𑌅𑌷𑍍𑌟𑌾𑌵𑌕𑍍𑌰 𑌉𑌵𑌾𑌚 ॥
𑌯𑌥𑌾𑌤𑌥𑍋𑌪𑌦𑍇𑌶𑍇𑌨 𑌕𑍃𑌤𑌾𑌰𑍍𑌥𑌃 𑌸𑌤𑍍𑌤𑍍𑌵𑌬𑍁𑌦𑍍𑌧𑌿𑌮𑌾𑌨𑍍 ।
𑌆𑌜𑍀𑌵𑌮𑌪𑌿 𑌜𑌿𑌜𑍍𑌞𑌾𑌸𑍁𑌃 𑌪𑌰𑌸𑍍𑌤𑌤𑍍𑌰 𑌵𑌿𑌮𑍁𑌹𑍍𑌯𑌤𑌿 ॥ 15-1॥
𑌮𑍋𑌕𑍍𑌷𑍋 𑌵𑌿𑌷𑌯𑌵𑍈𑌰𑌸𑍍𑌯𑌂 𑌬𑌂𑌧𑍋 𑌵𑍈𑌷𑌯𑌿𑌕𑍋 𑌰𑌸𑌃 ।
𑌏𑌤𑌾𑌵𑌦𑍇𑌵 𑌵𑌿𑌜𑍍𑌞𑌾𑌨𑌂 𑌯𑌥𑍇𑌚𑍍𑌛𑌸𑌿 𑌤𑌥𑌾 𑌕𑍁𑌰𑍁 ॥ 15-2॥
𑌵𑌾𑌗𑍍𑌮𑌿𑌪𑍍𑌰𑌾𑌜𑍍𑌞𑌾𑌮𑌹𑍋𑌦𑍍𑌯𑍋𑌗𑌂 𑌜𑌨𑌂 𑌮𑍂𑌕𑌜𑌡𑌾𑌲𑌸𑌮𑍍 ।
𑌕𑌰𑍋𑌤𑌿 𑌤𑌤𑍍𑌤𑍍𑌵𑌬𑍋𑌧𑍋𑌽𑌯𑌮𑌤𑌸𑍍𑌤𑍍𑌯𑌕𑍍𑌤𑍋 𑌬𑍁𑌭𑍁𑌕𑍍𑌷𑌭𑌿𑌃 ॥ 15-3॥
𑌨 𑌤𑍍𑌵𑌂 𑌦𑍇𑌹𑍋 𑌨 𑌤𑍇 𑌦𑍇𑌹𑍋 𑌭𑍋𑌕𑍍𑌤𑌾 𑌕𑌰𑍍𑌤𑌾 𑌨 𑌵𑌾 𑌭𑌵𑌾𑌨𑍍 ।
𑌚𑌿𑌦𑍍𑌰𑍂𑌪𑍋𑌽𑌸𑌿 𑌸𑌦𑌾 𑌸𑌾𑌕𑍍𑌷𑍀 𑌨𑌿𑌰𑌪𑍇𑌕𑍍𑌷𑌃 𑌸𑍁𑌖𑌂 𑌚𑌰 ॥ 15-4॥
𑌰𑌾𑌗𑌦𑍍𑌵𑍇𑌷𑍌 𑌮𑌨𑍋𑌧𑌰𑍍𑌮𑍌 𑌨 𑌮𑌨𑌸𑍍𑌤𑍇 𑌕𑌦𑌾𑌚𑌨 ।
𑌨𑌿𑌰𑍍𑌵𑌿𑌕𑌲𑍍𑌪𑍋𑌽𑌸𑌿 𑌬𑍋𑌧𑌾𑌤𑍍𑌮𑌾 𑌨𑌿𑌰𑍍𑌵𑌿𑌕𑌾𑌰𑌃 𑌸𑍁𑌖𑌂 𑌚𑌰 ॥ 15-5॥
