॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿
𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥
𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।
𑌜𑌾𑌗𑍍𑌰𑌤𑍋 𑌦𑌹𑍍𑌯𑌮𑌾𑌨𑌸𑍍𑌯 𑌯𑌤𑍍𑌕𑌾𑌰𑍍𑌯𑌮𑌨𑍁𑌪𑌶𑍍𑌯𑌸𑌿 ।
𑌤𑌦𑍍𑌬𑍍𑌰𑍂𑌹𑌿 𑌤𑍍𑌵𑌂 𑌹𑌿 𑌨𑌸𑍍𑌤𑌾𑌤 𑌧𑌰𑍍𑌮𑌾𑌰𑍍𑌥𑌕𑍁𑌶𑌲𑌃 𑌶𑍁𑌚𑌿𑌃 ॥ 1॥
𑌤𑍍𑌵𑌂 𑌮𑌾𑌂 𑌯𑌥𑌾𑌵𑌦𑍍𑌵𑌿𑌦𑍁𑌰 𑌪𑍍𑌰𑌶𑌾𑌧𑌿
𑌪𑍍𑌰𑌜𑍍𑌞𑌾 𑌪𑍂𑌰𑍍𑌵𑌂 𑌸𑌰𑍍𑌵𑌮𑌜𑌾𑌤𑌶𑌤𑍍𑌰𑍋𑌃 ।
𑌯𑌨𑍍𑌮𑌨𑍍𑌯𑌸𑍇 𑌪𑌥𑍍𑌯𑌮𑌦𑍀𑌨𑌸𑌤𑍍𑌤𑍍𑌵
𑌶𑍍𑌰𑍇𑌯𑌃 𑌕𑌰𑌂 𑌬𑍍𑌰𑍂𑌹𑌿 𑌤𑌦𑍍𑌵𑍈 𑌕𑍁𑌰𑍂𑌣𑌾𑌮𑍍 ॥ 2॥
𑌪𑌾𑌪𑌾𑌶𑌂𑌗𑍀 𑌪𑌾𑌪𑌮𑍇𑌵 𑌨𑍌𑌪𑌶𑍍𑌯𑌨𑍍
𑌪𑍃𑌚𑍍𑌛𑌾𑌮𑌿 𑌤𑍍𑌵𑌾𑌂 𑌵𑍍𑌯𑌾𑌕𑍁𑌲𑍇𑌨𑌾𑌤𑍍𑌮𑌨𑌾𑌹𑌮𑍍 ।
𑌕𑌵𑍇 𑌤𑌨𑍍𑌮𑍇 𑌬𑍍𑌰𑍂𑌹𑌿 𑌸𑌰𑍍𑌵𑌂 𑌯𑌥𑌾𑌵𑌨𑍍
𑌮𑌨𑍀𑌷𑌿𑌤𑌂 𑌸𑌰𑍍𑌵𑌮𑌜𑌾𑌤𑌶𑌤𑍍𑌰𑍋𑌃 ॥ 3॥
𑌵𑌿𑌦𑍁𑌰 𑌉𑌵𑌾𑌚 ।
𑌶𑍁𑌭𑌂 𑌵𑌾 𑌯𑌦𑌿 𑌵𑌾 𑌪𑌾𑌪𑌂 𑌦𑍍𑌵𑍇𑌷𑍍𑌯𑌂 𑌵𑌾 𑌯𑌦𑌿 𑌵𑌾 𑌪𑍍𑌰𑌿𑌯𑌮𑍍 ।
𑌅𑌪𑍃𑌷𑍍𑌟𑌸𑍍𑌤𑌸𑍍𑌯 𑌤𑌦𑍍𑌬𑍍𑌰𑍂𑌯𑌾𑌦𑍍𑌯𑌸𑍍𑌯 𑌨𑍇𑌚𑍍𑌛𑍇𑌤𑍍𑌪𑌰𑌾𑌭𑌵𑌮𑍍 ॥ 4॥
𑌤𑌸𑍍𑌮𑌾𑌦𑍍𑌵𑌕𑍍𑌷𑍍𑌯𑌾𑌮𑌿 𑌤𑍇 𑌰𑌾𑌜𑌨𑍍𑌭𑌵𑌮𑌿𑌚𑍍𑌛𑌨𑍍𑌕𑍁𑌰𑍂𑌨𑍍𑌪𑍍𑌰𑌤𑌿 ।
𑌵𑌚𑌃 𑌶𑍍𑌰𑍇𑌯𑌃 𑌕𑌰𑌂 𑌧𑌰𑍍𑌮𑍍𑌯𑌂 𑌬𑍍𑌰𑍁𑌵𑌤𑌸𑍍𑌤𑌨𑍍𑌨𑌿𑌬𑍋𑌧 𑌮𑍇 ॥ 5॥
𑌮𑌿𑌥𑍍𑌯𑍋𑌪𑍇𑌤𑌾𑌨𑌿 𑌕𑌰𑍍𑌮𑌾𑌣𑌿 𑌸𑌿𑌧𑍍𑌯𑍇𑌯𑍁𑌰𑍍𑌯𑌾𑌨𑌿 𑌭𑌾𑌰𑌤 ।
𑌅𑌨𑍁𑌪𑌾𑌯 𑌪𑍍𑌰𑌯𑍁𑌕𑍍𑌤𑌾𑌨𑌿 𑌮𑌾 𑌸𑍍𑌮 𑌤𑍇𑌷𑍁 𑌮𑌨𑌃 𑌕𑍃𑌥𑌾𑌃 ॥ 6॥
𑌤𑌥𑍈𑌵 𑌯𑍋𑌗𑌵𑌿𑌹𑌿𑌤𑌂 𑌨 𑌸𑌿𑌧𑍍𑌯𑍇𑌤𑍍𑌕𑌰𑍍𑌮 𑌯𑌨𑍍𑌨𑍃𑌪 ।
𑌉𑌪𑌾𑌯𑌯𑍁𑌕𑍍𑌤𑌂 𑌮𑍇𑌧𑌾𑌵𑍀 𑌨 𑌤𑌤𑍍𑌰 𑌗𑍍𑌲𑌪𑌯𑍇𑌨𑍍𑌮𑌨𑌃 ॥ ॥
𑌅𑌨𑍁𑌬𑌂𑌧𑌾𑌨𑌵𑍇𑌕𑍍𑌷𑍇𑌤 𑌸𑌾𑌨𑍁𑌬𑌂𑌧𑍇𑌷𑍁 𑌕𑌰𑍍𑌮𑌸𑍁 ।
𑌸𑌂𑌪𑍍𑌰𑌧𑌾𑌰𑍍𑌯 𑌚 𑌕𑍁𑌰𑍍𑌵𑍀𑌤 𑌨 𑌵𑍇𑌗𑍇𑌨 𑌸𑌮𑌾𑌚𑌰𑍇𑌤𑍍 ॥ ॥
