𑌜𑌨𑌕 𑌉𑌵𑌾𑌚 ॥
𑌕𑍍𑌵 𑌭𑍂𑌤𑌾𑌨𑌿 𑌕𑍍𑌵 𑌦𑍇𑌹𑍋 𑌵𑌾 𑌕𑍍𑌵𑍇𑌂𑌦𑍍𑌰𑌿𑌯𑌾𑌣𑌿 𑌕𑍍𑌵 𑌵𑌾 𑌮𑌨𑌃 ।
𑌕𑍍𑌵 𑌶𑍂𑌨𑍍𑌯𑌂 𑌕𑍍𑌵 𑌚 𑌨𑍈𑌰𑌾𑌶𑍍𑌯𑌂 𑌮𑌤𑍍𑌸𑍍𑌵𑌰𑍂𑌪𑍇 𑌨𑌿𑌰𑌂𑌜𑌨𑍇 ॥ 20-1॥
𑌕𑍍𑌵 𑌶𑌾𑌸𑍍𑌤𑍍𑌰𑌂 𑌕𑍍𑌵𑌾𑌤𑍍𑌮𑌵𑌿𑌜𑍍𑌞𑌾𑌨𑌂 𑌕𑍍𑌵 𑌵𑌾 𑌨𑌿𑌰𑍍𑌵𑌿𑌷𑌯𑌂 𑌮𑌨𑌃 ।
𑌕𑍍𑌵 𑌤𑍃𑌪𑍍𑌤𑌿𑌃 𑌕𑍍𑌵 𑌵𑌿𑌤𑍃𑌷𑍍𑌣𑌾𑌤𑍍𑌵𑌂 𑌗𑌤𑌦𑍍𑌵𑌂𑌦𑍍𑌵𑌸𑍍𑌯 𑌮𑍇 𑌸𑌦𑌾 ॥ 20-2॥
𑌕𑍍𑌵 𑌵𑌿𑌦𑍍𑌯𑌾 𑌕𑍍𑌵 𑌚 𑌵𑌾𑌵𑌿𑌦𑍍𑌯𑌾 𑌕𑍍𑌵𑌾𑌹𑌂 𑌕𑍍𑌵𑍇𑌦𑌂 𑌮𑌮 𑌕𑍍𑌵 𑌵𑌾 ।
𑌕𑍍𑌵 𑌬𑌂𑌧 𑌕𑍍𑌵 𑌚 𑌵𑌾 𑌮𑍋𑌕𑍍𑌷𑌃 𑌸𑍍𑌵𑌰𑍂𑌪𑌸𑍍𑌯 𑌕𑍍𑌵 𑌰𑍂𑌪𑌿𑌤𑌾 ॥ 20-3॥
𑌕𑍍𑌵 𑌪𑍍𑌰𑌾𑌰𑌬𑍍𑌧𑌾𑌨𑌿 𑌕𑌰𑍍𑌮𑌾𑌣𑌿 𑌜𑍀𑌵𑌨𑍍𑌮𑍁𑌕𑍍𑌤𑌿𑌰𑌪𑌿 𑌕𑍍𑌵 𑌵𑌾 ।
𑌕𑍍𑌵 𑌤𑌦𑍍 𑌵𑌿𑌦𑍇𑌹𑌕𑍈𑌵𑌲𑍍𑌯𑌂 𑌨𑌿𑌰𑍍𑌵𑌿𑌶𑍇𑌷𑌸𑍍𑌯 𑌸𑌰𑍍𑌵𑌦𑌾 ॥ 20-4॥
𑌕𑍍𑌵 𑌕𑌰𑍍𑌤𑌾 𑌕𑍍𑌵 𑌚 𑌵𑌾 𑌭𑍋𑌕𑍍𑌤𑌾 𑌨𑌿𑌷𑍍𑌕𑍍𑌰𑌿𑌯𑌂 𑌸𑍍𑌫𑍁𑌰𑌣𑌂 𑌕𑍍𑌵 𑌵𑌾 ।
