍍 ।
𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌤𑌿 𑌤𑍇 𑌪𑌾𑌦𑍌 𑌕𑌿𑌂 𑌕𑌰𑍋𑌤𑍁 𑌪𑍍𑌰𑌶𑌾𑌧𑌿 𑌮𑌾𑌮𑍍 ॥ 4॥
𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।
𑌪𑍍𑌰𑌵𑍇𑌶𑌯 𑌮𑌹𑌾𑌪𑍍𑌰𑌾𑌜𑍍𑌞𑌂 𑌵𑌿𑌦𑍁𑌰𑌂 𑌦𑍀𑌰𑍍𑌘𑌦𑌰𑍍𑌶𑌿𑌨𑌮𑍍 ।
𑌅𑌹𑌂 𑌹𑌿 𑌵𑌿𑌦𑍁𑌰𑌸𑍍𑌯𑌾𑌸𑍍𑌯 𑌨𑌾𑌕𑌾𑌲𑍍𑌯𑍋 𑌜𑌾𑌤𑍁 𑌦𑌰𑍍𑌶𑌨𑍇 ॥ 5॥
𑌦𑍍𑌵𑌾𑌃𑌸𑍍𑌥 𑌉𑌵𑌾𑌚 ।
𑌪𑍍𑌰𑌵𑌿𑌶𑌾𑌂𑌤𑌃 𑌪𑍁𑌰𑌂 𑌕𑍍𑌷𑌤𑍍𑌤𑌰𑍍𑌮𑌹𑌾𑌰𑌾𑌜𑌸𑍍𑌯 𑌧𑍀𑌮𑌤𑌃 ।
𑌨 𑌹𑌿 𑌤𑍇 𑌦𑌰𑍍𑌶𑌨𑍇𑌽𑌕𑌾𑌲𑍍𑌯𑍋 𑌜𑌾𑌤𑍁 𑌰𑌾𑌜𑌾 𑌬𑍍𑌰𑌵𑍀𑌤𑌿 𑌮𑌾𑌮𑍍 ॥ 6॥
𑌵𑍈𑌶𑌂𑌪𑌾𑌯𑌨 𑌉𑌵𑌾𑌚 ।
𑌤𑌤𑌃 𑌪𑍍𑌰𑌵𑌿𑌶𑍍𑌯 𑌵𑌿𑌦𑍁𑌰𑍋 𑌧𑍃𑌤𑌰𑌾𑌷𑍍𑌟𑍍𑌰 𑌨𑌿𑌵𑍇𑌶𑌨𑌮𑍍 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌂 𑌚𑌿𑌂𑌤𑌯𑌾𑌨𑌂 𑌨𑌰𑌾𑌧𑌿𑌪𑌮𑍍 ॥ ॥
𑌵𑌿𑌦𑍁𑌰𑍋𑌽𑌹𑌂 𑌮𑌹𑌾𑌪𑍍𑌰𑌾𑌜𑍍𑌞 𑌸𑌂𑌪𑍍𑌰𑌾𑌪𑍍𑌤𑌸𑍍𑌤𑌵 𑌶𑌾𑌸𑌨𑌾𑌤𑍍 ।
𑌯𑌦𑌿 𑌕𑌿𑌂 𑌚𑌨 𑌕𑌰𑍍𑌤𑌵𑍍𑌯𑌮𑌯𑌮𑌸𑍍𑌮𑌿 𑌪𑍍𑌰𑌶𑌾𑌧𑌿 𑌮𑌾𑌮𑍍 ॥ ॥
𑌧𑍃𑌤𑌰𑌷𑍍𑌤𑍍𑌰 𑌉𑌵𑌾𑌚 ।
𑌸𑌂𑌜𑌯𑍋 𑌵𑌿𑌦𑍁𑌰 𑌪𑍍𑌰𑌾𑌪𑍍𑌤𑍋 𑌗𑌰𑍍𑌹𑌯𑌿𑌤𑍍𑌵𑌾 𑌚 𑌮𑌾𑌂 𑌗𑌤𑌃 ।
𑌅𑌜𑌾𑌤𑌶𑌤𑍍𑌰𑍋𑌃 𑌶𑍍𑌵𑍋 𑌵𑌾𑌕𑍍𑌯𑌂 𑌸𑌭𑌾𑌮𑌧𑍍𑌯𑍇 𑌸 𑌵𑌕𑍍𑌷𑍍𑌯𑌤𑌿 ॥ ॥
𑌤𑌸𑍍𑌯𑌾𑌦𑍍𑌯 𑌕𑍁𑌰𑍁𑌵𑍀𑌰𑌸𑍍𑌯 𑌨 𑌵𑌿𑌜𑍍𑌞𑌾𑌤𑌂 𑌵𑌚𑍋 𑌮𑌯𑌾 ।
𑌤𑌨𑍍𑌮𑍇 𑌦𑌹𑌤𑌿 𑌗𑌾𑌤𑍍𑌰𑌾𑌣𑌿 𑌤𑌦𑌕𑌾𑌰𑍍𑌷𑍀𑌤𑍍𑌪𑍍𑌰𑌜𑌾𑌗𑌰𑌮𑍍 ॥ 10॥
𑌜𑌾𑌗𑍍𑌰𑌤𑍋 𑌦𑌹𑍍𑌯𑌮𑌾𑌨𑌸𑍍𑌯 𑌶𑍍𑌰𑍇𑌯𑍋 𑌯𑌦𑌿𑌹 𑌪𑌶𑍍𑌯𑌸𑌿 ।
𑌤𑌦𑍍𑌬𑍍𑌰𑍂𑌹𑌿 𑌤𑍍𑌵𑌂 𑌹𑌿 𑌨𑌸𑍍𑌤𑌾𑌤 𑌧𑌰𑍍𑌮𑌾𑌰𑍍𑌥𑌕𑍁𑌶𑌲𑍋 𑌹𑍍𑌯𑌸𑌿 ॥ 11॥
𑌯𑌤𑌃 𑌪𑍍𑌰𑌾𑌪𑍍𑌤𑌃 𑌸𑌂𑌜𑌯𑌃 𑌪𑌾𑌂𑌡𑌵𑍇𑌭𑍍𑌯𑍋
𑌨 𑌮𑍇 𑌯𑌥𑌾𑌵𑌨𑍍𑌮𑌨𑌸𑌃 𑌪𑍍𑌰𑌶𑌾𑌂𑌤𑌿𑌃 ।
𑌸𑌵𑍇𑌂𑌦𑍍𑌰𑌿𑌯𑌾𑌣𑍍𑌯𑌪𑍍𑌰𑌕𑍃𑌤𑌿𑌂 𑌗𑌤𑌾𑌨𑌿
𑌕𑌿𑌂 𑌵𑌕𑍍𑌷𑍍𑌯𑌤𑍀𑌤𑍍𑌯𑍇𑌵 𑌹𑌿 𑌮𑍇𑌽𑌦𑍍𑌯 𑌚𑌿𑌂𑌤𑌾 ॥ 12॥
𑌤𑌨𑍍𑌮𑍇 𑌬𑍍𑌰𑍂𑌹𑌿 𑌵𑌿𑌦𑍁𑌰 𑌤𑍍𑌵𑌂 𑌯𑌥𑌾𑌵𑌨𑍍
𑌮𑌨𑍀𑌷𑌿𑌤𑌂 𑌸𑌰𑍍𑌵𑌮𑌜𑌾𑌤𑌶𑌤𑍍𑌰𑍋𑌃 ।
𑌯𑌥𑌾 𑌚 𑌨𑌸𑍍𑌤𑌾𑌤 𑌹𑌿𑌤𑌂 𑌭𑌵𑍇𑌚𑍍𑌚
𑌪𑍍𑌰𑌜𑌾𑌶𑍍𑌚 𑌸𑌰𑍍𑌵𑌾𑌃 𑌸𑍁𑌖𑌿𑌤𑌾 𑌭𑌵𑍇𑌯𑍁𑌃 ॥- ॥
𑌵𑌿𑌦𑍁𑌰 𑌉𑌵𑌾𑌚 ।
𑌅𑌭𑌿𑌯𑍁𑌕𑍍𑌤𑌂 𑌬𑌲𑌵𑌤𑌾 𑌦𑍁𑌰𑍍𑌬𑌲𑌂 𑌹𑍀𑌨𑌸𑌾𑌧𑌨𑌮𑍍 ।
𑌹𑍃𑌤𑌸𑍍𑌵𑌂 𑌕𑌾𑌮𑌿𑌨𑌂 𑌚𑍋𑌰𑌮𑌾𑌵𑌿𑌶𑌂𑌤𑌿 𑌪𑍍𑌰𑌜𑌾𑌗𑌰𑌾𑌃 ॥ 13॥
𑌕𑌚𑍍𑌚𑌿𑌦𑍇𑌤𑍈𑌰𑍍𑌮𑌹𑌾𑌦𑍋𑌷𑍈𑌰𑍍𑌨 𑌸𑍍𑌪𑍃𑌷𑍍𑌟𑍋𑌽𑌸𑌿 𑌨𑌰𑌾𑌧𑌿𑌪 ।
𑌕𑌚𑍍𑌚𑌿𑌨𑍍𑌨 𑌪𑌰𑌵𑌿𑌤𑍍𑌤𑍇𑌷𑍁 𑌗𑍃𑌧𑍍𑌯𑌨𑍍𑌵𑌿𑌪𑌰𑌿𑌤𑌪𑍍𑌯𑌸𑍇 ॥ 14॥
𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।
𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌤𑍇 𑌧𑌰𑍍𑌮𑍍𑌯𑌂 𑌪𑌰𑌂 𑌨𑍈𑌃𑌶𑍍𑌰𑍇𑌯𑌸𑌂 𑌵𑌚𑌃 ।
𑌅𑌸𑍍𑌮𑌿𑌨𑍍𑌰𑌾𑌜𑌰𑍍𑌷𑌿𑌵𑌂𑌶𑍇 𑌹𑌿 𑌤𑍍𑌵𑌮𑍇𑌕𑌃 𑌪𑍍𑌰𑌾𑌜𑍍𑌞𑌸𑌮𑍍𑌮𑌤𑌃 ॥ 15॥
𑌵𑌿𑌦𑍁𑌰 𑌉𑌵𑌾𑌚 ।
𑌰𑌜𑌾 𑌲𑌕𑍍𑌷𑌣𑌸𑌂𑌪𑌨𑍍𑌨𑌸𑍍𑌤𑍍𑌰𑍈𑌲𑍋𑌕𑍍𑌯𑌸𑍍𑌯𑌾𑌧𑌿𑌪𑍋 𑌭𑌵𑍇𑌤𑍍 ।
𑌪𑍍𑌰𑍇𑌷𑍍𑌯𑌸𑍍𑌤𑍇 𑌪𑍍𑌰𑍇𑌷𑌿𑌤𑌶𑍍𑌚𑍈𑌵 𑌧𑍃𑌤𑌰𑌾𑌷𑍍𑌟𑍍𑌰 𑌯𑍁𑌧𑌿𑌷𑍍𑌠𑌿𑌰𑌃 ॥- ॥
𑌵𑌿𑌪𑌰𑍀𑌤𑌤𑌰𑌶𑍍𑌚 𑌤𑍍𑌵𑌂 𑌭𑌾𑌗𑌧𑍇𑌯𑍇 𑌨 𑌸𑌮𑍍𑌮𑌤𑌃 ।