𑌅𑌨𑍁𑌬𑌂𑌧𑌂 𑌚 𑌸𑌂𑌪𑍍𑌰𑍇𑌕𑍍𑌷𑍍𑌯 𑌵𑌿𑌪𑌾𑌕𑌾𑌂𑌶𑍍𑌚𑍈𑌵 𑌕𑌰𑍍𑌮𑌣𑌾𑌮𑍍 ।
𑌉𑌤𑍍𑌥𑌾𑌨𑌮𑌾𑌤𑍍𑌮𑌨𑌶𑍍𑌚𑍈𑌵 𑌧𑍀𑌰𑌃 𑌕𑍁𑌰𑍍𑌵𑍀𑌤 𑌵𑌾 𑌨 𑌵𑌾 ॥ ॥
𑌯𑌃 𑌪𑍍𑌰𑌮𑌾𑌣𑌂 𑌨 𑌜𑌾𑌨𑌾𑌤𑌿 𑌸𑍍𑌥𑌾𑌨𑍇 𑌵𑍃𑌦𑍍𑌧𑍌 𑌤𑌥𑌾 𑌕𑍍𑌷𑌯𑍇 ।
𑌕𑍋𑌶𑍇 𑌜𑌨𑌪𑌦𑍇 𑌦𑌂𑌡𑍇 𑌨 𑌸 𑌰𑌾𑌜𑍍𑌯𑌾𑌵𑌤𑌿𑌷𑍍𑌠𑌤𑍇 ॥ 10॥
𑌯𑌸𑍍𑌤𑍍𑌵𑍇𑌤𑌾𑌨𑌿 𑌪𑍍𑌰𑌮𑌾𑌣𑌾𑌨𑌿 𑌯𑌥𑍋𑌕𑍍𑌤𑌾𑌨𑍍𑌯𑌨𑍁𑌪𑌶𑍍𑌯𑌤𑌿 ।
𑌯𑍁𑌕𑍍𑌤𑍋 𑌧𑌰𑍍𑌮𑌾𑌰𑍍𑌥𑌯𑍋𑌰𑍍𑌜𑍍𑌞𑌾𑌨𑍇 𑌸 𑌰𑌾𑌜𑍍𑌯𑌮𑌧𑌿𑌗𑌚𑍍𑌛𑌤𑌿 ॥ 11॥
𑌨 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌮𑌿𑌤𑍍𑌯𑍇𑌵 𑌵𑌰𑍍𑌤𑌿𑌤𑌵𑍍𑌯𑌮𑌸𑌾𑌂𑌪𑍍𑌰𑌤𑌮𑍍 ।
𑌶𑍍𑌰𑌿𑌯𑌂 𑌹𑍍𑌯𑌵𑌿𑌨𑌯𑍋 𑌹𑌂𑌤𑌿 𑌜𑌰𑌾 𑌰𑍂𑌪𑌮𑌿𑌵𑍋𑌤𑍍𑌤𑌮𑌮𑍍 ॥ 12॥
𑌭𑌕𑍍𑌷𑍍𑌯𑍋𑌤𑍍𑌤𑌮 𑌪𑍍𑌰𑌤𑌿𑌚𑍍𑌛𑌨𑍍𑌨𑌂 𑌮𑌤𑍍𑌸𑍍𑌯𑍋 𑌬𑌡𑌿𑌶𑌮𑌾𑌯𑌸𑌮𑍍 ।
𑌰𑍂𑌪𑌾𑌭𑌿𑌪𑌾𑌤𑍀 𑌗𑍍𑌰𑌸𑌤𑍇 𑌨𑌾𑌨𑍁𑌬𑌂𑌧𑌮𑌵𑍇𑌕𑍍𑌷𑌤𑍇 ॥ 13॥
𑌯𑌚𑍍𑌛𑌕𑍍𑌯𑌂 𑌗𑍍𑌰𑌸𑌿𑌤𑍁𑌂 𑌗𑍍𑌰𑌸𑍍𑌯𑌂 𑌗𑍍𑌰𑌸𑍍𑌤𑌂 𑌪𑌰𑌿𑌣𑌮𑍇𑌚𑍍𑌚 𑌯𑌤𑍍 ।
𑌹𑌿𑌤𑌂 𑌚 𑌪𑌰𑌿𑌣𑌾𑌮𑍇 𑌯𑌤𑍍𑌤𑌦𑌦𑍍𑌯𑌂 𑌭𑍂𑌤𑌿𑌮𑌿𑌚𑍍𑌛𑌤𑌾 ॥ 14॥
𑌵𑌨𑌸𑍍𑌪𑌤𑍇𑌰𑌪𑌕𑍍𑌵𑌾𑌨𑌿 𑌫𑌲𑌾𑌨𑌿 𑌪𑍍𑌰𑌚𑌿𑌨𑍋𑌤𑌿 𑌯𑌃 ।
𑌸 𑌨𑌾𑌪𑍍𑌨𑍋𑌤𑌿 𑌰𑌸𑌂 𑌤𑍇𑌭𑍍𑌯𑍋 𑌬𑍀𑌜𑌂 𑌚𑌾𑌸𑍍𑌯 𑌵𑌿𑌨𑌶𑍍𑌯𑌤𑌿 ॥ 15॥
𑌯𑌸𑍍𑌤𑍁 𑌪𑌕𑍍𑌵𑌮𑍁𑌪𑌾𑌦𑌤𑍍𑌤𑍇 𑌕𑌾𑌲𑍇 𑌪𑌰𑌿𑌣𑌤𑌂 𑌫𑌲𑌮𑍍 ।
𑌫𑌲𑌾𑌦𑍍𑌰𑌸𑌂 𑌸 𑌲𑌭𑌤𑍇 𑌬𑍀𑌜𑌾𑌚𑍍𑌚𑍈𑌵 𑌫𑌲𑌂 𑌪𑍁𑌨𑌃 ॥ 16॥
𑌯𑌥𑌾 𑌮𑌧𑍁 𑌸𑌮𑌾𑌦𑌤𑍍𑌤𑍇 𑌰𑌕𑍍𑌷𑌨𑍍𑌪𑍁𑌷𑍍𑌪𑌾𑌣𑌿 𑌷𑌟𑍍𑌪𑌦𑌃 ।
𑌤𑌦𑍍𑌵𑌦𑌰𑍍𑌥𑌾𑌨𑍍𑌮𑌨𑍁𑌷𑍍𑌯𑍇𑌭𑍍𑌯 𑌆𑌦𑌦𑍍𑌯𑌾𑌦𑌵𑌿𑌹𑌿𑌂𑌸𑌯𑌾 ॥ 1॥
𑌪𑍁𑌷𑍍𑌪𑌂 𑌪𑍁𑌷𑍍𑌪𑌂 𑌵𑌿𑌚𑌿𑌨𑍍𑌵𑍀𑌤 𑌮𑍂𑌲𑌚𑍍𑌛𑍇𑌦𑌂 𑌨 𑌕𑌾𑌰𑌯𑍇𑌤𑍍 ।
𑌮𑌾𑌲𑌾𑌕𑌾𑌰 𑌇𑌵𑌾𑌰𑌾𑌮𑍇 𑌨 𑌯𑌥𑌾𑌂𑌗𑌾𑌰𑌕𑌾𑌰𑌕𑌃 ॥ 1॥
𑌕𑌿𑌂 𑌨𑍁 𑌮𑍇 𑌸𑍍𑌯𑌾𑌦𑌿𑌦𑌂 𑌕𑍃𑌤𑍍𑌵𑌾 𑌕𑌿𑌂 𑌨𑍁 𑌮𑍇 𑌸𑍍𑌯𑌾𑌦𑌕𑍁𑌰𑍍𑌵𑌤𑌃 ।