𑌕𑍍𑌵𑌾𑌪𑌰𑍋𑌕𑍍𑌷𑌂 𑌫𑌲𑌂 𑌵𑌾 𑌕𑍍𑌵 𑌨𑌿𑌃𑌸𑍍𑌵𑌭𑌾𑌵𑌸𑍍𑌯 𑌮𑍇 𑌸𑌦𑌾 ॥ 20-5॥
𑌕𑍍𑌵 𑌲𑍋𑌕𑌂 𑌕𑍍𑌵 𑌮𑍁𑌮𑍁𑌕𑍍𑌷𑍁𑌰𑍍𑌵𑌾 𑌕𑍍𑌵 𑌯𑍋𑌗𑍀 𑌜𑍍𑌞𑌾𑌨𑌵𑌾𑌨𑍍 𑌕𑍍𑌵 𑌵𑌾 ।
𑌕𑍍𑌵 𑌬𑌦𑍍𑌧𑌃 𑌕𑍍𑌵 𑌚 𑌵𑌾 𑌮𑍁𑌕𑍍𑌤𑌃 𑌸𑍍𑌵𑌸𑍍𑌵𑌰𑍂𑌪𑍇𑌽𑌹𑌮𑌦𑍍𑌵𑌯𑍇 ॥ 20-6॥
𑌕𑍍𑌵 𑌸𑍃𑌷𑍍𑌟𑌿𑌃 𑌕𑍍𑌵 𑌚 𑌸𑌂𑌹𑌾𑌰𑌃 𑌕𑍍𑌵 𑌸𑌾𑌧𑍍𑌯𑌂 𑌕𑍍𑌵 𑌚 𑌸𑌾𑌧𑌨𑌮𑍍 ।
𑌕𑍍𑌵 𑌸𑌾𑌧𑌕𑌃 𑌕𑍍𑌵 𑌸𑌿𑌦𑍍𑌧𑌿𑌰𑍍𑌵𑌾 𑌸𑍍𑌵𑌸𑍍𑌵𑌰𑍂𑌪𑍇𑌽𑌹𑌮𑌦𑍍𑌵𑌯𑍇 ॥ 20-॥
𑌕𑍍𑌵 𑌪𑍍𑌰𑌮𑌾𑌤𑌾 𑌪𑍍𑌰𑌮𑌾𑌣𑌂 𑌵𑌾 𑌕𑍍𑌵 𑌪𑍍𑌰𑌮𑍇𑌯𑌂 𑌕𑍍𑌵 𑌚 𑌪𑍍𑌰𑌮𑌾 ।
𑌕𑍍𑌵 𑌕𑌿𑌂𑌚𑌿𑌤𑍍 𑌕𑍍𑌵 𑌨 𑌕𑌿𑌂𑌚𑌿𑌦𑍍 𑌵𑌾 𑌸𑌰𑍍𑌵𑌦𑌾 𑌵𑌿𑌮𑌲𑌸𑍍𑌯 𑌮𑍇 ॥ 20-॥
𑌕𑍍𑌵 𑌵𑌿𑌕𑍍𑌷𑍇𑌪𑌃 𑌕𑍍𑌵 𑌚𑍈𑌕𑌾𑌗𑍍𑌰𑍍𑌯𑌂 𑌕𑍍𑌵 𑌨𑌿𑌰𑍍𑌬𑍋𑌧𑌃 𑌕𑍍𑌵 𑌮𑍂𑌢𑌤𑌾 ।
𑌕𑍍𑌵 𑌹𑌰𑍍𑌷𑌃 𑌕𑍍𑌵 𑌵𑌿𑌷𑌾𑌦𑍋 𑌵𑌾 𑌸𑌰𑍍𑌵𑌦𑌾 𑌨𑌿𑌷𑍍𑌕𑍍𑌰𑌿𑌯𑌸𑍍𑌯 𑌮𑍇 ॥ 20-॥
𑌕𑍍𑌵 𑌚𑍈𑌷 𑌵𑍍𑌯𑌵𑌹𑌾𑌰𑍋 𑌵𑌾 𑌕𑍍𑌵 𑌚 𑌸𑌾 𑌪𑌰𑌮𑌾𑌰𑍍𑌥𑌤𑌾 ।