𑌅𑌰𑍍𑌚𑌿𑌷𑌾𑌂 𑌪𑍍𑌰𑌕𑍍𑌷𑌯𑌾𑌚𑍍𑌚𑍈𑌵 𑌧𑌰𑍍𑌮𑌾𑌤𑍍𑌮𑌾 𑌧𑌰𑍍𑌮𑌕𑍋𑌵𑌿𑌦𑌃 ॥- ॥
𑌆𑌨𑍃𑌶𑌂𑌸𑍍𑌯𑌾𑌦𑌨𑍁𑌕𑍍𑌰𑍋𑌶𑌾𑌦𑍍𑌧𑌰𑍍𑌮𑌾𑌤𑍍𑌸𑌤𑍍𑌯𑌾𑌤𑍍𑌪𑌰𑌾𑌕𑍍𑌰𑌮𑌾𑌤𑍍 ।
𑌗𑍁𑌰𑍁𑌤𑍍𑌵𑌾𑌤𑍍𑌤𑍍𑌵𑌯𑌿 𑌸𑌂𑌪𑍍𑌰𑍇𑌕𑍍𑌷𑍍𑌯 𑌬𑌹𑍂𑌨𑍍𑌕𑍍𑌲𑍇𑌷𑌾𑌂𑌸𑍍𑌤𑌿𑌤𑌿𑌕𑍍𑌷𑌤𑍇 ॥- ॥
𑌦𑍁𑌰𑍍𑌯𑍋𑌧𑌨𑍇 𑌸𑍌𑌬𑌲𑍇 𑌚 𑌕𑌰𑍍𑌣𑍇 𑌦𑍁𑌃𑌶𑌾𑌸𑌨𑍇 𑌤𑌥𑌾 ।
𑌏𑌤𑍇𑌷𑍍𑌵𑍈𑌶𑍍𑌵𑌰𑍍𑌯𑌮𑌾𑌧𑌾𑌯 𑌕𑌥𑌂 𑌤𑍍𑌵𑌂 𑌭𑍂𑌤𑌿𑌮𑌿𑌚𑍍𑌛𑌸𑌿 ॥- ॥
𑌏𑌕𑌸𑍍𑌮𑌾𑌤𑍍𑌵𑍃𑌕𑍍𑌷𑌾𑌦𑍍𑌯𑌜𑍍𑌞𑌪𑌤𑍍𑌰𑌾𑌣𑌿 𑌰𑌾𑌜𑌨𑍍
𑌸𑍍𑌰𑍁𑌕𑍍𑌚 𑌦𑍍𑌰𑍌𑌣𑍀 𑌪𑍇𑌠𑌨𑍀𑌪𑍀𑌡𑌨𑍇 𑌚 ।
𑌏𑌤𑌸𑍍𑌮𑌾𑌦𑍍𑌰𑌾𑌜𑌨𑍍𑌬𑍍𑌰𑍁𑌵𑌤𑍋 𑌮𑍇 𑌨𑌿𑌬𑍋𑌧
𑌏𑌕𑌸𑍍𑌮𑌾𑌦𑍍𑌵𑍈 𑌜𑌾𑌯𑌤𑍇𑌽𑌸𑌚𑍍𑌚 𑌸𑌚𑍍𑌚 ॥- ॥
𑌆𑌤𑍍𑌮𑌜𑍍𑌞𑌾𑌨𑌂 𑌸𑌮𑌾𑌰𑌂𑌭𑌸𑍍𑌤𑌿𑌤𑌿𑌕𑍍𑌷𑌾 𑌧𑌰𑍍𑌮𑌨𑌿𑌤𑍍𑌯𑌤𑌾 ।
𑌯𑌮𑌰𑍍𑌥𑌾𑌨𑍍𑌨𑌾𑌪𑌕𑌰𑍍𑌷𑌂𑌤𑌿 𑌸 𑌵𑍈 𑌪𑌣𑍍𑌦𑌿𑌤 𑌉𑌚𑍍𑌯𑌤𑍇 ॥- ॥
𑌨𑌿𑌷𑍇𑌵𑌤𑍇 𑌪𑍍𑌰𑌶𑌸𑍍𑌤𑌾𑌨𑌿 𑌨𑌿𑌂𑌦𑌿𑌤𑌾𑌨𑌿 𑌨 𑌸𑍇𑌵𑌤𑍇 ।
𑌅𑌨𑌾𑌸𑍍𑌤𑌿𑌕𑌃 𑌶𑍍𑌰𑌦𑍍𑌦𑌧𑌾𑌨 𑌏𑌤𑌤𑍍𑌪𑌂𑌡𑌿𑌤 𑌲𑌕𑍍𑌷𑌣𑌮𑍍 ॥ 16॥
𑌕𑍍𑌰𑍋𑌧𑍋 𑌹𑌰𑍍𑌷𑌶𑍍𑌚 𑌦𑌰𑍍𑌪𑌶𑍍𑌚 𑌹𑍍𑌰𑍀𑌸𑍍𑌤𑌂𑌭𑍋 𑌮𑌾𑌨𑍍𑌯𑌮𑌾𑌨𑌿𑌤𑌾 ।
𑌯𑌮𑌰𑍍𑌥𑌾𑌨𑍍𑌨𑌾𑌪𑌕𑌰𑍍𑌷𑌂𑌤𑌿 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 1॥
𑌯𑌸𑍍𑌯 𑌕𑍃𑌤𑍍𑌯𑌂 𑌨 𑌜𑌾𑌨𑌂𑌤𑌿 𑌮𑌂𑌤𑍍𑌰𑌂 𑌵𑌾 𑌮𑌂𑌤𑍍𑌰𑌿𑌤𑌂 𑌪𑌰𑍇 ।
𑌕𑍃𑌤𑌮𑍇𑌵𑌾𑌸𑍍𑌯 𑌜𑌾𑌨𑌂𑌤𑌿 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 1॥
𑌯𑌸𑍍𑌯 𑌕𑍃𑌤𑍍𑌯𑌂 𑌨 𑌵𑌿𑌘𑍍𑌨𑌂𑌤𑌿 𑌶𑍀𑌤𑌮𑍁𑌷𑍍𑌣𑌂 𑌭𑌯𑌂 𑌰𑌤𑌿𑌃 ।
𑌸𑌮𑍃𑌦𑍍𑌧𑌿𑌰𑌸𑌮𑍃𑌦𑍍𑌧𑌿𑌰𑍍𑌵𑌾 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 1॥
𑌯𑌸𑍍𑌯 𑌸𑌂𑌸𑌾𑌰𑌿𑌣𑍀 𑌪𑍍𑌰𑌜𑍍𑌞𑌾 𑌧𑌰𑍍𑌮𑌾𑌰𑍍𑌥𑌾𑌵𑌨𑍁𑌵𑌰𑍍𑌤𑌤𑍇 ।
𑌕𑌾𑌮𑌾𑌦𑌰𑍍𑌥𑌂 𑌵𑍃𑌣𑍀𑌤𑍇 𑌯𑌃 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 20॥
𑌯𑌥𑌾𑌶𑌕𑍍𑌤𑌿 𑌚𑌿𑌕𑍀𑌰𑍍𑌷𑌂𑌤𑌿 𑌯𑌥𑌾𑌶𑌕𑍍𑌤𑌿 𑌚 𑌕𑍁𑌰𑍍𑌵𑌤𑍇 ।
𑌨 𑌕𑌿𑌂 𑌚𑌿𑌦𑌵𑌮𑌨𑍍𑌯𑌂𑌤𑍇 𑌪𑌂𑌡𑌿𑌤𑌾 𑌭𑌰𑌤𑌰𑍍𑌷𑌭 ॥ 21॥
𑌕𑍍𑌷𑌿𑌪𑍍𑌰𑌂 𑌵𑌿𑌜𑌾𑌨𑌾𑌤𑌿 𑌚𑌿𑌰𑌂 𑌶𑌋𑌣𑍋𑌤𑌿
𑌵𑌿𑌜𑍍𑌞𑌾𑌯 𑌚𑌾𑌰𑍍𑌥𑌂 𑌭𑌜𑌤𑍇 𑌨 𑌕𑌾𑌮𑌾𑌤𑍍 ।
𑌨𑌾𑌸𑌂𑌪𑍃𑌷𑍍𑌟𑍋 𑌵𑍍𑌯𑍌𑌪𑌯𑍁𑌂𑌕𑍍𑌤𑍇 𑌪𑌰𑌾𑌰𑍍𑌥𑍇
𑌤𑌤𑍍𑌪𑍍𑌰𑌜𑍍𑌞𑌾𑌨𑌂 𑌪𑍍𑌰𑌥𑌮𑌂 𑌪𑌂𑌡𑌿𑌤𑌸𑍍𑌯 ॥ 22॥
𑌨𑌾𑌪𑍍𑌰𑌾𑌪𑍍𑌯𑌮𑌭𑌿𑌵𑌾𑌂𑌛𑌂𑌤𑌿 𑌨𑌷𑍍𑌟𑌂 𑌨𑍇𑌚𑍍𑌛𑌂𑌤𑌿 𑌶𑍋𑌚𑌿𑌤𑍁𑌮𑍍 ।
𑌆𑌪𑌤𑍍𑌸𑍁 𑌚 𑌨 𑌮𑍁𑌹𑍍𑌯𑌂𑌤𑌿 𑌨𑌰𑌾𑌃 𑌪𑌂𑌡𑌿𑌤 𑌬𑍁𑌦𑍍𑌧𑌯𑌃 ॥ 23॥
𑌨𑌿𑌶𑍍𑌚𑌿𑌤𑍍𑌯 𑌯𑌃 𑌪𑍍𑌰𑌕𑍍𑌰𑌮𑌤𑍇 𑌨𑌾𑌂𑌤𑌰𑍍𑌵𑌸𑌤𑌿 𑌕𑌰𑍍𑌮𑌣𑌃 ।
𑌅𑌵𑌂𑌧𑍍𑌯 𑌕𑌾𑌲𑍋 𑌵𑌶𑍍𑌯𑌾𑌤𑍍𑌮𑌾 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 24॥
𑌆𑌰𑍍𑌯 𑌕𑌰𑍍𑌮𑌣𑌿 𑌰𑌾𑌜𑍍𑌯𑌂𑌤𑍇 𑌭𑍂𑌤𑌿𑌕𑌰𑍍𑌮𑌾𑌣𑌿 𑌕𑍁𑌰𑍍𑌵𑌤𑍇 ।
𑌹𑌿𑌤𑌂 𑌚 𑌨𑌾𑌭𑍍𑌯𑌸𑍂𑌯𑌂𑌤𑌿 𑌪𑌂𑌡𑌿𑌤𑌾 𑌭𑌰𑌤𑌰𑍍𑌷𑌭 ॥ 25॥
𑌨 𑌹𑍃𑌷𑍍𑌯𑌤𑍍𑌯𑌾𑌤𑍍𑌮𑌸𑌮𑍍𑌮𑌾𑌨𑍇 𑌨𑌾𑌵𑌮𑌾𑌨𑍇𑌨 𑌤𑌪𑍍𑌯𑌤𑍇 ।
𑌗𑌾𑌂𑌗𑍋 𑌹𑍍𑌰𑌦 𑌇𑌵𑌾𑌕𑍍𑌷𑍋𑌭𑍍𑌯𑍋 𑌯𑌃 𑌸 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 26॥