𑌇𑌤𑌿 𑌕𑌰𑍍𑌮𑌾𑌣𑌿 𑌸𑌂𑌚𑌿𑌂𑌤𑍍𑌯 𑌕𑍁𑌰𑍍𑌯𑌾𑌦𑍍𑌵𑌾 𑌪𑍁𑌰𑍁𑌷𑍋 𑌨 𑌵𑌾 ॥ 1॥
𑌅𑌨𑌾𑌰𑌭𑍍𑌯𑌾 𑌭𑌵𑌂𑌤𑍍𑌯𑌰𑍍𑌥𑌾𑌃 𑌕𑍇 𑌚𑌿𑌨𑍍𑌨𑌿𑌤𑍍𑌯𑌂 𑌤𑌥𑌾𑌗𑌤𑌾𑌃 ।
𑌕𑍃𑌤𑌃 𑌪𑍁𑌰𑍁𑌷𑌕𑌾𑌰𑍋𑌽𑌪𑌿 𑌭𑌵𑍇𑌦𑍍𑌯𑍇𑌷𑍁 𑌨𑌿𑌰𑌰𑍍𑌥𑌕𑌃 ॥ 20॥
𑌕𑌾𑌂𑌶𑍍𑌚𑌿𑌦𑌰𑍍𑌥𑌾𑌨𑍍𑌨𑌰𑌃 𑌪𑍍𑌰𑌾𑌜𑍍𑌞𑍋 𑌲𑌭𑍁 𑌮𑍂𑌲𑌾𑌨𑍍𑌮𑌹𑌾𑌫𑌲𑌾𑌨𑍍 ।
𑌕𑍍𑌷𑌿𑌪𑍍𑌰𑌮𑌾𑌰𑌭𑌤𑍇 𑌕𑌰𑍍𑌤𑍁𑌂 𑌨 𑌵𑌿𑌘𑍍𑌨𑌯𑌤𑌿 𑌤𑌾𑌦𑍃𑌶𑌾𑌨𑍍 ॥ 21॥
𑌋𑌜𑍁 𑌪𑌶𑍍𑌯𑌤𑌿 𑌯𑌃 𑌸𑌰𑍍𑌵𑌂 𑌚𑌕𑍍𑌷𑍁𑌷𑌾𑌨𑍁𑌪𑌿𑌬𑌨𑍍𑌨𑌿𑌵 ।
𑌆𑌸𑍀𑌨𑌮𑌪𑌿 𑌤𑍂𑌷𑍍𑌣𑍀𑌕𑌮𑌨𑍁𑌰𑌜𑍍𑌯𑌂𑌤𑌿 𑌤𑌂 𑌪𑍍𑌰𑌜𑌾𑌃 ॥ 22॥
𑌚𑌕𑍍𑌷𑍁𑌷𑌾 𑌮𑌨𑌸𑌾 𑌵𑌾𑌚𑌾 𑌕𑌰𑍍𑌮𑌣𑌾 𑌚 𑌚𑌤𑍁𑌰𑍍𑌵𑌿𑌧𑌮𑍍 ।
𑌪𑍍𑌰𑌸𑌾𑌦𑌯𑌤𑌿 𑌲𑍋𑌕𑌂 𑌯𑌸𑍍𑌤𑌂 𑌲𑍋𑌕𑍋𑌽𑌨𑍁𑌪𑍍𑌰𑌸𑍀𑌦𑌤𑌿 ॥ 23॥
𑌯𑌸𑍍𑌮𑌾𑌤𑍍𑌤𑍍𑌰𑌸𑍍𑌯𑌂𑌤𑌿 𑌭𑍂𑌤𑌾𑌨𑌿 𑌮𑍃𑌗𑌵𑍍𑌯𑌾𑌧𑌾𑌨𑍍𑌮𑍃𑌗𑌾 𑌇𑌵 ।
𑌸𑌾𑌗𑌰𑌾𑌂𑌤𑌾𑌮𑌪𑌿 𑌮𑌹𑍀𑌂 𑌲𑌬𑍍𑌧𑍍𑌵𑌾 𑌸 𑌪𑌰𑌿𑌹𑍀𑌯𑌤𑍇 ॥ 24॥
𑌪𑌿𑌤𑍃𑌪𑍈𑌤𑌾𑌮𑌹𑌂 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌵𑌾𑌨𑍍𑌸𑍍𑌵𑍇𑌨 𑌤𑍇𑌜𑌸𑌾 ।
𑌵𑌾𑌯𑍁𑌰𑌭𑍍𑌰𑌮𑌿𑌵𑌾𑌸𑌾𑌦𑍍𑌯 𑌭𑍍𑌰𑌂𑌶𑌯𑌤𑍍𑌯𑌨𑌯𑍇 𑌸𑍍𑌥𑌿𑌤𑌃 ॥ 25॥
𑌧𑌰𑍍𑌮𑌮𑌾𑌚𑌰𑌤𑍋 𑌰𑌾𑌜𑍍𑌞𑌃 𑌸𑌦𑍍𑌭𑌿𑌶𑍍𑌚𑌰𑌿𑌤𑌮𑌾𑌦𑌿𑌤𑌃 ।
𑌵𑌸𑍁𑌧𑌾 𑌵𑌸𑍁𑌸𑌂𑌪𑍂𑌰𑍍𑌣𑌾 𑌵𑌰𑍍𑌧𑌤𑍇 𑌭𑍂𑌤𑌿𑌵𑌰𑍍𑌧𑌨𑍀 ॥ 26॥
𑌅𑌥 𑌸𑌂𑌤𑍍𑌯𑌜𑌤𑍋 𑌧𑌰𑍍𑌮𑌮𑌧𑌰𑍍𑌮𑌂 𑌚𑌾𑌨𑍁𑌤𑌿𑌷𑍍𑌠𑌤𑌃 ।
𑌪𑍍𑌰𑌤𑌿𑌸𑌂𑌵𑍇𑌷𑍍𑌟𑌤𑍇 𑌭𑍂𑌮𑌿𑌰𑌗𑍍𑌨𑍌 𑌚𑌰𑍍𑌮𑌾𑌹𑌿𑌤𑌂 𑌯𑌥𑌾 ॥ 2॥
𑌯 𑌏𑌵 𑌯𑌤𑍍𑌨𑌃 𑌕𑍍𑌰𑌿𑌯𑌤𑍇 𑌪𑍍𑌰𑌰 𑌰𑌾𑌷𑍍𑌟𑍍𑌰𑌾𑌵𑌮𑌰𑍍𑌦𑌨𑍇 ।
𑌸 𑌏𑌵 𑌯𑌤𑍍𑌨𑌃 𑌕𑌰𑍍𑌤𑌵𑍍𑌯𑌃 𑌸𑍍𑌵𑌰𑌾𑌷𑍍𑌟𑍍𑌰 𑌪𑌰𑌿𑌪𑌾𑌲𑌨𑍇 ॥ 2॥
𑌧𑌰𑍍𑌮𑍇𑌣 𑌰𑌾𑌜𑍍𑌯𑌂 𑌵𑌿𑌂𑌦𑍇𑌤 𑌧𑌰𑍍𑌮𑍇𑌣 𑌪𑌰𑌿𑌪𑌾𑌲𑌯𑍇𑌤𑍍 ।
𑌧𑌰𑍍𑌮𑌮𑍂𑌲𑌾𑌂 𑌶𑍍𑌰𑌿𑌯𑌂 𑌪𑍍𑌰𑌾𑌪𑍍𑌯 𑌨 𑌜𑌹𑌾𑌤𑌿 𑌨 𑌹𑍀𑌯𑌤𑍇 ॥ 2॥
𑌅𑌪𑍍𑌯𑍁𑌨𑍍𑌮𑌤𑍍𑌤𑌾𑌤𑍍𑌪𑍍𑌰𑌲𑌪𑌤𑍋 𑌬𑌾𑌲𑌾𑌚𑍍𑌚 𑌪𑌰𑌿𑌸𑌰𑍍𑌪𑌤𑌃 ।