𑌕𑍍𑌵 𑌸𑍁𑌖𑌂 𑌕𑍍𑌵 𑌚 𑌵𑌾 𑌦𑍁𑌖𑌂 𑌨𑌿𑌰𑍍𑌵𑌿𑌮𑌰𑍍𑌶𑌸𑍍𑌯 𑌮𑍇 𑌸𑌦𑌾 ॥ 20-10॥
𑌕𑍍𑌵 𑌮𑌾𑌯𑌾 𑌕𑍍𑌵 𑌚 𑌸𑌂𑌸𑌾𑌰𑌃 𑌕𑍍𑌵 𑌪𑍍𑌰𑍀𑌤𑌿𑌰𑍍𑌵𑌿𑌰𑌤𑌿𑌃 𑌕𑍍𑌵 𑌵𑌾 ।
𑌕𑍍𑌵 𑌜𑍀𑌵𑌃 𑌕𑍍𑌵 𑌚 𑌤𑌦𑍍𑌬𑍍𑌰𑌹𑍍𑌮 𑌸𑌰𑍍𑌵𑌦𑌾 𑌵𑌿𑌮𑌲𑌸𑍍𑌯 𑌮𑍇 ॥ 20-11॥
𑌕𑍍𑌵 𑌪𑍍𑌰𑌵𑍃𑌤𑍍𑌤𑌿𑌰𑍍𑌨𑌿𑌰𑍍𑌵𑍃𑌤𑍍𑌤𑌿𑌰𑍍𑌵𑌾 𑌕𑍍𑌵 𑌮𑍁𑌕𑍍𑌤𑌿𑌃 𑌕𑍍𑌵 𑌚 𑌬𑌂𑌧𑌨𑌮𑍍 ।
𑌕𑍂𑌟𑌸𑍍𑌥𑌨𑌿𑌰𑍍𑌵𑌿𑌭𑌾𑌗𑌸𑍍𑌯 𑌸𑍍𑌵𑌸𑍍𑌥𑌸𑍍𑌯 𑌮𑌮 𑌸𑌰𑍍𑌵𑌦𑌾 ॥ 20-12॥
𑌕𑍍𑌵𑍋𑌪𑌦𑍇𑌶𑌃 𑌕𑍍𑌵 𑌵𑌾 𑌶𑌾𑌸𑍍𑌤𑍍𑌰𑌂 𑌕𑍍𑌵 𑌶𑌿𑌷𑍍𑌯𑌃 𑌕𑍍𑌵 𑌚 𑌵𑌾 𑌗𑍁𑌰𑍁𑌃 ।
𑌕𑍍𑌵 𑌚𑌾𑌸𑍍𑌤𑌿 𑌪𑍁𑌰𑍁𑌷𑌾𑌰𑍍𑌥𑍋 𑌵𑌾 𑌨𑌿𑌰𑍁𑌪𑌾𑌧𑍇𑌃 𑌶𑌿𑌵𑌸𑍍𑌯 𑌮𑍇 ॥ 20-13॥
𑌕𑍍𑌵 𑌚𑌾𑌸𑍍𑌤𑌿 𑌕𑍍𑌵 𑌚 𑌵𑌾 𑌨𑌾𑌸𑍍𑌤𑌿 𑌕𑍍𑌵𑌾𑌸𑍍𑌤𑌿 𑌚𑍈𑌕𑌂 𑌕𑍍𑌵 𑌚 𑌦𑍍𑌵𑌯𑌮𑍍 ।
𑌬𑌹𑍁𑌨𑌾𑌤𑍍𑌰 𑌕𑌿𑌮𑍁𑌕𑍍𑌤𑍇𑌨 𑌕𑌿𑌂𑌚𑌿𑌨𑍍𑌨𑍋𑌤𑍍𑌤𑌿𑌷𑍍𑌠𑌤𑍇 𑌮𑌮 ॥ 20-14॥
𑌇𑌤𑌿 𑌅𑌷𑍍𑌟𑌾𑌵𑌕𑍍𑌰𑌗𑍀𑌤𑌾 𑌸𑌮𑌾𑌪𑍍𑌤𑌾 ।
॥ 𑌓𑌂 𑌤𑌤𑍍𑌸𑌤𑍍 ॥