𑌸𑌰𑍍𑌵𑌭𑍂𑌤𑍇𑌷𑍁 𑌚𑌾𑌤𑍍𑌮𑌾𑌨𑌂 𑌸𑌰𑍍𑌵𑌭𑍂𑌤𑌾𑌨𑌿 𑌚𑌾𑌤𑍍𑌮𑌨𑌿 ।
𑌵𑌿𑌜𑍍𑌞𑌾𑌯 𑌨𑌿𑌰𑌹𑌂𑌕𑌾𑌰𑍋 𑌨𑌿𑌰𑍍𑌮𑌮𑌸𑍍𑌤𑍍𑌵𑌂 𑌸𑍁𑌖𑍀 𑌭𑌵 ॥ 15-6॥
𑌵𑌿𑌶𑍍𑌵𑌂 𑌸𑍍𑌫𑍁𑌰𑌤𑌿 𑌯𑌤𑍍𑌰𑍇𑌦𑌂 𑌤𑌰𑌂𑌗𑌾 𑌇𑌵 𑌸𑌾𑌗𑌰𑍇 ।
𑌤𑌤𑍍𑌤𑍍𑌵𑌮𑍇𑌵 𑌨 𑌸𑌂𑌦𑍇𑌹𑌶𑍍𑌚𑌿𑌨𑍍𑌮𑍂𑌰𑍍𑌤𑍇 𑌵𑌿𑌜𑍍𑌵𑌰𑍋 𑌭𑌵 ॥ 15-॥
𑌶𑍍𑌰𑌦𑍍𑌧𑌸𑍍𑌵 𑌤𑌾𑌤 𑌶𑍍𑌰𑌦𑍍𑌧𑌸𑍍𑌵 𑌨𑌾𑌤𑍍𑌰 𑌮𑍋𑌹𑌂 𑌕𑍁𑌰𑍁𑌷𑍍𑌵 𑌭𑍋𑌃 ।
𑌜𑍍𑌞𑌾𑌨𑌸𑍍𑌵𑌰𑍂𑌪𑍋 𑌭𑌗𑌵𑌾𑌨𑌾𑌤𑍍𑌮𑌾 𑌤𑍍𑌵𑌂 𑌪𑍍𑌰𑌕𑍃𑌤𑍇𑌃 𑌪𑌰𑌃 ॥ 15-॥
𑌗𑍁𑌣𑍈𑌃 𑌸𑌂𑌵𑍇𑌷𑍍𑌟𑌿𑌤𑍋 𑌦𑍇𑌹𑌸𑍍𑌤𑌿𑌷𑍍𑌠𑌤𑍍𑌯𑌾𑌯𑌾𑌤𑌿 𑌯𑌾𑌤𑌿 𑌚 ।
𑌆𑌤𑍍𑌮𑌾 𑌨 𑌗𑌂𑌤𑌾 𑌨𑌾𑌗𑌂𑌤𑌾 𑌕𑌿𑌮𑍇𑌨𑌮𑌨𑍁𑌶𑍋𑌚𑌸𑌿 ॥ 15-॥
𑌦𑍇𑌹𑌸𑍍𑌤𑌿𑌷𑍍𑌠𑌤𑍁 𑌕𑌲𑍍𑌪𑌾𑌂𑌤𑌂 𑌗𑌚𑍍𑌛𑌤𑍍𑌵𑌦𑍍𑌯𑍈𑌵 𑌵𑌾 𑌪𑍁𑌨𑌃 ।
𑌕𑍍𑌵 𑌵𑍃𑌦𑍍𑌧𑌿𑌃 𑌕𑍍𑌵 𑌚 𑌵𑌾 𑌹𑌾𑌨𑌿𑌸𑍍𑌤𑌵 𑌚𑌿𑌨𑍍𑌮𑌾𑌤𑍍𑌰𑌰𑍂𑌪𑌿𑌣𑌃 ॥ 15-10॥
