𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌸𑌂𑌹𑌿𑌤𑌾𑌯𑌾-𑌞𑍍𑌚𑌤𑍁𑌰𑍍𑌥𑌕𑌾𑌣𑍍𑌡𑍇 𑌚𑌤𑍁𑌰𑍍𑌥𑌃 𑌪𑍍𑌰𑌶𑍍𑌨𑌃 – 𑌪𑌞𑍍𑌚𑌮𑌚𑌿𑌤𑌿𑌶𑍇𑌷𑌨𑌿𑌰𑍂𑌪𑌣𑌂
𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,
𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥
𑌰॒𑌶𑍍𑌮𑌿𑌰॑𑌸𑌿॒ 𑌕𑍍𑌷𑌯𑌾॑𑌯 𑌤𑍍𑌵𑌾॒ 𑌕𑍍𑌷𑌯॑-𑌞𑍍𑌜𑌿𑌨𑍍𑌵॒ 𑌪𑍍𑌰𑍇𑌤𑌿॑𑌰𑌸𑌿॒ 𑌧𑌰𑍍𑌮𑌾॑𑌯 𑌤𑍍𑌵𑌾॒ 𑌧𑌰𑍍𑌮॑-𑌞𑍍𑌜𑌿॒𑌨𑍍𑌵𑌾𑌨𑍍𑌵𑌿॑𑌤𑌿𑌰𑌸𑌿 𑌦𑌿॒𑌵𑍇 𑌤𑍍𑌵𑌾॒ 𑌦𑌿𑌵॑-𑌞𑍍𑌜𑌿𑌨𑍍𑌵 𑌸॒𑌨𑍍𑌧𑌿𑌰॑𑌸𑍍𑌯॒𑌨𑍍𑌤𑌰𑌿॑𑌕𑍍𑌷𑌾𑌯 𑌤𑍍𑌵𑌾॒-𑌽𑌨𑍍𑌤𑌰𑌿॑𑌕𑍍𑌷-𑌞𑍍𑌜𑌿𑌨𑍍𑌵 𑌪𑍍𑌰𑌤𑌿॒𑌧𑌿𑌰॑𑌸𑌿 𑌪𑍃𑌥𑌿॒𑌵𑍍𑌯𑍈 𑌤𑍍𑌵𑌾॑ 𑌪𑍃𑌥𑌿॒𑌵𑍀-𑌞𑍍𑌜𑌿॑𑌨𑍍𑌵 𑌵𑌿𑌷𑍍𑌟॒𑌭𑍋𑌂॑-𑌽𑌸𑌿॒ 𑌵𑍃𑌷𑍍𑌟𑍍𑌯𑍈᳚ 𑌤𑍍𑌵𑌾॒ 𑌵𑍃𑌷𑍍𑌟𑌿॑-𑌞𑍍𑌜𑌿𑌨𑍍𑌵 𑌪𑍍𑌰॒𑌵𑌾-𑌽𑌸𑍍𑌯𑌹𑍍𑌨𑍇॒ 𑌤𑍍𑌵𑌾-𑌽𑌹॑𑌰𑍍𑌜𑌿𑌨𑍍𑌵𑌾𑌨𑍁॒ 𑌵𑌾-𑌽𑌸𑌿॒ 𑌰𑌾𑌤𑍍𑌰𑌿॑𑌯𑍈 𑌤𑍍𑌵𑌾॒ 𑌰𑌾𑌤𑍍𑌰𑌿॑-𑌞𑍍𑌜𑌿𑌨𑍍𑌵𑍋॒ 𑌶𑌿𑌗॑𑌸𑌿॒ [𑌰𑌾𑌤𑍍𑌰𑌿॑-𑌞𑍍𑌜𑌿𑌨𑍍𑌵𑍋॒ 𑌶𑌿𑌗॑𑌸𑌿, 𑌵𑌸𑍁॑𑌭𑍍𑌯𑌸𑍍𑌤𑍍𑌵𑌾॒] 1