𑌤𑌤𑍍𑌤𑍍𑌵𑌜𑍍𑌞𑌃 𑌸𑌰𑍍𑌵𑌭𑍂𑌤𑌾𑌨𑌾𑌂 𑌯𑍋𑌗𑌜𑍍𑌞𑌃 𑌸𑌰𑍍𑌵𑌕𑌰𑍍𑌮𑌣𑌾𑌮𑍍 ।
𑌉𑌪𑌾𑌯𑌜𑍍𑌞𑍋 𑌮𑌨𑍁𑌷𑍍𑌯𑌾𑌣𑌾𑌂 𑌨𑌰𑌃 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 2॥
𑌪𑍍𑌰𑌵𑍃𑌤𑍍𑌤 𑌵𑌾𑌕𑍍𑌚𑌿𑌤𑍍𑌰𑌕𑌥 𑌊𑌹𑌵𑌾𑌨𑍍𑌪𑍍𑌰𑌤𑌿𑌭𑌾𑌨𑌵𑌾𑌨𑍍 ।
𑌆𑌶𑍁 𑌗𑍍𑌰𑌂𑌥𑌸𑍍𑌯 𑌵𑌕𑍍𑌤𑌾 𑌚 𑌸 𑌵𑍈 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 2॥
𑌶𑍍𑌰𑍁𑌤𑌂 𑌪𑍍𑌰𑌜𑍍𑌞𑌾𑌨𑍁𑌗𑌂 𑌯𑌸𑍍𑌯 𑌪𑍍𑌰𑌜𑍍𑌞𑌾 𑌚𑍈𑌵 𑌶𑍍𑌰𑍁𑌤𑌾𑌨𑍁𑌗𑌾 ।
𑌅𑌸𑌂𑌭𑌿𑌨𑍍𑌨𑌾𑌰𑍍𑌯 𑌮𑌰𑍍𑌯𑌾𑌦𑌃 𑌪𑌂𑌡𑌿𑌤𑌾𑌖𑍍𑌯𑌾𑌂 𑌲𑌭𑍇𑌤 𑌸𑌃 ॥ 2॥
𑌅𑌰𑍍𑌥𑌂 𑌮𑌹𑌾𑌂𑌤𑌮𑌾𑌸𑌦𑍍𑌯 𑌵𑌿𑌦𑍍𑌯𑌾𑌮𑍈𑌶𑍍𑌵𑌰𑍍𑌯𑌮𑍇𑌵 𑌚 ।
𑌵𑌿𑌚𑌰𑌤𑍍𑌯𑌸𑌮𑍁𑌨𑍍𑌨𑌦𑍍𑌧𑍋 𑌯𑌸𑍍𑌯 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥- ॥
𑌅𑌶𑍍𑌰𑍁𑌤𑌶𑍍𑌚 𑌸𑌮𑍁𑌨𑍍𑌨𑌦𑍍𑌧𑍋 𑌦𑌰𑌿𑌦𑍍𑌰𑌶𑍍𑌚 𑌮𑌹𑌾𑌮𑌨𑌾𑌃 ।
𑌅𑌰𑍍𑌥𑌾𑌂𑌶𑍍𑌚𑌾𑌕𑌰𑍍𑌮𑌣𑌾 𑌪𑍍𑌰𑍇𑌪𑍍𑌸𑍁𑌰𑍍𑌮𑍂𑌢 𑌇𑌤𑍍𑌯𑍁𑌚𑍍𑌯𑌤𑍇 𑌬𑍁𑌧𑍈𑌃 ॥ 30॥
𑌸𑍍𑌵𑌮𑌰𑍍𑌥𑌂 𑌯𑌃 𑌪𑌰𑌿𑌤𑍍𑌯𑌜𑍍𑌯 𑌪𑌰𑌾𑌰𑍍𑌥𑌮𑌨𑍁𑌤𑌿𑌷𑍍𑌠𑌤𑌿 ।
𑌮𑌿𑌥𑍍𑌯𑌾 𑌚𑌰𑌤𑌿 𑌮𑌿𑌤𑍍𑌰𑌾𑌰𑍍𑌥𑍇 𑌯𑌶𑍍𑌚 𑌮𑍂𑌢𑌃 𑌸 𑌉𑌚𑍍𑌯𑌤𑍇 ॥ 31॥
𑌅𑌕𑌾𑌮𑌾𑌂 𑌕𑌾𑌮𑌯𑌤𑌿 𑌯𑌃 𑌕𑌾𑌮𑌯𑌾𑌨𑌾𑌂 𑌪𑌰𑌿𑌤𑍍𑌯𑌜𑍇𑌤𑍍 ।
𑌬𑌲𑌵𑌂𑌤𑌂 𑌚 𑌯𑍋 𑌦𑍍𑌵𑍇𑌷𑍍𑌟𑌿 𑌤𑌮𑌾𑌹𑍁𑌰𑍍𑌮𑍂𑌢𑌚𑍇𑌤𑌸𑌮𑍍 ॥- ॥
𑌅𑌕𑌾𑌮𑌾𑌨𑍍𑌕𑌾𑌮𑌯𑌤𑌿 𑌯𑌃 𑌕𑌾𑌮𑌯𑌾𑌨𑌾𑌨𑍍𑌪𑌰𑌿𑌦𑍍𑌵𑌿𑌷𑌨𑍍 ।
𑌬𑌲𑌵𑌂𑌤𑌂 𑌚 𑌯𑍋 𑌦𑍍𑌵𑍇𑌷𑍍𑌟𑌿 𑌤𑌮𑌾𑌹𑍁𑌰𑍍𑌮𑍂𑌢𑌚𑍇𑌤𑌸𑌮𑍍 ॥ 32॥
𑌅𑌮𑌿𑌤𑍍𑌰𑌂 𑌕𑍁𑌰𑍁𑌤𑍇 𑌮𑌿𑌤𑍍𑌰𑌂 𑌮𑌿𑌤𑍍𑌰𑌂 𑌦𑍍𑌵𑍇𑌷𑍍𑌟𑌿 𑌹𑌿𑌨𑌸𑍍𑌤𑌿 𑌚 ।
𑌕𑌰𑍍𑌮 𑌚𑌾𑌰𑌭𑌤𑍇 𑌦𑍁𑌷𑍍𑌟𑌂 𑌤𑌮𑌾𑌹𑍁𑌰𑍍𑌮𑍂𑌢𑌚𑍇𑌤𑌸𑌮𑍍 ॥ 33॥
𑌸𑌂𑌸𑌾𑌰𑌯𑌤𑌿 𑌕𑍃𑌤𑍍𑌯𑌾𑌨𑌿 𑌸𑌰𑍍𑌵𑌤𑍍𑌰 𑌵𑌿𑌚𑌿𑌕𑌿𑌤𑍍𑌸𑌤𑍇 ।
𑌚𑌿𑌰𑌂 𑌕𑌰𑍋𑌤𑌿 𑌕𑍍𑌷𑌿𑌪𑍍𑌰𑌾𑌰𑍍𑌥𑍇 𑌸 𑌮𑍂𑌢𑍋 𑌭𑌰𑌤𑌰𑍍𑌷𑌭 ॥ 34॥
𑌶𑍍𑌰𑌾𑌦𑍍𑌧𑌂 𑌪𑌿𑌤𑍃𑌭𑍍𑌯𑍋 𑌨 𑌦𑌦𑌾𑌤𑌿 𑌦𑍈𑌵𑌤𑌾𑌨𑌿 𑌨𑌾𑌰𑍍𑌚𑌤𑌿 ।
𑌸𑍁𑌹𑍃𑌨𑍍𑌮𑌿𑌤𑍍𑌰𑌂 𑌨 𑌲𑌭𑌤𑍇 𑌤𑌮𑌾𑌹𑍁𑌰𑍍𑌮𑍂𑌢𑌚𑍇𑌤𑌸𑌮𑍍 ॥- ॥
𑌅𑌨𑌾𑌹𑍂𑌤𑌃 𑌪𑍍𑌰𑌵𑌿𑌶𑌤𑌿 𑌅𑌪𑍃𑌷𑍍𑌟𑍋 𑌬𑌹𑍁 𑌭𑌾𑌷𑌤𑍇 ।
𑌵𑌿𑌶𑍍𑌵𑌸𑌤𑍍𑌯𑌪𑍍𑌰𑌮𑌤𑍍𑌤𑍇𑌷𑍁 𑌮𑍂𑌢 𑌚𑍇𑌤𑌾 𑌨𑌰𑌾𑌧𑌮𑌃 ॥ 35॥
𑌪𑌰𑌂 𑌕𑍍𑌷𑌿𑌪𑌤𑌿 𑌦𑍋𑌷𑍇𑌣 𑌵𑌰𑍍𑌤𑌮𑌾𑌨𑌃 𑌸𑍍𑌵𑌯𑌂 𑌤𑌥𑌾 ।
𑌯𑌶𑍍𑌚 𑌕𑍍𑌰𑍁𑌧𑍍𑌯𑌤𑍍𑌯𑌨𑍀𑌶𑌃 𑌸𑌨𑍍𑌸 𑌚 𑌮𑍂𑌢𑌤𑌮𑍋 𑌨𑌰𑌃 ॥ 36॥
𑌆𑌤𑍍𑌮𑌨𑍋 𑌬𑌲𑌮𑌾𑌜𑍍𑌞𑌾𑌯 𑌧𑌰𑍍𑌮𑌾𑌰𑍍𑌥𑌪𑌰𑌿𑌵𑌰𑍍𑌜𑌿𑌤𑌮𑍍 ।
𑌅𑌲𑌭𑍍𑌯𑌮𑌿𑌚𑍍𑌛𑌨𑍍𑌨𑍈𑌷𑍍𑌕𑌰𑍍𑌮𑍍𑌯𑌾𑌨𑍍𑌮𑍂𑌢 𑌬𑍁𑌦𑍍𑌧𑌿𑌰𑌿𑌹𑍋𑌚𑍍𑌯𑌤𑍇 ॥ 3॥
𑌅𑌶𑌿𑌷𑍍𑌯𑌂 𑌶𑌾𑌸𑍍𑌤𑌿 𑌯𑍋 𑌰𑌾𑌜𑌨𑍍𑌯𑌶𑍍𑌚 𑌶𑍂𑌨𑍍𑌯𑌮𑍁𑌪𑌾𑌸𑌤𑍇 ।
𑌕𑌦𑌰𑍍𑌯𑌂 𑌭𑌜𑌤𑍇 𑌯𑌶𑍍𑌚 𑌤𑌮𑌾𑌹𑍁𑌰𑍍𑌮𑍂𑌢𑌚𑍇𑌤𑌸𑌮𑍍 ॥ 3॥
𑌅𑌰𑍍𑌥𑌂 𑌮𑌹𑌾𑌂𑌤𑌮𑌾𑌸𑌾𑌦𑍍𑌯 𑌵𑌿𑌦𑍍𑌯𑌾𑌮𑍈𑌶𑍍𑌵𑌰𑍍𑌯𑌮𑍇𑌵 𑌵𑌾 ।
𑌵𑌿𑌚𑌰𑌤𑍍𑌯𑌸𑌮𑍁𑌨𑍍𑌨𑌦𑍍𑌧𑍋 𑌯𑌃 𑌸 𑌪𑌂𑌡𑌿𑌤 𑌉𑌚𑍍𑌯𑌤𑍇 ॥ 3॥
𑌏𑌕𑌃 𑌸𑌂𑌪𑌨𑍍𑌨𑌮𑌶𑍍𑌨𑌾𑌤𑌿 𑌵𑌸𑍍𑌤𑍇 𑌵𑌾𑌸𑌶𑍍𑌚 𑌶𑍋𑌭𑌨𑌮𑍍 ।
𑌯𑍋𑌽𑌸𑌂𑌵𑌿𑌭𑌜𑍍𑌯 𑌭𑍃𑌤𑍍𑌯𑍇𑌭𑍍𑌯𑌃 𑌕𑍋 𑌨𑍃𑌶𑌂𑌸𑌤𑌰𑌸𑍍𑌤𑌤𑌃 ॥ 40॥
𑌏𑌕𑌃 𑌪𑌾𑌪𑌾𑌨𑌿 𑌕𑍁𑌰𑍁𑌤𑍇 𑌫𑌲𑌂 𑌭𑍁𑌂𑌕𑍍𑌤𑍇 𑌮𑌹𑌾𑌜𑌨𑌃 ।
𑌭𑍋𑌕𑍍𑌤𑌾𑌰𑍋 𑌵𑌿𑌪𑍍𑌰𑌮𑍁𑌚𑍍𑌯𑌂𑌤𑍇 𑌕𑌰𑍍𑌤𑌾 𑌦𑍋𑌷𑍇𑌣 𑌲𑌿𑌪𑍍𑌯𑌤𑍇 ॥ 41॥