𑌸𑌰𑍍𑌵𑌤𑌃 𑌸𑌾𑌰𑌮𑌾𑌦𑌦𑍍𑌯𑌾𑌦𑌶𑍍𑌮𑌭𑍍𑌯 𑌇𑌵 𑌕𑌾𑌂𑌚𑌨𑌮𑍍 ॥ 30॥
𑌸𑍁𑌵𑍍𑌯𑌾𑌹𑍃𑌤𑌾𑌨𑌿 𑌸𑍁𑌧𑌿𑌯𑌾𑌂 𑌸𑍁𑌕𑍃𑌤𑌾𑌨𑌿 𑌤𑌤𑌸𑍍𑌤𑌤𑌃 ।
𑌸𑌂𑌚𑌿𑌨𑍍𑌵𑌂𑌧𑍀𑌰 𑌆𑌸𑍀𑌤 𑌶𑌿𑌲𑌾 𑌹𑌾𑌰𑍀 𑌶𑌿𑌲𑌂 𑌯𑌥𑌾 ॥ 31॥
𑌗𑌂𑌧𑍇𑌨 𑌗𑌾𑌵𑌃 𑌪𑌶𑍍𑌯𑌂𑌤𑌿 𑌵𑍇𑌦𑍈𑌃 𑌪𑌶𑍍𑌯𑌂𑌤𑌿 𑌬𑍍𑌰𑌾𑌹𑍍𑌮𑌣𑌾𑌃 ।
𑌚𑌾𑌰𑍈𑌃 𑌪𑌶𑍍𑌯𑌂𑌤𑌿 𑌰𑌾𑌜𑌾𑌨𑌶𑍍𑌚𑌕𑍍𑌷𑍁𑌰𑍍𑌭𑍍𑌯𑌾𑌮𑌿𑌤𑌰𑍇 𑌜𑌨𑌾𑌃 ॥ 32॥
𑌭𑍂𑌯𑌾𑌂𑌸𑌂 𑌲𑌭𑌤𑍇 𑌕𑍍𑌲𑍇𑌶𑌂 𑌯𑌾 𑌗𑍌𑌰𑍍𑌭𑌵𑌤𑌿 𑌦𑍁𑌰𑍍𑌦𑍁𑌹𑌾 ।
𑌅𑌥 𑌯𑌾 𑌸𑍁𑌦𑍁𑌹𑌾 𑌰𑌾𑌜𑌨𑍍𑌨𑍈𑌵 𑌤𑌾𑌂 𑌵𑌿𑌨𑌯𑌂𑌤𑍍𑌯𑌪𑌿 ॥ 33॥
𑌯𑌦𑌤𑌪𑍍𑌤𑌂 𑌪𑍍𑌰𑌣𑌮𑌤𑌿 𑌨 𑌤𑌤𑍍𑌸𑌂𑌤𑌾𑌪𑌯𑌂𑌤𑍍𑌯𑌪𑌿 ।
𑌯𑌚𑍍𑌚 𑌸𑍍𑌵𑌯𑌂 𑌨𑌤𑌂 𑌦𑌾𑌰𑍁 𑌨 𑌤𑌤𑍍𑌸𑌨𑍍𑌨𑌾𑌮𑌯𑌂𑌤𑍍𑌯𑌪𑌿 ॥ 34॥
𑌏𑌤𑌯𑍋𑌪𑌮𑌯𑌾 𑌧𑍀𑌰𑌃 𑌸𑌨𑍍𑌨𑌮𑍇𑌤 𑌬𑌲𑍀𑌯𑌸𑍇 ।
𑌇𑌂𑌦𑍍𑌰𑌾𑌯 𑌸 𑌪𑍍𑌰𑌣𑌮𑌤𑍇 𑌨𑌮𑌤𑍇 𑌯𑍋 𑌬𑌲𑍀𑌯𑌸𑍇 ॥ 35॥
𑌪𑌰𑍍𑌜𑌨𑍍𑌯𑌨𑌾𑌥𑌾𑌃 𑌪𑌶𑌵𑍋 𑌰𑌾𑌜𑌾𑌨𑍋 𑌮𑌿𑌤𑍍𑌰 𑌬𑌾𑌂𑌧𑌵𑌾𑌃 ।
𑌪𑌤𑌯𑍋 𑌬𑌾𑌂𑌧𑌵𑌾𑌃 𑌸𑍍𑌤𑍍𑌰𑍀𑌣𑌾𑌂 𑌬𑍍𑌰𑌾𑌹𑍍𑌮𑌣𑌾 𑌵𑍇𑌦 𑌬𑌾𑌂𑌧𑌵𑌾𑌃 ॥ 36॥
𑌸𑌤𑍍𑌯𑍇𑌨 𑌰𑌕𑍍𑌷𑍍𑌯𑌤𑍇 𑌧𑌰𑍍𑌮𑍋 𑌵𑌿𑌦𑍍𑌯𑌾 𑌯𑍋𑌗𑍇𑌨 𑌰𑌕𑍍𑌷𑍍𑌯𑌤𑍇 ।
𑌮𑍃𑌜𑌯𑌾 𑌰𑌕𑍍𑌷𑍍𑌯𑌤𑍇 𑌰𑍂𑌪𑌂 𑌕𑍁𑌲𑌂 𑌵𑍃𑌤𑍍𑌤𑍇𑌨 𑌰𑌕𑍍𑌷𑍍𑌯𑌤𑍇 ॥ 3॥
𑌮𑌾𑌨𑍇𑌨 𑌰𑌕𑍍𑌷𑍍𑌯𑌤𑍇 𑌧𑌾𑌨𑍍𑌯𑌮𑌶𑍍𑌵𑌾𑌨𑍍𑌰𑌕𑍍𑌷𑍍𑌯𑌤𑍍𑌯𑌨𑍁𑌕𑍍𑌰𑌮𑌃 ।
𑌅𑌭𑍀𑌕𑍍𑌷𑍍𑌣𑌦𑌰𑍍𑌶𑌨𑌾𑌦𑍍𑌗𑌾𑌵𑌃 𑌸𑍍𑌤𑍍𑌰𑌿𑌯𑍋 𑌰𑌕𑍍𑌷𑍍𑌯𑌾𑌃 𑌕𑍁𑌚𑍇𑌲𑌤𑌃 ॥ 3॥
𑌨 𑌕𑍁𑌲𑌂 𑌵𑍃𑌤𑍍𑌤𑌿 𑌹𑍀𑌨𑌸𑍍𑌯 𑌪𑍍𑌰𑌮𑌾𑌣𑌮𑌿𑌤𑌿 𑌮𑍇 𑌮𑌤𑌿𑌃 ।
𑌅𑌂𑌤𑍍𑌯𑍇𑌷𑍍𑌵𑌪𑌿 𑌹𑌿 𑌜𑌾𑌤𑌾𑌨𑌾𑌂 𑌵𑍃𑌤𑍍𑌤𑌮𑍇𑌵 𑌵𑌿𑌶𑌿𑌷𑍍𑌯𑌤𑍇 ॥ 3॥
𑌯 𑌈𑌰𑍍𑌷𑍍𑌯𑍁𑌃 𑌪𑌰𑌵𑌿𑌤𑍍𑌤𑍇𑌷𑍁 𑌰𑍂𑌪𑍇 𑌵𑍀𑌰𑍍𑌯𑍇 𑌕𑍁𑌲𑌾𑌨𑍍𑌵𑌯𑍇 ।
𑌸𑍁𑌖𑍇 𑌸𑍌𑌭𑌾𑌗𑍍𑌯𑌸𑌤𑍍𑌕𑌾𑌰𑍇 𑌤𑌸𑍍𑌯 𑌵𑍍𑌯𑌾𑌧𑌿𑌰𑌨𑌂𑌤𑌕𑌃 ॥ 40॥
𑌅𑌕𑌾𑌰𑍍𑌯 𑌕𑌰𑌣𑌾𑌦𑍍𑌭𑍀𑌤𑌃 𑌕𑌾𑌰𑍍𑌯𑌾𑌣𑌾𑌂 𑌚 𑌵𑌿𑌵𑌰𑍍𑌜𑌨𑌾𑌤𑍍 ।