𑌵𑌸𑍁॑𑌭𑍍𑌯𑌸𑍍𑌤𑍍𑌵𑌾॒ 𑌵𑌸𑍂᳚𑌞𑍍𑌜𑌿𑌨𑍍𑌵 𑌪𑍍𑌰𑌕𑍇॒𑌤𑍋॑-𑌽𑌸𑌿 𑌰𑍁॒𑌦𑍍𑌰𑍇𑌭𑍍𑌯॑𑌸𑍍𑌤𑍍𑌵𑌾 𑌰𑍁॒𑌦𑍍𑌰𑌾𑌞𑍍𑌜𑌿॑𑌨𑍍𑌵 𑌸𑍁𑌦𑍀॒𑌤𑌿𑌰॑𑌸𑍍𑌯𑌾𑌦𑌿॒𑌤𑍍𑌯𑍇𑌭𑍍𑌯॑𑌸𑍍𑌤𑍍𑌵𑌾 𑌽𑌽𑌦𑌿॒𑌤𑍍𑌯𑌾𑌞𑍍𑌜𑌿॒𑌨𑍍𑌵𑍌𑌜𑍋॑-𑌽𑌸𑌿 𑌪𑌿॒𑌤𑍃𑌭𑍍𑌯॑𑌸𑍍𑌤𑍍𑌵𑌾 𑌪𑌿॒𑌤𑍄𑌞𑍍𑌜𑌿॑𑌨𑍍𑌵॒ 𑌤𑌨𑍍𑌤𑍁॑𑌰𑌸𑌿 𑌪𑍍𑌰॒𑌜𑌾𑌭𑍍𑌯॑𑌸𑍍𑌤𑍍𑌵𑌾 𑌪𑍍𑌰॒𑌜𑌾 𑌜𑌿॑𑌨𑍍𑌵 𑌪𑍃𑌤𑌨𑌾॒𑌷𑌾𑌡॑𑌸𑌿 𑌪॒𑌶𑍁𑌭𑍍𑌯॑𑌸𑍍𑌤𑍍𑌵𑌾 𑌪॒𑌶𑍂𑌞𑍍𑌜𑌿॑𑌨𑍍𑌵 𑌰𑍇॒𑌵𑌦॒𑌸𑍍𑌯𑍋𑌷॑𑌧𑍀𑌭𑍍𑌯॒-𑌸𑍍𑌤𑍍𑌵𑍌𑌷॑𑌧𑍀-𑌰𑍍𑌜𑌿𑌨𑍍𑌵𑌾𑌭𑌿॒𑌜𑌿𑌦॑𑌸𑌿 𑌯𑍁॒𑌕𑍍𑌤𑌗𑍍𑌰𑌾॒𑌵𑍇𑌨𑍍𑌦𑍍𑌰𑌾॑𑌯॒ 𑌤𑍍𑌵𑍇𑌨𑍍𑌦𑍍𑌰॑-𑌞𑍍𑌜𑌿॒𑌨𑍍𑌵𑌾𑌧𑌿॑𑌪𑌤𑌿𑌰𑌸𑌿 𑌪𑍍𑌰𑌾॒𑌣𑌾𑌯॑ [𑌪𑍍𑌰𑌾॒𑌣𑌾𑌯॑, 𑌤𑍍𑌵𑌾॒ 𑌪𑍍𑌰𑌾॒𑌣-𑌞𑍍𑌜𑌿॑𑌨𑍍𑌵] 2
𑌤𑍍𑌵𑌾 𑌪𑍍𑌰𑌾॒𑌣-𑌞𑍍𑌜𑌿॑𑌨𑍍𑌵 𑌯॒𑌨𑍍𑌤𑌾-𑌽𑌸𑍍𑌯॑𑌪𑌾॒𑌨𑌾𑌯॑ 𑌤𑍍𑌵𑌾-𑌽𑌪𑌾॒𑌨-𑌞𑍍𑌜𑌿॑𑌨𑍍𑌵 𑌸॒𑌗𑍍𑌮𑍍॒𑌸𑌰𑍍𑌪𑍋॑-𑌽𑌸𑌿॒ 𑌚𑌕𑍍𑌷𑍁॑𑌷𑍇 𑌤𑍍𑌵𑌾॒ 