𑌏𑌕𑌂 𑌹𑌨𑍍𑌯𑌾𑌨𑍍𑌨 𑌵𑌾𑌹𑌨𑍍𑌯𑌾𑌦𑌿𑌷𑍁𑌰𑍍𑌮𑍁𑌕𑍍𑌤𑍋 𑌧𑌨𑍁𑌷𑍍𑌮𑌤𑌾 ।
𑌬𑍁𑌦𑍍𑌧𑌿𑌰𑍍𑌬𑍁𑌦𑍍𑌧𑌿𑌮𑌤𑍋𑌤𑍍𑌸𑍃𑌷𑍍𑌟𑌾 𑌹𑌨𑍍𑌯𑌾𑌦𑍍𑌰𑌾𑌷𑍍𑌟𑍍𑌰𑌂 𑌸𑌰𑌾𑌜𑌕𑌮𑍍 ॥ 42॥
𑌏𑌕𑌯𑌾 𑌦𑍍𑌵𑍇 𑌵𑌿𑌨𑌿𑌶𑍍𑌚𑌿𑌤𑍍𑌯 𑌤𑍍𑌰𑍀𑌂𑌶𑍍𑌚𑌤𑍁𑌰𑍍𑌭𑌿𑌰𑍍𑌵𑌶𑍇 𑌕𑍁𑌰𑍁 ।
𑌪𑌂𑌚 𑌜𑌿𑌤𑍍𑌵𑌾 𑌵𑌿𑌦𑌿𑌤𑍍𑌵𑌾 𑌷𑌟𑍍𑌸𑌪𑍍𑌤 𑌹𑌿𑌤𑍍𑌵𑌾 𑌸𑍁𑌖𑍀 𑌭𑌵 ॥ 43॥
𑌏𑌕𑌂 𑌵𑌿𑌷𑌰𑌸𑍋 𑌹𑌂𑌤𑌿 𑌶𑌸𑍍𑌤𑍍𑌰𑍇𑌣𑍈𑌕𑌶𑍍𑌚 𑌵𑌧𑍍𑌯𑌤𑍇 ।
𑌸𑌰𑌾𑌷𑍍𑌟𑍍𑌰𑌂 𑌸 𑌪𑍍𑌰𑌜𑌂 𑌹𑌂𑌤𑌿 𑌰𑌾𑌜𑌾𑌨𑌂 𑌮𑌂𑌤𑍍𑌰𑌵𑌿𑌸𑍍𑌰𑌵𑌃 ॥ 44॥
𑌏𑌕𑌃 𑌸𑍍𑌵𑌾𑌦𑍁 𑌨 𑌭𑍁𑌂𑌜𑍀𑌤 𑌏𑌕𑌶𑍍𑌚𑌾𑌰𑍍𑌥𑌾𑌨𑍍𑌨 𑌚𑌿𑌂𑌤𑌯𑍇𑌤𑍍 ।
𑌏𑌕𑍋 𑌨 𑌗𑌚𑍍𑌛𑍇𑌦𑌧𑍍𑌵𑌾𑌨𑌂 𑌨𑍈𑌕𑌃 𑌸𑍁𑌪𑍍𑌤𑍇𑌷𑍁 𑌜𑌾𑌗𑍃𑌯𑌾𑌤𑍍 ॥ 45॥
𑌏𑌕𑌮𑍇𑌵𑌾𑌦𑍍𑌵𑌿𑌤𑍀𑌯𑌂 𑌤𑌦𑍍𑌯𑌦𑍍𑌰𑌾𑌜𑌨𑍍𑌨𑌾𑌵𑌬𑍁𑌧𑍍𑌯𑌸𑍇 ।
𑌸𑌤𑍍𑌯𑌂 𑌸𑍍𑌵𑌰𑍍𑌗𑌸𑍍𑌯 𑌸𑍋𑌪𑌾𑌨𑌂 𑌪𑌾𑌰𑌾𑌵𑌾𑌰𑌸𑍍𑌯 𑌨𑍌𑌰𑌿𑌵 ॥ 46॥
𑌏𑌕𑌃 𑌕𑍍𑌷𑌮𑌾𑌵𑌤𑌾𑌂 𑌦𑍋𑌷𑍋 𑌦𑍍𑌵𑌿𑌤𑍀𑌯𑍋 𑌨𑍋𑌪𑌲𑌭𑍍𑌯𑌤𑍇 ।
𑌯𑌦𑍇𑌨𑌂 𑌕𑍍𑌷𑌮𑌯𑌾 𑌯𑍁𑌕𑍍𑌤𑌮𑌶𑌕𑍍𑌤𑌂 𑌮𑌨𑍍𑌯𑌤𑍇 𑌜𑌨𑌃 ॥ 4॥
𑌸𑍋𑌽𑌸𑍍𑌯 𑌦𑍋𑌷𑍋 𑌨 𑌮𑌂𑌤𑌵𑍍𑌯𑌃 𑌕𑍍𑌷𑌮𑌾 𑌹𑌿 𑌪𑌰𑌮𑌂 𑌬𑌲𑌮𑍍 ।
𑌕𑍍𑌷𑌮𑌾 𑌗𑍁𑌣𑍋 𑌹𑍍𑌯𑌶𑌕𑍍𑌤𑌾𑌨𑌾𑌂 𑌶𑌕𑍍𑌤𑌾𑌨𑌾𑌂 𑌭𑍂𑌷𑌣𑌂 𑌤𑌥𑌾 ॥- ॥
𑌕𑍍𑌷𑌮𑌾 𑌵𑌶𑍀𑌕𑍃𑌤𑌿𑌰𑍍𑌲𑍋𑌕𑍇 𑌕𑍍𑌷𑌮𑌯𑌾 𑌕𑌿𑌂 𑌨 𑌸𑌾𑌧𑍍𑌯𑌤𑍇 ।
𑌶𑌾𑌂𑌤𑌿𑌶𑌂𑌖𑌃 𑌕𑌰𑍇 𑌯𑌸𑍍𑌯 𑌕𑌿𑌂 𑌕𑌰𑌿𑌷𑍍𑌯𑌤𑌿 𑌦𑍁𑌰𑍍𑌜𑌨𑌃 ॥- ॥
𑌅𑌤𑍃𑌣𑍇 𑌪𑌤𑌿𑌤𑍋 𑌵𑌹𑍍𑌨𑌿𑌃 𑌸𑍍𑌵𑌯𑌮𑍇𑌵𑍋𑌪𑌶𑌾𑌮𑍍𑌯𑌤𑌿 ।
𑌅𑌕𑍍𑌷𑌮𑌾𑌵𑌾𑌨𑍍𑌪𑌰𑌂 𑌦𑍋𑌷𑍈𑌰𑌾𑌤𑍍𑌮𑌾𑌨𑌂 𑌚𑍈𑌵 𑌯𑍋𑌜𑌯𑍇𑌤𑍍 ॥- ॥
𑌏𑌕𑍋 𑌧𑌰𑍍𑌮𑌃 𑌪𑌰𑌂 𑌶𑍍𑌰𑍇𑌯𑌃 𑌕𑍍𑌷𑌮𑍈𑌕𑌾 𑌶𑌾𑌂𑌤𑌿𑌰𑍁𑌤𑍍𑌤𑌮𑌾 ।
𑌵𑌿𑌦𑍍𑌯𑍈𑌕𑌾 𑌪𑌰𑌮𑌾 𑌦𑍃𑌷𑍍𑌟𑌿𑌰𑌹𑌿𑌂𑌸𑍈𑌕𑌾 𑌸𑍁𑌖𑌾𑌵𑌹𑌾 ॥ 4॥
𑌦𑍍𑌵𑌾𑌵𑌿𑌮𑍌 𑌗𑍍𑌰𑌸𑌤𑍇 𑌭𑍂𑌮𑌿𑌃 𑌸𑌰𑍍𑌪𑍋 𑌬𑌿𑌲𑌶𑌯𑌾𑌨𑌿𑌵 ।
𑌰𑌾𑌜𑌾𑌨𑌂 𑌚𑌾𑌵𑌿𑌰𑍋𑌦𑍍𑌧𑌾𑌰𑌂 𑌬𑍍𑌰𑌾𑌹𑍍𑌮𑌣𑌂 𑌚𑌾𑌪𑍍𑌰𑌵𑌾𑌸𑌿𑌨𑌮𑍍 ॥ 4॥
𑌦𑍍𑌵𑍇 𑌕𑌰𑍍𑌮𑌣𑍀 𑌨𑌰𑌃 𑌕𑍁𑌰𑍍𑌵𑌨𑍍𑌨𑌸𑍍𑌮𑌿𑌁𑌲𑍍𑌲𑍋𑌕𑍇 𑌵𑌿𑌰𑍋𑌚𑌤𑍇 ।
𑌅𑌬𑍍𑌰𑍁𑌵𑌨𑍍𑌪𑌰𑍁𑌷𑌂 𑌕𑌿𑌂 𑌚𑌿𑌦𑌸𑌤𑍋 𑌨𑌾𑌰𑍍𑌥𑌯𑌂𑌸𑍍𑌤𑌥𑌾 ॥ 50॥
𑌦𑍍𑌵𑌾𑌵𑌿𑌮𑍌 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌪𑌰𑌪𑍍𑌰𑌤𑍍𑌯𑌯 𑌕𑌾𑌰𑌿𑌣𑍌 ।
𑌸𑍍𑌤𑍍𑌰𑌿𑌯𑌃 𑌕𑌾𑌮𑌿𑌤 𑌕𑌾𑌮𑌿𑌨𑍍𑌯𑍋 𑌲𑍋𑌕𑌃 𑌪𑍂𑌜𑌿𑌤 𑌪𑍂𑌜𑌕𑌃 ॥ 51॥
𑌦𑍍𑌵𑌾𑌵𑌿𑌮𑍌 𑌕𑌂𑌟𑌕𑍌 𑌤𑍀𑌕𑍍𑌷𑍍𑌣𑍌 𑌶𑌰𑍀𑌰𑌪𑌰𑌿𑌶𑍋𑌷𑌣𑍌 ।
𑌯𑌶𑍍𑌚𑌾𑌧𑌨𑌃 𑌕𑌾𑌮𑌯𑌤𑍇 𑌯𑌶𑍍𑌚 𑌕𑍁𑌪𑍍𑌯𑌤𑍍𑌯𑌨𑍀𑌶𑍍𑌵𑌰𑌃 ॥ 52॥
𑌦𑍍𑌵𑌾𑌵𑍇𑌵 𑌨 𑌵𑌿𑌰𑌾𑌜𑍇𑌤𑍇 𑌵𑌿𑌪𑌰𑍀𑌤𑍇𑌨 𑌕𑌰𑍍𑌮𑌣𑌾 ।
𑌗𑍃𑌹𑌸𑍍𑌥𑌶𑍍𑌚 𑌨𑌿𑌰𑌾𑌰𑌂𑌭𑌃 𑌕𑌾𑌰𑍍𑌯𑌵𑌾𑌂𑌶𑍍𑌚𑍈𑌵 𑌭𑌿𑌕𑍍𑌷𑍁𑌕𑌃 ॥- ॥
𑌦𑍍𑌵𑌾𑌵𑌿𑌮𑍌 𑌪𑍁𑌰𑍁𑌷𑍌 𑌰𑌾𑌜𑌨𑍍𑌸𑍍𑌵𑌰𑍍𑌗𑌸𑍍𑌯 𑌪𑌰𑌿 𑌤𑌿𑌷𑍍𑌠𑌤𑌃 ।
𑌪𑍍𑌰𑌭𑍁𑌶𑍍𑌚 𑌕𑍍𑌷𑌮𑌯𑌾 𑌯𑍁𑌕𑍍𑌤𑍋 𑌦𑌰𑌿𑌦𑍍𑌰𑌶𑍍𑌚 𑌪𑍍𑌰𑌦𑌾𑌨𑌵𑌾𑌨𑍍 ॥ 53॥
𑌨𑍍𑌯𑌾𑌯𑌾𑌗𑌤𑌸𑍍𑌯 𑌦𑍍𑌰𑌵𑍍𑌯𑌸𑍍𑌯 𑌬𑍋𑌦𑍍𑌧𑌵𑍍𑌯𑍌 𑌦𑍍𑌵𑌾𑌵𑌤𑌿𑌕𑍍𑌰𑌮𑍌 ।
𑌅𑌪𑌾𑌤𑍍𑌰𑍇 𑌪𑍍𑌰𑌤𑌿𑌪𑌤𑍍𑌤𑌿𑌶𑍍𑌚 𑌪𑌾𑌤𑍍𑌰𑍇 𑌚𑌾𑌪𑍍𑌰𑌤𑌿𑌪𑌾𑌦𑌨𑌮𑍍 ॥ 54॥
𑌦𑍍𑌵𑌾𑌵𑌂𑌭𑌸𑌿 𑌨𑌿𑌵𑍇𑌷𑍍𑌟𑌵𑍍𑌯𑍌 𑌗𑌲𑍇 𑌬𑌦𑍍𑌧𑍍𑌵𑌾 𑌦𑍃𑌢𑌂 𑌶𑌿𑌲𑌾𑌮𑍍 ।
𑌧𑌨𑌵𑌂𑌤𑌮𑌦𑌾𑌤𑌾𑌰𑌂 𑌦𑌰𑌿𑌦𑍍𑌰𑌂 𑌚𑌾𑌤𑌪𑌸𑍍𑌵𑌿𑌨𑌮𑍍 ॥- ॥