𑌤𑍍𑌵𑌯𑍍𑌯𑌨𑌂𑌤𑌮𑌹𑌾𑌂𑌭𑍋𑌧𑍌 𑌵𑌿𑌶𑍍𑌵𑌵𑍀𑌚𑌿𑌃 𑌸𑍍𑌵𑌭𑌾𑌵𑌤𑌃 ।
𑌉𑌦𑍇𑌤𑍁 𑌵𑌾𑌸𑍍𑌤𑌮𑌾𑌯𑌾𑌤𑍁 𑌨 𑌤𑍇 𑌵𑍃𑌦𑍍𑌧𑌿𑌰𑍍𑌨 𑌵𑌾 𑌕𑍍𑌷𑌤𑌿𑌃 ॥ 15-11॥
𑌤𑌾𑌤 𑌚𑌿𑌨𑍍𑌮𑌾𑌤𑍍𑌰𑌰𑍂𑌪𑍋𑌽𑌸𑌿 𑌨 𑌤𑍇 𑌭𑌿𑌨𑍍𑌨𑌮𑌿𑌦𑌂 𑌜𑌗𑌤𑍍 ।
𑌅𑌤𑌃 𑌕𑌸𑍍𑌯 𑌕𑌥𑌂 𑌕𑍁𑌤𑍍𑌰 𑌹𑍇𑌯𑍋𑌪𑌾𑌦𑍇𑌯𑌕𑌲𑍍𑌪𑌨𑌾 ॥ 15-12॥
𑌏𑌕𑌸𑍍𑌮𑌿𑌨𑍍𑌨𑌵𑍍𑌯𑌯𑍇 𑌶𑌾𑌂𑌤𑍇 𑌚𑌿𑌦𑌾𑌕𑌾𑌶𑍇𑌽𑌮𑌲𑍇 𑌤𑍍𑌵𑌯𑌿 ।
𑌕𑍁𑌤𑍋 𑌜𑌨𑍍𑌮 𑌕𑍁𑌤𑍋 𑌕𑌰𑍍𑌮 𑌕𑍁𑌤𑍋𑌽𑌹𑌂𑌕𑌾𑌰 𑌏𑌵 𑌚 ॥ 15-13॥
𑌯𑌤𑍍𑌤𑍍𑌵𑌂 𑌪𑌶𑍍𑌯𑌸𑌿 𑌤𑌤𑍍𑌰𑍈𑌕𑌸𑍍𑌤𑍍𑌵𑌮𑍇𑌵 𑌪𑍍𑌰𑌤𑌿𑌭𑌾𑌸𑌸𑍇 ।
𑌕𑌿𑌂 𑌪𑍃𑌥𑌕𑍍 𑌭𑌾𑌸𑌤𑍇 𑌸𑍍𑌵𑌰𑍍𑌣𑌾𑌤𑍍 𑌕𑌟𑌕𑌾𑌂𑌗𑌦𑌨𑍂𑌪𑍁𑌰𑌮𑍍 ॥ 15-14॥
𑌅𑌯𑌂 𑌸𑍋𑌽𑌹𑌮𑌯𑌂 𑌨𑌾𑌹𑌂 𑌵𑌿𑌭𑌾𑌗𑌮𑌿𑌤𑌿 𑌸𑌂𑌤𑍍𑌯𑌜 ।
𑌸𑌰𑍍𑌵𑌮𑌾𑌤𑍍𑌮𑍇𑌤𑌿 𑌨𑌿𑌶𑍍𑌚𑌿𑌤𑍍𑌯 𑌨𑌿𑌃𑌸𑌂𑌕𑌲𑍍𑌪𑌃 𑌸𑍁𑌖𑍀 𑌭𑌵 ॥ 15-15॥