𑌅𑌕𑌾𑌲𑍇 𑌮𑌂𑌤𑍍𑌰𑌭𑍇𑌦𑌾𑌚𑍍𑌚 𑌯𑍇𑌨 𑌮𑌾𑌦𑍍𑌯𑍇𑌨𑍍𑌨 𑌤𑌤𑍍𑌪𑌿𑌬𑍇𑌤𑍍 ॥ 41॥
𑌵𑌿𑌦𑍍𑌯𑌾𑌮𑌦𑍋 𑌧𑌨𑌮𑌦𑌸𑍍𑌤𑍃𑌤𑍀𑌯𑍋𑌽𑌭𑌿𑌜𑌨𑍋 𑌮𑌦𑌃 ।
𑌏𑌤𑍇 𑌮𑌦𑌾𑌵𑌲𑌿𑌪𑍍𑌤𑌾𑌨𑌾𑌮𑍇𑌤 𑌏𑌵 𑌸𑌤𑌾𑌂 𑌦𑌮𑌾𑌃 ॥ 42॥
𑌅𑌸𑌂𑌤𑍋𑌽𑌭𑍍𑌯𑌰𑍍𑌥𑌿𑌤𑌾𑌃 𑌸𑌦𑍍𑌭𑌿𑌃 𑌕𑌿𑌂 𑌚𑌿𑌤𑍍𑌕𑌾𑌰𑍍𑌯𑌂 𑌕𑌦𑌾 𑌚𑌨 ।
𑌮𑌨𑍍𑌯𑌂𑌤𑍇 𑌸𑌂𑌤𑌮𑌾𑌤𑍍𑌮𑌾𑌨𑌮𑌸𑌂𑌤𑌮𑌪𑌿 𑌵𑌿𑌶𑍍𑌰𑍁𑌤𑌮𑍍 ॥ 43॥
𑌗𑌤𑌿𑌰𑌾𑌤𑍍𑌮𑌵𑌤𑌾𑌂 𑌸𑌂𑌤𑌃 𑌸𑌂𑌤 𑌏𑌵 𑌸𑌤𑌾𑌂 𑌗𑌤𑌿𑌃 ।
𑌅𑌸𑌤𑌾𑌂 𑌚 𑌗𑌤𑌿𑌃 𑌸𑌂𑌤𑍋 𑌨 𑌤𑍍𑌵𑌸𑌂𑌤𑌃 𑌸𑌤𑌾𑌂 𑌗𑌤𑌿𑌃 ॥ 44॥
𑌜𑌿𑌤𑌾 𑌸𑌭𑌾 𑌵𑌸𑍍𑌤𑍍𑌰𑌵𑌤𑌾 𑌸𑌮𑌾𑌶𑌾 𑌗𑍋𑌮𑌤𑌾 𑌜𑌿𑌤𑌾 ।
𑌅𑌧𑍍𑌵𑌾 𑌜𑌿𑌤𑍋 𑌯𑌾𑌨𑌵𑌤𑌾 𑌸𑌰𑍍𑌵𑌂 𑌶𑍀𑌲𑌵𑌤𑌾 𑌜𑌿𑌤𑌮𑍍 ॥ 45॥
𑌶𑍀𑌲𑌂 𑌪𑍍𑌰𑌧𑌾𑌨𑌂 𑌪𑍁𑌰𑍁𑌷𑍇 𑌤𑌦𑍍𑌯𑌸𑍍𑌯𑍇𑌹 𑌪𑍍𑌰𑌣𑌶𑍍𑌯𑌤𑌿 ।
𑌨 𑌤𑌸𑍍𑌯 𑌜𑍀𑌵𑌿𑌤𑍇𑌨𑌾𑌰𑍍𑌥𑍋 𑌨 𑌧𑌨𑍇𑌨 𑌨 𑌬𑌂𑌧𑍁𑌭𑌿𑌃 ॥ 46॥
𑌆𑌢𑍍𑌯𑌾𑌨𑌾𑌂 𑌮𑌾𑌂𑌸𑌪𑌰𑌮𑌂 𑌮𑌧𑍍𑌯𑌾𑌨𑌾𑌂 𑌗𑍋𑌰𑌸𑍋𑌤𑍍𑌤𑌰𑌮𑍍 ।
𑌲𑌵𑌣𑍋𑌤𑍍𑌤𑌰𑌂 𑌦𑌰𑌿𑌦𑍍𑌰𑌾𑌣𑌾𑌂 𑌭𑍋𑌜𑌨𑌂 𑌭𑌰𑌤𑌰𑍍𑌷𑌭 ॥ 4॥
𑌸𑌂𑌪𑌨𑍍𑌨𑌤𑌰𑌮𑍇𑌵𑌾𑌨𑍍𑌨𑌂 𑌦𑌰𑌿𑌦𑍍𑌰𑌾 𑌭𑍁𑌂𑌜𑌤𑍇 𑌸𑌦𑌾 ।
𑌕𑍍𑌷𑍁𑌤𑍍𑌸𑍍𑌵𑌾𑌦𑍁𑌤𑌾𑌂 𑌜𑌨𑌯𑌤𑌿 𑌸𑌾 𑌚𑌾𑌢𑍍𑌯𑍇𑌷𑍁 𑌸𑍁𑌦𑍁𑌰𑍍𑌲𑌭𑌾 ॥ 4॥
𑌪𑍍𑌰𑌾𑌯𑍇𑌣 𑌶𑍍𑌰𑍀𑌮𑌤𑌾𑌂 𑌲𑍋𑌕𑍇 𑌭𑍋𑌕𑍍𑌤𑍁𑌂 𑌶𑌕𑍍𑌤𑌿𑌰𑍍𑌨 𑌵𑌿𑌦𑍍𑌯𑌤𑍇 ।
𑌦𑌰𑌿𑌦𑍍𑌰𑌾𑌣𑌾𑌂 𑌤𑍁 𑌰𑌾𑌜𑍇𑌂𑌦𑍍𑌰 𑌅𑌪𑌿 𑌕𑌾𑌷𑍍𑌠𑌂 𑌹𑌿 𑌜𑍀𑌰𑍍𑌯𑌤𑍇 ॥ 4॥
𑌅𑌵𑍃𑌤𑍍𑌤𑌿𑌰𑍍𑌭𑌯𑌮𑌂𑌤𑍍𑌯𑌾𑌨𑌾𑌂 𑌮𑌧𑍍𑌯𑌾𑌨𑌾𑌂 𑌮𑌰𑌣𑌾𑌦𑍍𑌭𑌯𑌮𑍍 ।
𑌉𑌤𑍍𑌤𑌮𑌾𑌨𑌾𑌂 𑌤𑍁 𑌮𑌰𑍍𑌤𑍍𑌯𑌾𑌨𑌾𑌮𑌵𑌮𑌾𑌨𑌾𑌤𑍍𑌪𑌰𑌂 𑌭𑌯𑌮𑍍 ॥ 50॥
𑌐𑌶𑍍𑌵𑌰𑍍𑌯𑌮𑌦𑌪𑌾𑌪𑌿𑌷𑍍𑌠𑌾 𑌮𑌦𑌾𑌃 𑌪𑌾𑌨𑌮𑌦𑌾𑌦𑌯𑌃 ।
𑌐𑌶𑍍𑌵𑌰𑍍𑌯𑌮𑌦𑌮𑌤𑍍𑌤𑍋 𑌹𑌿 𑌨𑌾𑌪𑌤𑌿𑌤𑍍𑌵𑌾 𑌵𑌿𑌬𑍁𑌧𑍍𑌯𑌤𑍇 ॥ 51॥
𑌇𑌂𑌦𑍍𑌰𑌿𑌯𑍌𑌰𑌿𑌂𑌦𑍍𑌰𑌿𑌯𑌾𑌰𑍍𑌥𑍇𑌷𑍁 𑌵𑌰𑍍𑌤𑌮𑌾𑌨𑍈𑌰𑌨𑌿𑌗𑍍𑌰𑌹𑍈𑌃 ।
𑌤𑍈𑌰𑌯𑌂 𑌤𑌾𑌪𑍍𑌯𑌤𑍇 𑌲𑍋𑌕𑍋 𑌨𑌕𑍍𑌷𑌤𑍍𑌰𑌾𑌣𑌿 𑌗𑍍𑌰𑌹𑍈𑌰𑌿𑌵 ॥ 52॥