𑌦𑍍𑌵𑌾𑌵𑌿𑌮𑍌 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌸𑍁𑌰𑍍𑌯𑌮𑌂𑌡𑌲𑌭𑍇𑌦𑌿𑌨𑍌 ।
𑌪𑌰𑌿𑌵𑍍𑌰𑌾𑌡𑍍𑌯𑍋𑌗𑌯𑍁𑌕𑍍𑌤𑌶𑍍𑌚 𑌰𑌣𑍇 𑌚𑌾𑌭𑌿𑌮𑍁𑌖𑍋 𑌹𑌤𑌃 ॥- ॥
𑌤𑍍𑌰𑌯𑍋 𑌨𑍍𑌯𑌾𑌯𑌾 𑌮𑌨𑍁𑌷𑍍𑌯𑌾𑌣𑌾𑌂 𑌶𑍍𑌰𑍂𑌯𑌂𑌤𑍇 𑌭𑌰𑌤𑌰𑍍𑌷𑌭 ।
𑌕𑌨𑍀𑌯𑌾𑌨𑍍𑌮𑌧𑍍𑌯𑌮𑌃 𑌶𑍍𑌰𑍇𑌷𑍍𑌠 𑌇𑌤𑌿 𑌵𑍇𑌦𑌵𑌿𑌦𑍋 𑌵𑌿𑌦𑍁𑌃 ॥ 55॥
𑌤𑍍𑌰𑌿𑌵𑌿𑌧𑌾𑌃 𑌪𑍁𑌰𑍁𑌷𑌾 𑌰𑌾𑌜𑌨𑍍𑌨𑍁𑌤𑍍𑌤𑌮𑌾𑌧𑌮𑌮𑌧𑍍𑌯𑌮𑌾𑌃 ।
𑌨𑌿𑌯𑍋𑌜𑌯𑍇𑌦𑍍𑌯𑌥𑌾𑌵𑌤𑍍𑌤𑌾𑌂𑌸𑍍𑌤𑍍𑌰𑌿𑌵𑌿𑌧𑍇𑌷𑍍𑌵𑍇𑌵 𑌕𑌰𑍍𑌮𑌸𑍁 ॥ 56॥
𑌤𑍍𑌰𑌯 𑌏𑌵𑌾𑌧𑌨𑌾 𑌰𑌾𑌜𑌨𑍍𑌭𑌾𑌰𑍍𑌯𑌾 𑌦𑌾𑌸𑌸𑍍𑌤𑌥𑌾 𑌸𑍁𑌤𑌃 ।
𑌯𑌤𑍍𑌤𑍇 𑌸𑌮𑌧𑌿𑌗𑌚𑍍𑌛𑌂𑌤𑌿 𑌯𑌸𑍍𑌯 𑌤𑍇 𑌤𑌸𑍍𑌯 𑌤𑌦𑍍𑌧𑌨𑌮𑍍 ॥ 5॥
𑌹𑌰𑌣𑌂 𑌚 𑌪𑌰𑌸𑍍𑌵𑌾𑌨𑌾𑌂 𑌪𑌰𑌦𑌾𑌰𑌾𑌭𑌿𑌮𑌰𑍍𑌶𑌨𑌮𑍍 ।
𑌸𑍁𑌹𑍃𑌦𑌶𑍍𑌚 𑌪𑌰𑌿𑌤𑍍𑌯𑌾𑌗𑌸𑍍𑌤𑍍𑌰𑌯𑍋 𑌦𑍋𑌷𑌾 𑌕𑍍𑌷𑌯𑌾𑌵𑌹𑌃 ॥- ॥
𑌤𑍍𑌰𑌿𑌵𑌿𑌧𑌂 𑌨𑌰𑌕𑌸𑍍𑌯𑍇𑌦𑌂 𑌦𑍍𑌵𑌾𑌰𑌂 𑌨𑌾𑌶𑌨𑌮𑌾𑌤𑍍𑌮𑌨𑌃 ।
𑌕𑌾𑌮𑌃 𑌕𑍍𑌰𑍋𑌧𑌸𑍍𑌤𑌥𑌾 𑌲𑍋𑌭𑌸𑍍𑌤𑌸𑍍𑌮𑌾𑌦𑍇𑌤𑌤𑍍𑌤𑍍𑌰𑌯𑌂 𑌤𑍍𑌯𑌜𑍇𑌤𑍍 ॥- ॥
𑌵𑌰𑌪𑍍𑌰𑌦𑌾𑌨𑌂 𑌰𑌾𑌜𑍍𑌯𑌾𑌂 𑌚 𑌪𑍁𑌤𑍍𑌰𑌜𑌨𑍍𑌮 𑌚 𑌭𑌾𑌰𑌤 ।
𑌶𑌤𑍍𑌰𑍋𑌶𑍍𑌚 𑌮𑍋𑌕𑍍𑌷𑌣𑌂 𑌕𑍃𑌚𑍍𑌛𑍍𑌰𑌾𑌤𑍍𑌤𑍍𑌰𑍀𑌣𑌿 𑌚𑍈𑌕𑌂 𑌚 𑌤𑌤𑍍𑌸𑌮𑌮𑍍 ॥- ॥
𑌭𑌕𑍍𑌤𑌂 𑌚 𑌬𑌜𑌮𑌾𑌨𑌂 𑌚 𑌤𑌵𑌾𑌸𑍍𑌮𑍀𑌤𑌿 𑌵𑌾𑌦𑌿𑌨𑌮𑍍 ।
𑌤𑍍𑌰𑍀𑌨𑍇𑌤𑌾𑌨𑍍 𑌶𑌰𑌣𑌂 𑌪𑍍𑌰𑌾𑌪𑍍𑌤𑌾𑌨𑍍𑌵𑌿𑌷𑌮𑍇𑌽𑌪𑌿 𑌨 𑌸𑌂𑌤𑍍𑌯𑌜𑍇𑌤𑍍 ॥- ॥
𑌚𑌤𑍍𑌵𑌾𑌰𑌿 𑌰𑌾𑌜𑍍𑌞𑌾 𑌤𑍁 𑌮𑌹𑌾𑌬𑌲𑍇𑌨
𑌵𑌰𑍍𑌜𑍍𑌯𑌾𑌨𑍍𑌯𑌾𑌹𑍁𑌃 𑌪𑌂𑌡𑌿𑌤𑌸𑍍𑌤𑌾𑌨𑌿 𑌵𑌿𑌦𑍍𑌯𑌾𑌤𑍍 ।
𑌅𑌲𑍍𑌪𑌪𑍍𑌰𑌜𑍍𑌞𑍈𑌃 𑌸𑌹 𑌮𑌂𑌤𑍍𑌰𑌂 𑌨 𑌕𑍁𑌰𑍍𑌯𑌾𑌨𑍍
𑌨 𑌦𑍀𑌰𑍍𑌘𑌸𑍂𑌤𑍍𑌰𑍈𑌰𑌲𑌸𑍈𑌶𑍍𑌚𑌾𑌰𑌣𑍈𑌶𑍍𑌚 ॥ 5॥
𑌚𑌤𑍍𑌵𑌾𑌰𑌿 𑌤𑍇 𑌤𑌾𑌤 𑌗𑍃𑌹𑍇 𑌵𑌸𑌂𑌤𑍁
𑌶𑍍𑌰𑌿𑌯𑌾𑌭𑌿𑌜𑍁𑌷𑍍𑌟𑌸𑍍𑌯 𑌗𑍃𑌹𑌸𑍍𑌥 𑌧𑌰𑍍𑌮𑍇 ।
𑌵𑍃𑌦𑍍𑌧𑍋 𑌜𑍍𑌞𑌾𑌤𑌿𑌰𑌵𑌸𑌨𑍍𑌨𑌃 𑌕𑍁𑌲𑍀𑌨𑌃
𑌸𑌖𑌾 𑌦𑌰𑌿𑌦𑍍𑌰𑍋 𑌭𑌗𑌿𑌨𑍀 𑌚𑌾𑌨𑌪𑌤𑍍𑌯𑌾 ॥ 5॥
𑌚𑌤𑍍𑌵𑌾𑌰𑍍𑌯𑌾𑌹 𑌮𑌹𑌾𑌰𑌾𑌜 𑌸𑌦𑍍𑌯𑌸𑍍𑌕𑌾𑌨𑌿 𑌬𑍃𑌹𑌸𑍍𑌪𑌤𑌿𑌃 ।
𑌪𑍃𑌚𑍍𑌛𑌤𑍇 𑌤𑍍𑌰𑌿𑌦𑌶𑍇𑌂𑌦𑍍𑌰𑌾𑌯 𑌤𑌾𑌨𑍀𑌮𑌾𑌨𑌿 𑌨𑌿𑌬𑍋𑌧 𑌮𑍇 ॥ 60॥
𑌦𑍇𑌵𑌤𑌾𑌨𑌾𑌂 𑌚 𑌸𑌂𑌕𑌲𑍍𑌪𑌮𑌨𑍁𑌭𑌾𑌵𑌂 𑌚 𑌧𑍀𑌮𑌤𑌾𑌮𑍍 ।
𑌵𑌿𑌨𑌯𑌂 𑌕𑍃𑌤𑌵𑌿𑌦𑍍𑌯𑌾𑌨𑌾𑌂 𑌵𑌿𑌨𑌾𑌶𑌂 𑌪𑌾𑌪𑌕𑌰𑍍𑌮𑌣𑌾𑌮𑍍 ॥ 61॥
𑌚𑌤𑍍𑌵𑌾𑌰𑌿 𑌕𑌰𑍍𑌮𑌾𑌣𑍍𑌯𑌭𑌯𑌂𑌕𑌰𑌾𑌣𑌿
𑌭𑌯𑌂 𑌪𑍍𑌰𑌯𑌚𑍍𑌛𑌂𑌤𑍍𑌯𑌯𑌥𑌾𑌕𑍃𑌤𑌾𑌨𑌿 ।
𑌮𑌾𑌨𑌾𑌗𑍍𑌨𑌿𑌹𑍋𑌤𑍍𑌰𑌂 𑌉𑌤 𑌮𑌾𑌨𑌮𑍌𑌨𑌂
𑌮𑌾𑌨𑍇𑌨𑌾𑌧𑍀𑌤𑌮𑍁𑌤 𑌮𑌾𑌨𑌯𑌜𑍍𑌞𑌃 ॥- ॥
𑌪𑌂𑌚𑌾𑌗𑍍𑌨𑌯𑍋 𑌮𑌨𑍁𑌷𑍍𑌯𑍇𑌣 𑌪𑌰𑌿𑌚𑌰𑍍𑌯𑌾𑌃 𑌪𑍍𑌰𑌯𑌤𑍍𑌨𑌤𑌃 ।
𑌪𑌿𑌤𑌾 𑌮𑌾𑌤𑌾𑌗𑍍𑌨𑌿𑌰𑌾𑌤𑍍𑌮𑌾 𑌚 𑌗𑍁𑌰𑍁𑌶𑍍𑌚 𑌭𑌰𑌤𑌰𑍍𑌷𑌭 ॥ 62॥
𑌪𑌂𑌚𑍈𑌵 𑌪𑍂𑌜𑌯𑌁𑌲𑍍𑌲𑍋𑌕𑍇 𑌯𑌶𑌃 𑌪𑍍𑌰𑌾𑌪𑍍𑌨𑍋𑌤𑌿 𑌕𑍇𑌵𑌲𑌮𑍍 ।
𑌦𑍇𑌵𑌾𑌨𑍍𑌪𑌿𑌤𑍄𑌨𑍍𑌮𑌨𑍁𑌷𑍍𑌯𑌾𑌂𑌶𑍍𑌚 𑌭𑌿𑌕𑍍𑌷𑍂𑌨𑌤𑌿𑌥𑌿𑌪𑌂𑌚𑌮𑌾𑌨𑍍 ॥ 63॥
𑌪𑌂𑌚 𑌤𑍍𑌵𑌾𑌨𑍁𑌗𑌮𑌿𑌷𑍍𑌯𑌂𑌤𑌿 𑌯𑌤𑍍𑌰 𑌯𑌤𑍍𑌰 𑌗𑌮𑌿𑌷𑍍𑌯𑌸𑌿 ।
𑌮𑌿𑌤𑍍𑌰𑌾𑌣𑍍𑌯𑌮𑌿𑌤𑍍𑌰𑌾 𑌮𑌧𑍍𑌯𑌸𑍍𑌥𑌾 𑌉𑌪𑌜𑍀𑌵𑍍𑌯𑍋𑌪𑌜𑍀𑌵𑌿𑌨𑌃 ॥ 64॥
𑌪𑌂𑌚𑍇𑌂𑌦𑍍𑌰𑌿𑌯𑌸𑍍𑌯 𑌮𑌰𑍍𑌤𑍍𑌯𑌸𑍍𑌯 𑌛𑌿𑌦𑍍𑌰𑌂 𑌚𑍇𑌦𑍇𑌕𑌮𑌿𑌂𑌦𑍍𑌰𑌿𑌯𑌮𑍍 ।
𑌤𑌤𑍋𑌽𑌸𑍍𑌯 𑌸𑍍𑌰𑌵𑌤𑌿 𑌪𑍍𑌰𑌜𑍍𑌞𑌾 𑌦𑍃𑌤𑍇𑌃 𑌪𑌾𑌦𑌾𑌦𑌿𑌵𑍋𑌦𑌕𑌮𑍍 ॥ 65॥