𑌤𑌵𑍈𑌵𑌾𑌜𑍍𑌞𑌾𑌨𑌤𑍋 𑌵𑌿𑌶𑍍𑌵𑌂 𑌤𑍍𑌵𑌮𑍇𑌕𑌃 𑌪𑌰𑌮𑌾𑌰𑍍𑌥𑌤𑌃 ।
𑌤𑍍𑌵𑌤𑍍𑌤𑍋𑌽𑌨𑍍𑌯𑍋 𑌨𑌾𑌸𑍍𑌤𑌿 𑌸𑌂𑌸𑌾𑌰𑍀 𑌨𑌾𑌸𑌂𑌸𑌾𑌰𑍀 𑌚 𑌕𑌶𑍍𑌚𑌨 ॥ 15-16॥
𑌭𑍍𑌰𑌾𑌂𑌤𑌿𑌮𑌾𑌤𑍍𑌰𑌮𑌿𑌦𑌂 𑌵𑌿𑌶𑍍𑌵𑌂 𑌨 𑌕𑌿𑌂𑌚𑌿𑌦𑌿𑌤𑌿 𑌨𑌿𑌶𑍍𑌚𑌯𑍀 ।
𑌨𑌿𑌰𑍍𑌵𑌾𑌸𑌨𑌃 𑌸𑍍𑌫𑍂𑌰𑍍𑌤𑌿𑌮𑌾𑌤𑍍𑌰𑍋 𑌨 𑌕𑌿𑌂𑌚𑌿𑌦𑌿𑌵 𑌶𑌾𑌮𑍍𑌯𑌤𑌿 ॥ 15-1॥
𑌏𑌕 𑌏𑌵 𑌭𑌵𑌾𑌂𑌭𑍋𑌧𑌾𑌵𑌾𑌸𑍀𑌦𑌸𑍍𑌤𑌿 𑌭𑌵𑌿𑌷𑍍𑌯𑌤𑌿 ।
𑌨 𑌤𑍇 𑌬𑌂𑌧𑍋𑌽𑌸𑍍𑌤𑌿 𑌮𑍋𑌕𑍍𑌷𑍋 𑌵𑌾 𑌕𑍃𑌤𑌕𑍃𑌤𑍍𑌯𑌃 𑌸𑍁𑌖𑌂 𑌚𑌰 ॥ 15-1॥
𑌮𑌾 𑌸𑌂𑌕𑌲𑍍𑌪𑌵𑌿𑌕𑌲𑍍𑌪𑌾𑌭𑍍𑌯𑌾𑌂 𑌚𑌿𑌤𑍍𑌤𑌂 𑌕𑍍𑌷𑍋𑌭𑌯 𑌚𑌿𑌨𑍍𑌮𑌯 ।
𑌉𑌪𑌶𑌾𑌮𑍍𑌯 𑌸𑍁𑌖𑌂 𑌤𑌿𑌷𑍍𑌠 𑌸𑍍𑌵𑌾𑌤𑍍𑌮𑌨𑍍𑌯𑌾𑌨𑌂𑌦𑌵𑌿𑌗𑍍𑌰𑌹𑍇 ॥ 15-1॥
𑌤𑍍𑌯𑌜𑍈𑌵 𑌧𑍍𑌯𑌾𑌨𑌂 𑌸𑌰𑍍𑌵𑌤𑍍𑌰 𑌮𑌾 𑌕𑌿𑌂𑌚𑌿𑌦𑍍 𑌹𑍃𑌦𑌿 𑌧𑌾𑌰𑌯 ।
𑌆𑌤𑍍𑌮𑌾 𑌤𑍍𑌵𑌂 𑌮𑍁𑌕𑍍𑌤 𑌏𑌵𑌾𑌸𑌿 𑌕𑌿𑌂 𑌵𑌿𑌮𑍃𑌶𑍍𑌯 𑌕𑌰𑌿𑌷𑍍𑌯𑌸𑌿 ॥ 15-20॥