𑌯𑍋 𑌜𑌿𑌤𑌃 𑌪𑌂𑌚𑌵𑌰𑍍𑌗𑍇𑌣 𑌸𑌹𑌜𑍇𑌨𑌾𑌤𑍍𑌮 𑌕𑌰𑍍𑌶𑌿𑌨𑌾 ।
𑌆𑌪𑌦𑌸𑍍𑌤𑌸𑍍𑌯 𑌵𑌰𑍍𑌧𑌂𑌤𑍇 𑌶𑍁𑌕𑍍𑌲𑌪𑌕𑍍𑌷 𑌇𑌵𑍋𑌡𑍁𑌰𑌾𑌡𑍍 ॥ 53॥
𑌅𑌵𑌿𑌜𑌿𑌤𑍍𑌯 𑌯 𑌆𑌤𑍍𑌮𑌾𑌨𑌮𑌮𑌾𑌤𑍍𑌯𑌾𑌨𑍍𑌵𑌿𑌜𑌿𑌗𑍀𑌷𑌤𑍇 ।
𑌅𑌮𑌿𑌤𑍍𑌰𑌾𑌨𑍍𑌵𑌾𑌜𑌿𑌤𑌾𑌮𑌾𑌤𑍍𑌯𑌃 𑌸𑍋𑌽𑌵𑌶𑌃 𑌪𑌰𑌿𑌹𑍀𑌯𑌤𑍇 ॥ 54॥
𑌆𑌤𑍍𑌮𑌾𑌨𑌮𑍇𑌵 𑌪𑍍𑌰𑌥𑌮𑌂 𑌦𑍇𑌶𑌰𑍂𑌪𑍇𑌣 𑌯𑍋 𑌜𑌯𑍇𑌤𑍍 ।
𑌤𑌤𑍋𑌽𑌮𑌾𑌤𑍍𑌯𑌾𑌨𑌮𑌿𑌤𑍍𑌰𑌾𑌂𑌶𑍍𑌚 𑌨 𑌮𑍋𑌘𑌂 𑌵𑌿𑌜𑌿𑌗𑍀𑌷𑌤𑍇 ॥ 55॥
𑌵𑌶𑍍𑌯𑍇𑌂𑌦𑍍𑌰𑌿𑌯𑌂 𑌜𑌿𑌤𑌾𑌮𑌾𑌤𑍍𑌯𑌂 𑌧𑍃𑌤𑌦𑌂𑌡𑌂 𑌵𑌿𑌕𑌾𑌰𑌿𑌷𑍁 ।
𑌪𑌰𑍀𑌕𑍍𑌷𑍍𑌯 𑌕𑌾𑌰𑌿𑌣𑌂 𑌧𑍀𑌰𑌮𑌤𑍍𑌯𑌂𑌤𑌂 𑌶𑍍𑌰𑍀𑌰𑍍𑌨𑌿𑌷𑍇𑌵𑌤𑍇 ॥ 56॥
𑌰𑌥𑌃 𑌶𑌰𑍀𑌰𑌂 𑌪𑍁𑌰𑍁𑌷𑌸𑍍𑌯 𑌰𑌾𑌜𑌨𑍍
𑌨𑌾𑌤𑍍𑌮𑌾 𑌨𑌿𑌯𑌂𑌤𑍇𑌂𑌦𑍍𑌰𑌿𑌯𑌾𑌣𑍍𑌯𑌸𑍍𑌯 𑌚𑌾𑌶𑍍𑌵𑌾𑌃 ।
𑌤𑍈𑌰𑌪𑍍𑌰𑌮𑌤𑍍𑌤𑌃 𑌕𑍁𑌶𑌲𑌃 𑌸𑌦𑌶𑍍𑌵𑍈𑌰𑍍
𑌦𑌾𑌂𑌤𑍈𑌃 𑌸𑍁𑌖𑌂 𑌯𑌾𑌤𑌿 𑌰𑌥𑍀𑌵 𑌧𑍀𑌰𑌃 ॥ 5॥
𑌏𑌤𑌾𑌨𑍍𑌯𑌨𑌿𑌗𑍃𑌹𑍀𑌤𑌾𑌨𑌿 𑌵𑍍𑌯𑌾𑌪𑌾𑌦𑌯𑌿𑌤𑍁𑌮𑌪𑍍𑌯𑌲𑌮𑍍 ।
𑌅𑌵𑌿𑌧𑍇𑌯𑌾 𑌇𑌵𑌾𑌦𑌾𑌂𑌤𑌾 𑌹𑌯𑌾𑌃 𑌪𑌥𑌿 𑌕𑍁𑌸𑌾𑌰𑌥𑌿𑌮𑍍 ॥ 5॥
𑌅𑌨𑌰𑍍𑌥𑌮𑌰𑍍𑌥𑌤𑌃 𑌪𑌶𑍍𑌯𑌨𑍍𑌨𑌰𑍍𑌤𑌂 𑌚𑍈𑌵𑌾𑌪𑍍𑌯𑌨𑌰𑍍𑌥𑌤𑌃 ।
𑌇𑌂𑌦𑍍𑌰𑌿𑌯𑍈𑌃 𑌪𑍍𑌰𑌸𑍃𑌤𑍋 𑌬𑌾𑌲𑌃 𑌸𑍁𑌦𑍁𑌃𑌖𑌂 𑌮𑌨𑍍𑌯𑌤𑍇 𑌸𑍁𑌖𑌮𑍍 ॥ 5॥
𑌧𑌰𑍍𑌮𑌾𑌰𑍍𑌥𑍌 𑌯𑌃 𑌪𑌰𑌿𑌤𑍍𑌯𑌜𑍍𑌯 𑌸𑍍𑌯𑌾𑌦𑌿𑌂𑌦𑍍𑌰𑌿𑌯𑌵𑌶𑌾𑌨𑍁𑌗𑌃 ।
𑌶𑍍𑌰𑍀𑌪𑍍𑌰𑌾𑌣𑌧𑌨𑌦𑌾𑌰𑍇𑌭𑍍𑌯 𑌕𑍍𑌷𑌿𑌪𑍍𑌰𑌂 𑌸 𑌪𑌰𑌿𑌹𑍀𑌯𑌤𑍇 ॥ 60॥
𑌅𑌰𑍍𑌥𑌾𑌨𑌾𑌮𑍀𑌶𑍍𑌵𑌰𑍋 𑌯𑌃 𑌸𑍍𑌯𑌾𑌦𑌿𑌂𑌦𑍍𑌰𑌿𑌯𑌾𑌣𑌾𑌮𑌨𑍀𑌶𑍍𑌵𑌰𑌃 ।
𑌇𑌂𑌦𑍍𑌰𑌿𑌯𑌾𑌣𑌾𑌮𑌨𑍈𑌶𑍍𑌵𑌰𑍍𑌯𑌾𑌦𑍈𑌶𑍍𑌵𑌰𑍍𑌯𑌾𑌦𑍍𑌭𑍍𑌰𑌶𑍍𑌯𑌤𑍇 𑌹𑌿 𑌸𑌃 ॥ 61॥
𑌆𑌤𑍍𑌮𑌨𑌾𑌤𑍍𑌮𑌾𑌨𑌮𑌨𑍍𑌵𑌿𑌚𑍍𑌛𑍇𑌨𑍍𑌮𑌨𑍋 𑌬𑍁𑌦𑍍𑌧𑍀𑌂𑌦𑍍𑌰𑌿𑌯𑍈𑌰𑍍𑌯𑌤𑍈𑌃 ।
𑌆𑌤𑍍𑌮𑍈𑌵 𑌹𑍍𑌯𑌾𑌤𑍍𑌮𑌨𑍋 𑌬𑌂𑌧𑍁𑌰𑌾𑌤𑍍𑌮𑍈𑌵 𑌰𑌿𑌪𑍁𑌰𑌾𑌤𑍍𑌮𑌨𑌃 ॥ 62॥
𑌕𑍍𑌷𑍁𑌦𑍍𑌰𑌾𑌕𑍍𑌷𑍇𑌣𑍇𑌵 𑌜𑌾𑌲𑍇𑌨 𑌝𑌷𑌾𑌵𑌪𑌿𑌹𑌿𑌤𑌾𑌵𑍁𑌭𑍌 ।