𑌷𑌡𑍍𑌦𑍋𑌷𑌾𑌃 𑌪𑍁𑌰𑍁𑌷𑍇𑌣𑍇𑌹 𑌹𑌾𑌤𑌵𑍍𑌯𑌾 𑌭𑍂𑌤𑌿𑌮𑌿𑌚𑍍𑌛𑌤𑌾 ।
𑌨𑌿𑌦𑍍𑌰𑌾 𑌤𑌂𑌦𑍍𑌰𑍀 𑌭𑌯𑌂 𑌕𑍍𑌰𑍋𑌧 𑌆𑌲𑌸𑍍𑌯𑌂 𑌦𑍀𑌰𑍍𑌘𑌸𑍂𑌤𑍍𑌰𑌤𑌾 ॥ 66॥
𑌷𑌡𑌿𑌮𑌾𑌨𑍍𑌪𑍁𑌰𑍁𑌷𑍋 𑌜𑌹𑍍𑌯𑌾𑌦𑍍𑌭𑌿𑌨𑍍𑌨𑌾𑌂 𑌨𑌾𑌵𑌮𑌿𑌵𑌾𑌰𑍍𑌣𑌵𑍇 ।
𑌅𑌪𑍍𑌰𑌵𑌕𑍍𑌤𑌾𑌰𑌮𑌾𑌚𑌾𑌰𑍍𑌯𑌮𑌨𑌧𑍀𑌯𑌾𑌨𑌮𑍃𑌤𑍍𑌵𑌿𑌜𑌮𑍍 ॥ 6॥
𑌅𑌰𑌕𑍍𑌷𑌿𑌤𑌾𑌰𑌂 𑌰𑌾𑌜𑌾𑌨𑌂 𑌭𑌾𑌰𑍍𑌯𑌾𑌂 𑌚𑌾𑌪𑍍𑌰𑌿𑌯 𑌵𑌾𑌦𑌿𑌨𑍀𑌮𑍍 ।
𑌗𑍍𑌰𑌾𑌮𑌕𑌾𑌰𑌂 𑌚 𑌗𑍋𑌪𑌾𑌲𑌂 𑌵𑌨𑌕𑌾𑌮𑌂 𑌚 𑌨𑌾𑌪𑌿𑌤𑌮𑍍 ॥ 6॥
𑌷𑌡𑍇𑌵 𑌤𑍁 𑌗𑍁𑌣𑌾𑌃 𑌪𑍁𑌂𑌸𑌾 𑌨 𑌹𑌾𑌤𑌵𑍍𑌯𑌾𑌃 𑌕𑌦𑌾𑌚𑌨 ।
𑌸𑌤𑍍𑌯𑌂 𑌦𑌾𑌨𑌮𑌨𑌾𑌲𑌸𑍍𑌯𑌮𑌨𑌸𑍂𑌯𑌾 𑌕𑍍𑌷𑌮𑌾 𑌧𑍃𑌤𑌿𑌃 ॥ 6॥
𑌅𑌰𑍍𑌥𑌾𑌗𑌮𑍋 𑌨𑌿𑌤𑍍𑌯𑌮𑌰𑍋𑌗𑌿𑌤𑌾 𑌚
𑌪𑍍𑌰𑌿𑌯𑌾 𑌚 𑌭𑌾𑌰𑍍𑌯𑌾 𑌪𑍍𑌰𑌿𑌯𑌵𑌾𑌦𑌿𑌨𑍀 𑌚 ।
𑌵𑌶𑍍𑌯𑌶𑍍𑌚 𑌪𑍁𑌤𑍍𑌰𑍋𑌽𑌰𑍍𑌥𑌕𑌰𑍀 𑌚 𑌵𑌿𑌦𑍍𑌯𑌾
𑌷𑌟𑍍 𑌜𑍀𑌵𑌲𑍋𑌕𑌸𑍍𑌯 𑌸𑍁𑌖𑌾𑌨𑌿 𑌰𑌾𑌜𑌨𑍍 ॥- ॥
𑌷𑌣𑍍𑌣𑌾𑌮𑌾𑌤𑍍𑌮𑌨𑌿 𑌨𑌿𑌤𑍍𑌯𑌾𑌨𑌾𑌮𑍈𑌶𑍍𑌵𑌰𑍍𑌯𑌂 𑌯𑍋𑌽𑌧𑌿𑌗𑌚𑍍𑌛𑌤𑌿 ।
𑌨 𑌸 𑌪𑌾𑌪𑍈𑌃 𑌕𑍁𑌤𑍋𑌽𑌨𑌰𑍍𑌥𑍈𑌰𑍍𑌯𑍁𑌜𑍍𑌯𑌤𑍇 𑌵𑌿𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 0॥
𑌷𑌡𑌿𑌮𑍇 𑌷𑌟𑍍𑌸𑍁 𑌜𑍀𑌵𑌂𑌤𑌿 𑌸𑌪𑍍𑌤𑌮𑍋 𑌨𑍋𑌪𑌲𑌭𑍍𑌯𑌤𑍇 ।
𑌚𑍋𑌰𑌾𑌃 𑌪𑍍𑌰𑌮𑌤𑍍𑌤𑍇 𑌜𑍀𑌵𑌂𑌤𑌿 𑌵𑍍𑌯𑌾𑌧𑌿𑌤𑍇𑌷𑍁 𑌚𑌿𑌕𑌿𑌤𑍍𑌸𑌕𑌾𑌃 ॥ 1॥
𑌪𑍍𑌰𑌮𑌦𑌾𑌃 𑌕𑌾𑌮𑌯𑌾𑌨𑍇𑌷𑍁 𑌯𑌜𑌮𑌾𑌨𑍇𑌷𑍁 𑌯𑌾𑌜𑌕𑌾𑌃 ।
𑌰𑌾𑌜𑌾 𑌵𑌿𑌵𑌦𑌮𑌾𑌨𑍇𑌷𑍁 𑌨𑌿𑌤𑍍𑌯𑌂 𑌮𑍂𑌰𑍍𑌖𑍇𑌷𑍁 𑌪𑌂𑌡𑌿𑌤𑌾𑌃 ॥ 2॥
𑌷𑌡𑌿𑌮𑌾𑌨𑌿 𑌵𑌿𑌨𑌶𑍍𑌯𑌂𑌤𑌿 𑌮𑍁𑌹𑍂𑌰𑍍𑌤𑌮𑌨𑌵𑍇𑌕𑍍𑌷𑌣𑌾𑌤𑍍 ।
𑌗𑌾𑌵𑌃 𑌸𑍇𑌵𑌾 𑌕𑍃𑌷𑌿𑌰𑍍𑌭𑌾𑌰𑍍𑌯𑌾 𑌵𑌿𑌦𑍍𑌯𑌾 𑌵𑍃𑌷𑌲𑌸𑌂𑌗𑌤𑌿𑌃 ॥- ॥
𑌷𑌡𑍇𑌤𑍇 𑌹𑍍𑌯𑌵𑌮𑌨𑍍𑌯𑌂𑌤𑍇 𑌨𑌿𑌤𑍍𑌯𑌂 𑌪𑍂𑌰𑍍𑌵𑍋𑌪𑌕𑌾𑌰𑌿𑌣𑌮𑍍 ।
𑌆𑌚𑌾𑌰𑍍𑌯𑌂 𑌶𑌿𑌕𑍍𑌷𑌿𑌤𑌾 𑌶𑌿𑌷𑍍𑌯𑌾𑌃 𑌕𑍃𑌤𑌦𑌾𑌰𑌶𑍍𑌚 𑌮𑌾𑌤𑌰𑌮𑍍 ॥- ॥
𑌨𑌾𑌰𑌿𑌂 𑌵𑌿𑌗𑌤𑌕𑌾𑌮𑌸𑍍𑌤𑍁 𑌕𑍃𑌤𑌾𑌰𑍍𑌥𑌾𑌶𑍍𑌚 𑌪𑍍𑌰𑌯𑍋𑌜𑌕𑌮𑍍 ।
𑌨𑌾𑌵𑌂 𑌨𑌿𑌸𑍍𑌤𑍀𑌰𑍍𑌣𑌕𑌾𑌂𑌤𑌾𑌰𑌾 𑌨𑌾𑌤𑍁𑌰𑌾𑌶𑍍𑌚 𑌚𑌿𑌕𑌿𑌤𑍍𑌸𑌕𑌮𑍍 ॥- ॥
𑌆𑌰𑍋𑌗𑍍𑌯𑌮𑌾𑌨𑍃𑌣𑍍𑌯𑌮𑌵𑌿𑌪𑍍𑌰𑌵𑌾𑌸𑌃
𑌸𑌦𑍍𑌭𑌿𑌰𑍍𑌮𑌨𑍁𑌷𑍍𑌯𑍈𑌃 𑌸𑌹 𑌸𑌂𑌪𑍍𑌰𑌯𑍋𑌗𑌃 ।
𑌸𑍍𑌵𑌪𑍍𑌰𑌤𑍍𑌯𑌯𑌾 𑌵𑍃𑌤𑍍𑌤𑌿𑌰𑌭𑍀𑌤𑌵𑌾𑌸𑌃
𑌷𑌟𑍍 𑌜𑍀𑌵𑌲𑍋𑌕𑌸𑍍𑌯 𑌸𑍁𑌖𑌾𑌨𑌿 𑌰𑌾𑌜𑌨𑍍 ॥- ॥
𑌈𑌰𑍍𑌷𑍁𑌰𑍍𑌘𑍃𑌣𑍀 𑌨𑌸𑌂𑌤𑍁𑌷𑍍𑌟𑌃 𑌕𑍍𑌰𑍋𑌧𑌨𑍋 𑌨𑌿𑌤𑍍𑌯𑌶𑌂𑌕𑌿𑌤𑌃 ।
𑌪𑌰𑌭𑌾𑌗𑍍𑌯𑍋𑌪𑌜𑍀𑌵𑍀 𑌚 𑌷𑌡𑍇𑌤𑍇 𑌨𑌿𑌤𑍍𑌯𑌦𑍁𑌃𑌖𑌿𑌤𑌾𑌃 ॥- ॥
𑌸𑌪𑍍𑌤 𑌦𑍋𑌷𑌾𑌃 𑌸𑌦𑌾 𑌰𑌾𑌜𑍍𑌞𑌾 𑌹𑌾𑌤𑌵𑍍𑌯𑌾 𑌵𑍍𑌯𑌸𑌨𑍋𑌦𑌯𑌾𑌃 ।
𑌪𑍍𑌰𑌾𑌯𑌶𑍋 𑌯𑍈𑌰𑍍𑌵𑌿𑌨𑌶𑍍𑌯𑌂𑌤𑌿 𑌕𑍃𑌤𑌮𑍂𑌲𑌾𑌶𑍍𑌚 𑌪𑌾𑌰𑍍𑌥𑌿𑌵𑌾𑌃 ॥ 3॥
𑌸𑍍𑌤𑍍𑌰𑌿𑌯𑍋𑌽𑌕𑍍𑌷𑌾 𑌮𑍃𑌗𑌯𑌾 𑌪𑌾𑌨𑌂 𑌵𑌾𑌕𑍍𑌪𑌾𑌰𑍁𑌷𑍍𑌯𑌂 𑌚 𑌪𑌂𑌚𑌮𑌮𑍍 ।
𑌮𑌹𑌚𑍍𑌚 𑌦𑌂𑌡𑌪𑌾𑌰𑍁𑌷𑍍𑌯𑌮𑌰𑍍𑌥𑌦𑍂𑌷𑌣𑌮𑍇𑌵 𑌚 ॥ 4॥
𑌅𑌷𑍍𑌟𑍌 𑌪𑍂𑌰𑍍𑌵𑌨𑌿𑌮𑌿𑌤𑍍𑌤𑌾𑌨𑌿 𑌨𑌰𑌸𑍍𑌯 𑌵𑌿𑌨𑌶𑌿𑌷𑍍𑌯𑌤𑌃 ।
𑌬𑍍𑌰𑌾𑌹𑍍𑌮𑌣𑌾𑌨𑍍𑌪𑍍𑌰𑌥𑌮𑌂 𑌦𑍍𑌵𑍇𑌷𑍍𑌟𑌿 𑌬𑍍𑌰𑌾𑌹𑍍𑌮𑌣𑍈𑌶𑍍𑌚 𑌵𑌿𑌰𑍁𑌧𑍍𑌯𑌤𑍇 ॥ 5॥
𑌬𑍍𑌰𑌾𑌹𑍍𑌮𑌣 𑌸𑍍𑌵𑌾𑌨𑌿 𑌚𑌾𑌦𑌤𑍍𑌤𑍇 𑌬𑍍𑌰𑌾𑌹𑍍𑌮𑌣𑌾𑌂𑌶𑍍𑌚 𑌜𑌿𑌘𑌾𑌂𑌸𑌤𑌿 ।
𑌰𑌮𑌤𑍇 𑌨𑌿𑌂𑌦𑌯𑌾 𑌚𑍈𑌷𑌾𑌂 𑌪𑍍𑌰𑌶𑌂𑌸𑌾𑌂 𑌨𑌾𑌭𑌿𑌨𑌂𑌦𑌤𑌿 ॥ 6॥
𑌨𑍈𑌤𑌾𑌨𑍍𑌸𑍍𑌮𑌰𑌤𑌿 𑌕𑍃𑌤𑍍𑌯𑍇𑌷𑍁 𑌯𑌾𑌚𑌿𑌤𑌶𑍍𑌚𑌾𑌭𑍍𑌯𑌸𑍂𑌯𑌤𑌿 ।
𑌏𑌤𑌾𑌂𑌦𑍋𑌷𑌾𑌨𑍍𑌨𑌰𑌃 𑌪𑍍𑌰𑌾𑌜𑍍𑌞𑍋 𑌬𑍁𑌦𑍍𑌧𑍍𑌯𑌾 𑌬𑍁𑌦𑍍𑌧𑍍𑌵𑌾 𑌵𑌿𑌵𑌰𑍍𑌜𑌯𑍇𑌤𑍍 ॥ ॥
𑌅𑌷𑍍𑌟𑌾𑌵𑌿𑌮𑌾𑌨𑌿 𑌹𑌰𑍍𑌷𑌸𑍍𑌯 𑌨𑌵 𑌨𑍀𑌤𑌾𑌨𑌿 𑌭𑌾𑌰𑌤 ।
𑌵𑌰𑍍𑌤𑌮𑌾𑌨𑌾𑌨𑌿 𑌦𑍃𑌶𑍍𑌯𑌂𑌤𑍇 𑌤𑌾𑌨𑍍𑌯𑍇𑌵 𑌸𑍁𑌸𑍁𑌖𑌾𑌨𑍍𑌯𑌪𑌿 ॥ ॥
𑌸𑌮𑌾𑌗𑌮𑌶𑍍𑌚 𑌸𑌖𑌿𑌭𑌿𑌰𑍍𑌮𑌹𑌾𑌂𑌶𑍍𑌚𑍈𑌵 𑌧𑌨𑌾𑌗𑌮𑌃 ।
𑌪𑍁𑌤𑍍𑌰𑍇𑌣 𑌚 𑌪𑌰𑌿𑌷𑍍𑌵𑌂𑌗𑌃 𑌸𑌨𑍍𑌨𑌿𑌪𑌾𑌤𑌶𑍍𑌚 𑌮𑍈𑌥𑍁𑌨𑍇 ॥ ॥
𑌸𑌮𑌯𑍇 𑌚 𑌪𑍍𑌰𑌿𑌯𑌾𑌲𑌾𑌪𑌃 𑌸𑍍𑌵𑌯𑍂𑌥𑍇𑌷𑍁 𑌚 𑌸𑌨𑍍𑌨𑌤𑌿𑌃 ।
𑌅𑌭𑌿𑌪𑍍𑌰𑍇𑌤𑌸𑍍𑌯 𑌲𑌾𑌭𑌶𑍍𑌚 𑌪𑍂𑌜𑌾 𑌚 𑌜𑌨𑌸𑌂𑌸𑌦𑌿 ॥ 0॥
𑌅𑌷𑍍𑌟𑍌 𑌗𑍁𑌣𑌾𑌃 𑌪𑍁𑌰𑍁𑌷𑌂 𑌦𑍀𑌪𑌯𑌂𑌤𑌿
𑌪𑍍𑌰𑌜𑍍𑌞𑌾 𑌚 𑌕𑍌𑌲𑍍𑌯𑌂 𑌚 𑌦𑌮𑌃 𑌶𑍍𑌰𑍁𑌤𑌂 𑌚 ।
𑌪𑌰𑌾𑌕𑍍𑌰𑌮𑌶𑍍𑌚𑌾𑌬𑌹𑍁𑌭𑌾𑌷𑌿𑌤𑌾 𑌚
𑌦𑌾𑌨𑌂 𑌯𑌥𑌾𑌶𑌕𑍍𑌤𑌿 𑌕𑍃𑌤𑌜𑍍𑌞𑌤𑌾 𑌚 ॥- ॥
𑌨𑌵𑌦𑍍𑌵𑌾𑌰𑌮𑌿𑌦𑌂 𑌵𑍇𑌶𑍍𑌮 𑌤𑍍𑌰𑌿𑌸𑍍𑌥𑍂𑌣𑌂 𑌪𑌂𑌚 𑌸𑌾𑌕𑍍𑌷𑌿𑌕𑌮𑍍 ।
𑌕𑍍𑌷𑍇𑌤𑍍𑌰𑌜𑍍𑌞𑌾𑌧𑌿𑌷𑍍𑌠𑌿𑌤𑌂 𑌵𑌿𑌦𑍍𑌵𑌾𑌨𑍍𑌯𑍋 𑌵𑍇𑌦 𑌸 𑌪𑌰𑌃 𑌕𑌵𑌿𑌃 ॥ 1॥
𑌦𑌶 𑌧𑌰𑍍𑌮𑌂 𑌨 𑌜𑌾𑌨𑌂𑌤𑌿 𑌧𑍃𑌤𑌰𑌾𑌷𑍍𑌟𑍍𑌰 𑌨𑌿𑌬𑍋𑌧 𑌤𑌾𑌨𑍍 ।
𑌮𑌤𑍍𑌤𑌃 𑌪𑍍𑌰𑌮𑌤𑍍𑌤 𑌉𑌨𑍍𑌮𑌤𑍍𑌤𑌃 𑌶𑍍𑌰𑌾𑌂𑌤𑌃 𑌕𑍍𑌰𑍁𑌦𑍍𑌧𑍋 𑌬𑍁𑌭𑍁𑌕𑍍𑌷𑌿𑌤𑌃 ॥ 2॥
𑌤𑍍𑌵𑌰𑌮𑌾𑌣𑌶𑍍𑌚 𑌭𑍀𑌰𑍁𑌶𑍍𑌚 𑌲𑍁𑌬𑍍𑌧𑌃 𑌕𑌾𑌮𑍀 𑌚 𑌤𑍇 𑌦𑌶 ।
𑌤𑌸𑍍𑌮𑌾𑌦𑍇𑌤𑍇𑌷𑍁 𑌭𑌾𑌵𑍇𑌷𑍁 𑌨 𑌪𑍍𑌰𑌸𑌜𑍍𑌜𑍇𑌤 𑌪𑌂𑌡𑌿𑌤𑌃 ॥ 3॥
𑌅𑌤𑍍𑌰𑍈𑌵𑍋𑌦𑌾𑌹𑌰𑌂𑌤𑍀𑌮𑌮𑌿𑌤𑌿𑌹𑌾𑌸𑌂 𑌪𑍁𑌰𑌾𑌤𑌨𑌮𑍍 ।
𑌪𑍁𑌤𑍍𑌰𑌾𑌰𑍍𑌥𑌮𑌸𑍁𑌰𑍇𑌂𑌦𑍍𑌰𑍇𑌣 𑌗𑍀𑌤𑌂 𑌚𑍈𑌵 𑌸𑍁𑌧𑌨𑍍𑌵𑌨𑌾 ॥ 4॥
𑌯𑌃 𑌕𑌾𑌮𑌮𑌨𑍍𑌯𑍂 𑌪𑍍𑌰𑌜𑌹𑌾𑌤𑌿 𑌰𑌾𑌜𑌾
𑌪𑌾𑌤𑍍𑌰𑍇 𑌪𑍍𑌰𑌤𑌿𑌷𑍍𑌠𑌾𑌪𑌯𑌤𑍇 𑌧𑌨𑌂 𑌚 ।
𑌵𑌿𑌶𑍇𑌷𑌵𑌿𑌚𑍍𑌛𑍍𑌰𑍁𑌤𑌵𑌾𑌨𑍍𑌕𑍍𑌷𑌿𑌪𑍍𑌰𑌕𑌾𑌰𑍀
𑌤𑌂 𑌸𑌰𑍍𑌵𑌲𑍋𑌕𑌃 𑌕𑍁𑌰𑍁𑌤𑍇 𑌪𑍍𑌰𑌮𑌾𑌣𑌮𑍍 ॥ 5॥
𑌜𑌾𑌨𑌾𑌤𑌿 𑌵𑌿𑌶𑍍𑌵𑌾𑌸𑌯𑌿𑌤𑍁𑌂 𑌮𑌨𑍁𑌷𑍍𑌯𑌾𑌨𑍍
𑌵𑌿𑌜𑍍𑌞𑌾𑌤 𑌦𑍋𑌷𑍇𑌷𑍁 𑌦𑌧𑌾𑌤𑌿 𑌦𑌂𑌡𑌮𑍍 ।
𑌜𑌾𑌨𑌾𑌤𑌿 𑌮𑌾𑌤𑍍𑌰𑌾𑌂 𑌚 𑌤𑌥𑌾 𑌕𑍍𑌷𑌮𑌾𑌂 𑌚
𑌤𑌂 𑌤𑌾𑌦𑍃𑌶𑌂 𑌶𑍍𑌰𑍀𑌰𑍍𑌜𑍁𑌷𑌤𑍇 𑌸𑌮𑌗𑍍𑌰𑌾 ॥ 6॥
𑌸𑍁𑌦𑍁𑌰𑍍𑌬𑌲𑌂 𑌨𑌾𑌵𑌜𑌾𑌨𑌾𑌤𑌿 𑌕𑌂𑌚𑌿𑌦𑍍-
𑌯𑍁𑌕𑍍𑌤𑍋 𑌰𑌿𑌪𑍁𑌂 𑌸𑍇𑌵𑌤𑍇 𑌬𑍁𑌦𑍍𑌧𑌿𑌪𑍂𑌰𑍍𑌵𑌮𑍍 ।
𑌨 𑌵𑌿𑌗𑍍𑌰𑌹𑌂 𑌰𑍋𑌚𑌯𑌤𑍇 𑌬𑌲𑌸𑍍𑌥𑍈𑌃
𑌕𑌾𑌲𑍇 𑌚 𑌯𑍋 𑌵𑌿𑌕𑍍𑌰𑌮𑌤𑍇 𑌸 𑌧𑍀𑌰𑌃 ॥ ॥
𑌪𑍍𑌰𑌾𑌪𑍍𑌯𑌾𑌪𑌦𑌂 𑌨 𑌵𑍍𑌯𑌥𑌤𑍇 𑌕𑌦𑌾 𑌚𑌿𑌦𑍍
𑌉𑌦𑍍𑌯𑍋𑌗𑌮𑌨𑍍𑌵𑌿𑌚𑍍𑌛𑌤𑌿 𑌚𑌾𑌪𑍍𑌰𑌮𑌤𑍍𑌤𑌃 ।
𑌦𑍁𑌃𑌖𑌂 𑌚 𑌕𑌾𑌲𑍇 𑌸𑌹𑌤𑍇 𑌜𑌿𑌤𑌾𑌤𑍍𑌮𑌾
𑌧𑍁𑌰𑌂𑌧𑌰𑌸𑍍𑌤𑌸𑍍𑌯 𑌜𑌿𑌤𑌾𑌃 𑌸𑌪𑌤𑍍𑌨𑌾𑌃 ॥ ॥
𑌅𑌨𑌰𑍍𑌥𑌕𑌂 𑌵𑌿𑌪𑍍𑌰 𑌵𑌾𑌸𑌂 𑌗𑍃𑌹𑍇𑌭𑍍𑌯𑌃
𑌪𑌾𑌪𑍈𑌃 𑌸𑌂𑌧𑌿𑌂 𑌪𑌰𑌦𑌾𑌰𑌾𑌭𑌿𑌮𑌰𑍍𑌶𑌮𑍍 ।
𑌦𑌂𑌭𑌂 𑌸𑍍𑌤𑍈𑌨𑍍𑌯𑌂 𑌪𑍈𑌶𑍁𑌨𑌂 𑌮𑌦𑍍𑌯 𑌪𑌾𑌨𑌂
𑌨 𑌸𑍇𑌵𑌤𑍇 𑌯𑌃 𑌸 𑌸𑍁𑌖𑍀 𑌸𑌦𑍈𑌵 ॥ ॥
𑌨 𑌸𑌂𑌰𑌂𑌭𑍇𑌣𑌾𑌰𑌭𑌤𑍇𑌽𑌰𑍍𑌥𑌵𑌰𑍍𑌗𑌮𑍍
𑌆𑌕𑌾𑌰𑌿𑌤𑌃 𑌶𑌂𑌸𑌤𑌿 𑌤𑌥𑍍𑌯𑌮𑍇𑌵 ।
𑌨 𑌮𑌾𑌤𑍍𑌰𑌾𑌰𑍍𑌥𑍇 𑌰𑍋𑌚𑌯𑌤𑍇 𑌵𑌿𑌵𑌾𑌦𑌂
𑌨𑌾𑌪𑍂𑌜𑌿𑌤𑌃 𑌕𑍁𑌪𑍍𑌯𑌤𑌿 𑌚𑌾𑌪𑍍𑌯𑌮𑍂𑌢𑌃 ॥ 0॥
𑌨 𑌯𑍋𑌽𑌭𑍍𑌯𑌸𑍂𑌯𑌤𑍍𑌯𑌨𑍁𑌕𑌂𑌪𑌤𑍇 𑌚
𑌨 𑌦𑍁𑌰𑍍𑌬𑌲𑌃 𑌪𑍍𑌰𑌾𑌤𑌿𑌭𑌾𑌵𑍍𑌯𑌂 𑌕𑌰𑍋𑌤𑌿 ।
𑌨𑌾𑌤𑍍𑌯𑌾𑌹 𑌕𑌿𑌂 𑌚𑌿𑌤𑍍𑌕𑍍𑌷𑌮𑌤𑍇 𑌵𑌿𑌵𑌾𑌦𑌂
𑌸𑌰𑍍𑌵𑌤𑍍𑌰 𑌤𑌾𑌦𑍃𑌗𑍍𑌲𑌭𑌤𑍇 𑌪𑍍𑌰𑌶𑌂𑌸𑌾𑌮𑍍 ॥ 1॥
𑌯𑍋 𑌨𑍋𑌦𑍍𑌧𑌤𑌂 𑌕𑍁𑌰𑍁𑌤𑍇 𑌜𑌾𑌤𑍁 𑌵𑍇𑌷𑌂
𑌨 𑌪𑍌𑌰𑍁𑌷𑍇𑌣𑌾𑌪𑌿 𑌵𑌿𑌕𑌤𑍍𑌥𑌤𑍇𑌽𑌨𑍍𑌯𑌾𑌨𑍍 ।
𑌨 𑌮𑍂𑌰𑍍𑌚𑍍𑌛𑌿𑌤𑌃 𑌕𑌟𑍁𑌕𑌾𑌨𑍍𑌯𑌾𑌹 𑌕𑌿𑌂 𑌚𑌿𑌤𑍍