𑌕𑌾𑌮𑌶𑍍𑌚 𑌰𑌾𑌜𑌨𑍍𑌕𑍍𑌰𑍋𑌧𑌶𑍍𑌚 𑌤𑍌 𑌪𑍍𑌰𑌾𑌜𑍍𑌞𑌾𑌨𑌂 𑌵𑌿𑌲𑍁𑌂𑌪𑌤𑌃 ॥ 63॥
𑌸𑌮𑌵𑍇𑌕𑍍𑌷𑍍𑌯𑍇𑌹 𑌧𑌰𑍍𑌮𑌾𑌰𑍍𑌥𑍌 𑌸𑌂𑌭𑌾𑌰𑌾𑌨𑍍𑌯𑍋𑌽𑌧𑌿𑌗𑌚𑍍𑌛𑌤𑌿 ।
𑌸 𑌵𑍈 𑌸𑌂𑌭𑍃𑌤 𑌸𑌂𑌭𑌾𑌰𑌃 𑌸𑌤𑌤𑌂 𑌸𑍁𑌖𑌮𑍇𑌧𑌤𑍇 ॥ 64॥
𑌯𑌃 𑌪𑌂𑌚𑌾𑌭𑍍𑌯𑌂𑌤𑌰𑌾𑌞𑍍𑌶𑌤𑍍𑌰𑍂𑌨𑌵𑌿𑌜𑌿𑌤𑍍𑌯 𑌮𑌤𑌿𑌕𑍍𑌷𑌯𑌾𑌨𑍍 ।
𑌜𑌿𑌗𑍀𑌷𑌤𑌿 𑌰𑌿𑌪𑍂𑌨𑌨𑍍𑌯𑌾𑌨𑍍𑌰𑌿𑌪𑌵𑍋𑌽𑌭𑌿𑌭𑌵𑌂𑌤𑌿 𑌤𑌮𑍍 ॥ 65॥
𑌦𑍃𑌶𑍍𑌯𑌂𑌤𑍇 𑌹𑌿 𑌦𑍁𑌰𑌾𑌤𑍍𑌮𑌾𑌨𑍋 𑌵𑌧𑍍𑌯𑌮𑌾𑌨𑌾𑌃 𑌸𑍍𑌵𑌕𑌰𑍍𑌮 𑌭𑌿𑌃 ।
𑌇𑌂𑌦𑍍𑌰𑌿𑌯𑌾𑌣𑌾𑌮𑌨𑍀𑌶𑌤𑍍𑌵𑌾𑌦𑍍𑌰𑌾𑌜𑌾𑌨𑍋 𑌰𑌾𑌜𑍍𑌯𑌵𑌿𑌭𑍍𑌰𑌮𑍈𑌃 ॥ 66॥
𑌅𑌸𑌂𑌤𑍍𑌯𑌾𑌗𑌾𑌤𑍍𑌪𑌾𑌪𑌕𑍃𑌤𑌾𑌮𑌪𑌾𑌪𑌾𑌂𑌸𑍍
𑌤𑍁𑌲𑍍𑌯𑍋 𑌦𑌂𑌡𑌃 𑌸𑍍𑌪𑍃𑌶𑌤𑍇 𑌮𑌿𑌶𑍍𑌰𑌭𑌾𑌵𑌾𑌤𑍍 ।
𑌶𑍁𑌷𑍍𑌕𑍇𑌣𑌾𑌰𑍍𑌦𑍍𑌰𑌂 𑌦𑌹𑍍𑌯𑌤𑍇 𑌮𑌿𑌶𑍍𑌰𑌭𑌾𑌵𑌾𑌤𑍍
𑌤𑌸𑍍𑌮𑌾𑌤𑍍𑌪𑌾𑌪𑍈𑌃 𑌸𑌹 𑌸𑌂𑌧𑌿𑌂 𑌨 𑌕𑍁𑌰𑍍𑌯𑌾𑌤𑍍 ॥ 6॥
𑌨𑌿𑌜𑌾𑌨𑍁𑌤𑍍𑌪𑌤𑌤𑌃 𑌶𑌤𑍍𑌰𑍂𑌨𑍍𑌪𑌂𑌚 𑌪𑌂𑌚 𑌪𑍍𑌰𑌯𑍋𑌜𑌨𑌾𑌨𑍍 ।
𑌯𑍋 𑌮𑍋𑌹𑌾𑌨𑍍𑌨 𑌨𑌿𑌘𑍃𑌹𑍍𑌣𑌾𑌤𑌿 𑌤𑌮𑌾𑌪𑌦𑍍𑌗𑍍𑌰𑌸𑌤𑍇 𑌨𑌰𑌮𑍍 ॥ 6॥
𑌅𑌨𑌸𑍂𑌯𑌾𑌰𑍍𑌜𑌵𑌂 𑌶𑍌𑌚𑌂 𑌸𑌂𑌤𑍋𑌷𑌃 𑌪𑍍𑌰𑌿𑌯𑌵𑌾𑌦𑌿𑌤𑌾 ।
𑌦𑌮𑌃 𑌸𑌤𑍍𑌯𑌮𑌨𑌾𑌯𑌾𑌸𑍋 𑌨 𑌭𑌵𑌂𑌤𑌿 𑌦𑍁𑌰𑌾𑌤𑍍𑌮𑌨𑌾𑌮𑍍 ॥ 6॥
𑌆𑌤𑍍𑌮𑌜𑍍𑌞𑌾𑌨𑌮𑌨𑌾𑌯𑌾𑌸𑌸𑍍𑌤𑌿𑌤𑌿𑌕𑍍𑌷𑌾 𑌧𑌰𑍍𑌮𑌨𑌿𑌤𑍍𑌯𑌤𑌾 ।
𑌵𑌾𑌕𑍍𑌚𑍈𑌵 𑌗𑍁𑌪𑍍𑌤𑌾 𑌦𑌾𑌨𑌂 𑌚 𑌨𑍈𑌤𑌾𑌨𑍍𑌯𑌂𑌤𑍍𑌯𑍇𑌷𑍁 𑌭𑌾𑌰𑌤 ॥ 0॥
𑌆𑌕𑍍𑌰𑍋𑌶 𑌪𑌰𑌿𑌵𑌾𑌦𑌾𑌭𑍍𑌯𑌾𑌂 𑌵𑌿𑌹𑌿𑌂𑌸𑌂𑌤𑍍𑌯𑌬𑍁𑌧𑌾 𑌬𑍁𑌧𑌾𑌨𑍍 ।
𑌵𑌕𑍍𑌤𑌾 𑌪𑌾𑌪𑌮𑍁𑌪𑌾𑌦𑌤𑍍𑌤𑍇 𑌕𑍍𑌷𑌮𑌮𑌾𑌣𑍋 𑌵𑌿𑌮𑍁𑌚𑍍𑌯𑌤𑍇 ॥ 1॥
𑌹𑌿𑌂𑌸𑌾 𑌬𑌲𑌮𑌸𑌾𑌧𑍂𑌨𑌾𑌂 𑌰𑌾𑌜𑍍𑌞𑌾𑌂 𑌦𑌂𑌡𑌵𑌿𑌧𑌿𑌰𑍍𑌬𑌲𑌮𑍍 ।
𑌶𑍁𑌶𑍍𑌰𑍂𑌷𑌾 𑌤𑍁 𑌬𑌲𑌂 𑌸𑍍𑌤𑍍𑌰𑍀𑌣𑌾𑌂 𑌕𑍍𑌷𑌮𑌾𑌗𑍁𑌣𑌵𑌤𑌾𑌂 𑌬𑌲𑌮𑍍 ॥ 2॥
𑌵𑌾𑌕𑍍𑌸𑌂𑌯𑌮𑍋 𑌹𑌿 𑌨𑍃𑌪𑌤𑍇 𑌸𑍁𑌦𑍁𑌷𑍍𑌕𑌰𑌤𑌮𑍋 𑌮𑌤𑌃 ।
𑌅𑌰𑍍𑌥𑌵𑌚𑍍𑌚 𑌵𑌿𑌚𑌿𑌤𑍍𑌰𑌂 𑌚 𑌨 𑌶𑌕𑍍𑌯𑌂 𑌬𑌹𑍁𑌭𑌾𑌷𑌿𑌤𑍁𑌮𑍍 ॥ 3॥
𑌅𑌭𑍍𑌯𑌾𑌵𑌹𑌤𑌿 𑌕𑌲𑍍𑌯𑌾𑌣𑌂 𑌵𑌿𑌵𑌿𑌧𑌾 𑌵𑌾𑌕𑍍𑌸𑍁𑌭𑌾𑌷𑌿𑌤𑌾 ।