𑌪𑍍𑌰𑌿𑌯𑌂 𑌸𑌦𑌾 𑌤𑌂 𑌕𑍁𑌰𑍁𑌤𑍇 𑌜𑌨𑍋𑌽𑌪𑌿 ॥ 2॥
𑌨 𑌵𑍈𑌰𑌮𑍁𑌦𑍍𑌦𑍀𑌪𑌯𑌤𑌿 𑌪𑍍𑌰𑌶𑌾𑌂𑌤𑌂
𑌨 𑌦𑌰𑍍𑌮𑌮𑌾𑌰𑍋𑌹𑌤𑌿 𑌨𑌾𑌸𑍍𑌤𑌮𑍇𑌤𑌿 ।
𑌨 𑌦𑍁𑌰𑍍𑌗𑌤𑍋𑌽𑌸𑍍𑌮𑍀𑌤𑌿 𑌕𑌰𑍋𑌤𑌿 𑌮𑌨𑍍𑌯𑍁𑌂
𑌤𑌮𑌾𑌰𑍍𑌯 𑌶𑍀𑌲𑌂 𑌪𑌰𑌮𑌾𑌹𑍁𑌰𑌗𑍍𑌰𑍍𑌯𑌮𑍍 ॥ 3॥
𑌨 𑌸𑍍𑌵𑍇 𑌸𑍁𑌖𑍇 𑌵𑍈 𑌕𑍁𑌰𑍁𑌤𑍇 𑌪𑍍𑌰𑌹𑌰𑍍𑌷𑌂
𑌨𑌾𑌨𑍍𑌯𑌸𑍍𑌯 𑌦𑍁𑌃𑌖𑍇 𑌭𑌵𑌤𑌿 𑌪𑍍𑌰𑌤𑍀𑌤𑌃 ।
𑌦𑌤𑍍𑌤𑍍𑌵𑌾 𑌨 𑌪𑌶𑍍𑌚𑌾𑌤𑍍𑌕𑍁𑌰𑍁𑌤𑍇𑌽𑌨𑍁𑌤𑌾𑌪𑌂
𑌨 𑌕𑌤𑍍𑌥𑌤𑍇 𑌸𑌤𑍍𑌪𑍁𑌰𑍁𑌷𑌾𑌰𑍍𑌯 𑌶𑍀𑌲𑌃 ॥ 4॥
𑌦𑍇𑌶𑌾𑌚𑌾𑌰𑌾𑌨𑍍𑌸𑌮𑌯𑌾𑌂𑌜𑌾𑌤𑌿𑌧𑌰𑍍𑌮𑌾𑌨𑍍
𑌬𑍁𑌭𑍂𑌷𑌤𑍇 𑌯𑌸𑍍𑌤𑍁 𑌪𑌰𑌾𑌵𑌰𑌜𑍍𑌞𑌃 ।
𑌸 𑌤𑌤𑍍𑌰 𑌤𑌤𑍍𑌰𑌾𑌧𑌿𑌗𑌤𑌃 𑌸𑌦𑍈𑌵
𑌮𑌹𑌾𑌜𑌨𑌸𑍍𑌯𑌾𑌧𑌿𑌪𑌤𑍍𑌯𑌂 𑌕𑌰𑍋𑌤𑌿 ॥ 5॥
𑌦𑌂𑌭𑌂 𑌮𑍋𑌹𑌂 𑌮𑌤𑍍𑌸𑌰𑌂 𑌪𑌾𑌪𑌕𑍃𑌤𑍍𑌯𑌂
𑌰𑌾𑌜𑌦𑍍𑌵𑌿𑌷𑍍𑌟𑌂 𑌪𑍈𑌶𑍁𑌨𑌂 𑌪𑍂𑌗𑌵𑍈𑌰𑌮𑍍 ।
𑌮𑌤𑍍𑌤𑍋𑌨𑍍𑌮𑌤𑍍𑌤𑍈𑌰𑍍𑌦𑍁𑌰𑍍𑌜𑌨𑍈𑌶𑍍𑌚𑌾𑌪𑌿 𑌵𑌾𑌦𑌂
𑌯𑌃 𑌪𑍍𑌰𑌜𑍍𑌞𑌾𑌵𑌾𑌨𑍍𑌵𑌰𑍍𑌜𑌯𑍇𑌤𑍍𑌸 𑌪𑍍𑌰𑌧𑌾𑌨𑌃 ॥ 6॥
𑌦𑌮𑌂 𑌶𑍌𑌚𑌂 𑌦𑍈𑌵𑌤𑌂 𑌮𑌂𑌗𑌲𑌾𑌨𑌿
𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌂 𑌵𑌿𑌵𑌿𑌧𑌾𑌁𑌲𑍍𑌲𑍋𑌕𑌵𑌾𑌦𑌾𑌨𑍍 ।
𑌏𑌤𑌾𑌨𑌿 𑌯𑌃 𑌕𑍁𑌰𑍁𑌤𑍇 𑌨𑍈𑌤𑍍𑌯𑌕𑌾𑌨𑌿
𑌤𑌸𑍍𑌯𑍋𑌤𑍍𑌥𑌾𑌨𑌂 𑌦𑍇𑌵𑌤𑌾 𑌰𑌾𑌧𑌯𑌂𑌤𑌿 ॥ ॥
𑌸𑌮𑍈𑌰𑍍𑌵𑌿𑌵𑌾𑌹𑌂 𑌕𑍁𑌰𑍁𑌤𑍇 𑌨 𑌹𑍀𑌨𑍈𑌃
𑌸𑌮𑍈𑌃 𑌸𑌖𑍍𑌯𑌂 𑌵𑍍𑌯𑌵𑌹𑌾𑌰𑌂 𑌕𑌥𑌾𑌶𑍍𑌚 ।
𑌗𑍁𑌣𑍈𑌰𑍍𑌵𑌿𑌶𑌿𑌷𑍍𑌟𑌾𑌂𑌶𑍍𑌚 𑌪𑍁𑌰𑍋 𑌦𑌧𑌾𑌤𑌿
𑌵𑌿𑌪𑌶𑍍𑌚𑌿𑌤𑌸𑍍𑌤𑌸𑍍𑌯 𑌨𑌯𑌾𑌃 𑌸𑍁𑌨𑍀𑌤𑌾𑌃 ॥ ॥
𑌮𑌿𑌤𑌂 𑌭𑍁𑌂𑌕𑍍𑌤𑍇 𑌸𑌂𑌵𑌿𑌭𑌜𑍍𑌯𑌾𑌶𑍍𑌰𑌿𑌤𑍇𑌭𑍍𑌯𑍋
𑌮𑌿𑌤𑌂 𑌸𑍍𑌵𑌪𑌿𑌤𑍍𑌯𑌮𑌿𑌤𑌂 𑌕𑌰𑍍𑌮𑌕𑍃𑌤𑍍𑌵𑌾 ।
𑌦𑌦𑌾𑌤𑍍𑌯𑌮𑌿𑌤𑍍𑌰𑍇𑌷𑍍𑌵𑌪𑌿 𑌯𑌾𑌚𑌿𑌤𑌃 𑌸𑌂-
𑌸𑍍𑌤𑌮𑌾𑌤𑍍𑌮𑌵𑌂𑌤𑌂 𑌪𑍍𑌰𑌜𑌹𑌾𑌤𑍍𑌯𑌨𑌰𑍍𑌥𑌾𑌃 ॥ ॥
𑌚𑌿𑌕𑍀𑌰𑍍𑌷𑌿𑌤𑌂 𑌵𑌿𑌪𑍍𑌰𑌕𑍃𑌤𑌂 𑌚 𑌯𑌸𑍍𑌯
𑌨𑌾𑌨𑍍𑌯𑍇 𑌜𑌨𑌾𑌃 𑌕𑌰𑍍𑌮 𑌜𑌾𑌨𑌂𑌤𑌿 𑌕𑌿𑌂 𑌚𑌿𑌤𑍍 ।
𑌮𑌂𑌤𑍍𑌰𑍇 𑌗𑍁𑌪𑍍𑌤𑍇 𑌸𑌮𑍍𑌯𑌗𑌨𑍁𑌷𑍍𑌠𑌿𑌤𑍇 𑌚
𑌸𑍍𑌵𑌲𑍍𑌪𑍋 𑌨𑌾𑌸𑍍𑌯 𑌵𑍍𑌯𑌥𑌤𑍇 𑌕𑌶𑍍𑌚𑌿𑌦𑌰𑍍𑌥𑌃 ॥ 100॥
𑌯𑌃 𑌸𑌰𑍍𑌵𑌭𑍂𑌤𑌪𑍍𑌰𑌶𑌮𑍇 𑌨𑌿𑌵𑌿𑌷𑍍𑌟𑌃
𑌸𑌤𑍍𑌯𑍋 𑌮𑍃𑌦𑍁𑌰𑍍𑌦𑌾𑌨𑌕𑍃𑌚𑍍𑌛𑍁𑌦𑍍𑌧 𑌭𑌾𑌵𑌃 ।
𑌅𑌤𑍀𑌵 𑌸𑌂𑌜𑍍𑌞𑌾𑌯𑌤𑍇 𑌜𑍍𑌞𑌾𑌤𑌿𑌮𑌧𑍍𑌯𑍇
𑌮𑌹𑌾𑌮𑌣𑌿𑌰𑍍𑌜𑌾𑌤𑍍𑌯 𑌇𑌵 𑌪𑍍𑌰𑌸𑌨𑍍𑌨𑌃 ॥ 101॥
𑌯 𑌆𑌤𑍍𑌮𑌨𑌾𑌪𑌤𑍍𑌰𑌪𑌤𑍇 𑌭𑍃𑌶𑌂 𑌨𑌰𑌃
𑌸 𑌸𑌰𑍍𑌵𑌲𑍋𑌕𑌸𑍍𑌯 𑌗𑍁𑌰𑍁𑌰𑍍𑌭𑌵𑌤𑍍𑌯𑍁𑌤 ।
𑌅𑌨𑌂𑌤 𑌤𑍇𑌜𑌾𑌃 𑌸𑍁𑌮𑌨𑌾𑌃 𑌸𑌮𑌾𑌹𑌿𑌤𑌃
𑌸𑍍𑌵𑌤𑍇𑌜𑌸𑌾 𑌸𑍂𑌰𑍍𑌯 𑌇𑌵𑌾𑌵𑌭𑌾𑌸𑌤𑍇 ॥ 102॥
𑌵𑌨𑍇 𑌜𑌾𑌤𑌾𑌃 𑌶𑌾𑌪𑌦𑌗𑍍𑌧𑌸𑍍𑌯 𑌰𑌾𑌜𑍍𑌞𑌃
𑌪𑌾𑌂𑌡𑍋𑌃 𑌪𑍁𑌤𑍍𑌰𑌾𑌃 𑌪𑌂𑌚 𑌪𑌂𑌚𑍇𑌂𑌦𑍍𑌰 𑌕𑌲𑍍𑌪𑌾𑌃 ।
𑌤𑍍𑌵𑌯𑍈𑌵 𑌬𑌾𑌲𑌾 𑌵𑌰𑍍𑌧𑌿𑌤𑌾𑌃 𑌶𑌿𑌕𑍍𑌷𑌿𑌤𑌾𑌶𑍍𑌚
𑌤𑌵𑌾𑌦𑍇𑌶𑌂 𑌪𑌾𑌲𑌯𑌂𑌤𑍍𑌯𑌾𑌂𑌬𑌿𑌕𑍇𑌯 ॥ 103॥
𑌪𑍍𑌰𑌦𑌾𑌯𑍈𑌷𑌾𑌮𑍁𑌚𑌿𑌤𑌂 𑌤𑌾𑌤 𑌰𑌾𑌜𑍍𑌯𑌂
𑌸𑍁𑌖𑍀 𑌪𑍁𑌤𑍍𑌰𑍈𑌃 𑌸𑌹𑌿𑌤𑍋 𑌮𑍋𑌦𑌮𑌾𑌨𑌃 ।
𑌨 𑌦𑍇𑌵𑌾𑌨𑌾𑌂 𑌨𑌾𑌪𑌿 𑌚 𑌮𑌾𑌨𑍁𑌷𑌾𑌣𑌾𑌂
𑌭𑌵𑌿𑌷𑍍𑌯𑌸𑌿 𑌤𑍍𑌵𑌂 𑌤𑌰𑍍𑌕𑌣𑍀𑌯𑍋 𑌨𑌰𑍇𑌂𑌦𑍍𑌰 ॥ 104॥
॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿
𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥ 33 ॥