𑌸𑍈𑌵 𑌦𑍁𑌰𑍍𑌭𑌾𑌷𑌿𑌤𑌾 𑌰𑌾𑌜𑌨𑍍𑌨𑌨𑌰𑍍𑌥𑌾𑌯𑍋𑌪𑌪𑌦𑍍𑌯𑌤𑍇 ॥ 4॥
𑌸𑌂𑌰𑍋𑌹𑌤𑌿 𑌶𑌰𑍈𑌰𑍍𑌵𑌿𑌦𑍍𑌧𑌂 𑌵𑌨𑌂 𑌪𑌰𑌶𑍁𑌨𑌾 𑌹𑌤𑌮𑍍 ।
𑌵𑌾𑌚𑌾 𑌦𑍁𑌰𑍁𑌕𑍍𑌤𑌂 𑌬𑍀𑌭𑌤𑍍𑌸𑌂 𑌨 𑌸𑌂𑌰𑍋𑌹𑌤𑌿 𑌵𑌾𑌕𑍍𑌕𑍍𑌷𑌤𑌮𑍍 ॥ 5॥
𑌕𑌰𑍍𑌣𑌿𑌨𑌾𑌲𑍀𑌕𑌨𑌾𑌰𑌾𑌚𑌾 𑌨𑌿𑌰𑍍𑌹𑌰𑌂𑌤𑌿 𑌶𑌰𑍀𑌰𑌤𑌃 ।
𑌵𑌾𑌕𑍍𑌷𑌲𑍍𑌯𑌸𑍍𑌤𑍁 𑌨 𑌨𑌿𑌰𑍍𑌹𑌰𑍍𑌤𑍁𑌂 𑌶𑌕𑍍𑌯𑍋 𑌹𑍃𑌦𑌿 𑌶𑌯𑍋 𑌹𑌿 𑌸𑌃 ॥ 6॥
𑌵𑌾𑌕𑍍𑌸𑌾𑌯𑌕𑌾 𑌵𑌦𑌨𑌾𑌨𑍍𑌨𑌿𑌷𑍍𑌪𑌤𑌂𑌤𑌿
𑌯𑍈𑌰𑌾𑌹𑌤𑌃 𑌶𑍋𑌚𑌤𑌿 𑌰𑌤𑍍𑌰𑍍𑌯𑌹𑌾𑌨𑌿 ।
𑌪𑌰𑌸𑍍𑌯 𑌨𑌾𑌮𑌰𑍍𑌮𑌸𑍁 𑌤𑍇 𑌪𑌤𑌂𑌤𑌿
𑌤𑌾𑌨𑍍𑌪𑌂𑌡𑌿𑌤𑍋 𑌨𑌾𑌵𑌸𑍃𑌜𑍇𑌤𑍍𑌪𑌰𑍇𑌷𑍁 ॥ ॥
𑌯𑌸𑍍𑌮𑍈 𑌦𑍇𑌵𑌾𑌃 𑌪𑍍𑌰𑌯𑌚𑍍𑌛𑌂𑌤𑌿 𑌪𑍁𑌰𑍁𑌷𑌾𑌯 𑌪𑌰𑌾𑌭𑌵𑌮𑍍 ।
𑌬𑍁𑌦𑍍𑌧𑌿𑌂 𑌤𑌸𑍍𑌯𑌾𑌪𑌕𑌰𑍍𑌷𑌂𑌤𑌿 𑌸𑍋𑌽𑌪𑌾𑌚𑍀𑌨𑌾𑌨𑌿 𑌪𑌶𑍍𑌯𑌤𑌿 ॥ ॥
𑌬𑍁𑌦𑍍𑌧𑍌 𑌕𑌲𑍁𑌷 𑌭𑍂𑌤𑌾𑌯𑌾𑌂 𑌵𑌿𑌨𑌾𑌶𑍇 𑌪𑍍𑌰𑌤𑍍𑌯𑍁𑌪𑌸𑍍𑌥𑌿𑌤𑍇 ।
𑌅𑌨𑌯𑍋 𑌨𑌯𑌸𑌂𑌕𑌾𑌶𑍋 𑌹𑍃𑌦𑌯𑌾𑌨𑍍𑌨𑌾𑌪𑌸𑌰𑍍𑌪𑌤𑌿 ॥ ॥
𑌸𑍇𑌯𑌂 𑌬𑍁𑌦𑍍𑌧𑌿𑌃 𑌪𑌰𑍀𑌤𑌾 𑌤𑍇 𑌪𑍁𑌤𑍍𑌰𑌾𑌣𑌾𑌂 𑌤𑌵 𑌭𑌾𑌰𑌤 ।
𑌪𑌾𑌂𑌡𑌵𑌾𑌨𑌾𑌂 𑌵𑌿𑌰𑍋𑌧𑍇𑌨 𑌨 𑌚𑍈𑌨𑌾𑌂 𑌅𑌵𑌬𑍁𑌧𑍍𑌯𑌸𑍇 ॥ 0॥
𑌰𑌾𑌜𑌾 𑌲𑌕𑍍𑌷𑌣𑌸𑌂𑌪𑌨𑍍𑌨𑌸𑍍𑌤𑍍𑌰𑍈𑌲𑍋𑌕𑍍𑌯𑌸𑍍𑌯𑌾𑌪𑌿 𑌯𑍋 𑌭𑌵𑍇𑌤𑍍 ।
𑌶𑌿𑌷𑍍𑌯𑌸𑍍𑌤𑍇 𑌶𑌾𑌸𑌿𑌤𑌾 𑌸𑍋𑌽𑌸𑍍𑌤𑍁 𑌧𑍃𑌤𑌰𑌾𑌷𑍍𑌟𑍍𑌰 𑌯𑍁𑌧𑌿𑌷𑍍𑌠𑌿𑌰𑌃 ॥ 1॥
𑌅𑌤𑍀𑌵 𑌸𑌰𑍍𑌵𑌾𑌨𑍍𑌪𑍁𑌤𑍍𑌰𑌾𑌂𑌸𑍍𑌤𑍇 𑌭𑌾𑌗𑌧𑍇𑌯 𑌪𑍁𑌰𑌸𑍍𑌕𑍃𑌤𑌃 ।
𑌤𑍇𑌜𑌸𑌾 𑌪𑍍𑌰𑌜𑍍𑌞𑌯𑌾 𑌚𑍈𑌵 𑌯𑍁𑌕𑍍𑌤𑍋 𑌧𑌰𑍍𑌮𑌾𑌰𑍍𑌥𑌤𑌤𑍍𑌤𑍍𑌵𑌵𑌿𑌤𑍍 ॥ 2॥
𑌆𑌨𑍃𑌶𑌂𑌸𑍍𑌯𑌾𑌦𑌨𑍁𑌕𑍍𑌰𑍋𑌶𑌾𑌦𑍍𑌯𑍋𑌽𑌸𑍌 𑌧𑌰𑍍𑌮𑌭𑍃𑌤𑌾𑌂 𑌵𑌰𑌃 ।
𑌗𑍌𑌰𑌵𑌾𑌤𑍍𑌤𑌵 𑌰𑌾𑌜𑍇𑌂𑌦𑍍𑌰 𑌬𑌹𑍂𑌨𑍍𑌕𑍍𑌲𑍇𑌶𑌾𑌂𑌸𑍍𑌤𑌿𑌤𑌿𑌕𑍍𑌷𑌤𑌿 ॥ 3॥
॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿
𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥ 34॥