𑌚𑌕𑍍𑌷𑍁॑𑌰𑍍𑌜𑌿𑌨𑍍𑌵 𑌵𑌯𑍋॒𑌧𑌾 𑌅॑𑌸𑌿॒ 𑌶𑍍𑌰𑍋𑌤𑍍𑌰𑌾॑𑌯 𑌤𑍍𑌵𑌾॒ 𑌶𑍍𑌰𑍋𑌤𑍍𑌰॑-𑌞𑍍𑌜𑌿𑌨𑍍𑌵 𑌤𑍍𑌰𑌿॒𑌵𑍃𑌦॑𑌸𑌿 𑌪𑍍𑌰॒𑌵𑍃𑌦॑𑌸𑌿 𑌸𑌂॒𑌵𑍃𑌁𑌦॑𑌸𑌿 𑌵𑌿॒𑌵𑍃𑌦॑𑌸𑌿 𑌸𑌗𑍍𑌮𑍍𑌰𑍋॒𑌹𑍋॑-𑌽𑌸𑌿 𑌨𑍀𑌰𑍋॒𑌹𑍋॑-𑌽𑌸𑌿 𑌪𑍍𑌰𑌰𑍋॒𑌹𑍋᳚-𑌽𑌸𑍍𑌯𑌨𑍁𑌰𑍋॒𑌹𑍋॑-𑌽𑌸𑌿 𑌵𑌸𑍁॒𑌕𑍋॑-𑌽𑌸𑌿॒ 𑌵𑍇𑌷॑𑌶𑍍𑌰𑌿𑌰𑌸𑌿॒ 𑌵𑌸𑍍𑌯॑𑌷𑍍𑌟𑌿𑌰𑌸𑌿 ॥ 3 ॥
(𑌉॒𑌶𑌿𑌗॑𑌸𑌿 – 𑌪𑍍𑌰𑌾॒𑌣𑌾𑌯॒ – 𑌤𑍍𑌰𑌿𑌚॑𑌤𑍍𑌵𑌾𑌰𑌿𑌗𑍍𑌮𑍍𑌶𑌚𑍍𑌚) (𑌅. 1)
𑌰𑌾𑌜𑍍𑌞𑍍𑌯॑𑌸𑌿॒ 𑌪𑍍𑌰𑌾𑌚𑍀॒ 𑌦𑌿𑌗𑍍𑌵𑌸॑𑌵𑌸𑍍𑌤𑍇 𑌦𑍇॒𑌵𑌾 𑌅𑌧𑌿॑𑌪𑌤𑌯𑍋॒-𑌽𑌗𑍍𑌨𑌿𑌰𑍍𑌹𑍇॑𑌤𑍀॒𑌨𑌾-𑌮𑍍𑌪𑍍𑌰॑𑌤𑌿𑌧॒𑌰𑍍𑌤𑌾॑ 𑌤𑍍𑌰𑌿॒𑌵𑍃-𑌤𑍍𑌤𑍍𑌵𑌾॒ 𑌸𑍍𑌤𑍋𑌮𑌃॑ 𑌪𑍃𑌥𑌿॒𑌵𑍍𑌯𑌾𑌗𑍍 𑌶𑍍𑌰॑𑌯॒𑌤𑍍𑌵𑌾𑌜𑍍𑌯॑-𑌮𑍁॒𑌕𑍍𑌥𑌮𑌵𑍍𑌯॑𑌥𑌯-𑌥𑍍𑌸𑍍𑌤𑌭𑍍𑌨𑌾𑌤𑍁 𑌰𑌥𑌨𑍍𑌤॒𑌰𑌗𑍍𑌮𑍍 𑌸𑌾𑌮॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 𑌵𑌿॒𑌰𑌾𑌡॑𑌸𑌿 𑌦𑌕𑍍𑌷𑌿॒𑌣𑌾 𑌦𑌿𑌗𑍍𑌰𑍁॒𑌦𑍍𑌰𑌾𑌸𑍍𑌤𑍇॑ 𑌦𑍇॒𑌵𑌾 𑌅𑌧𑌿॑𑌪𑌤𑌯॒ 𑌇𑌨𑍍𑌦𑍍𑌰𑍋॑ 𑌹𑍇𑌤𑍀॒𑌨𑌾-𑌮𑍍𑌪𑍍𑌰॑𑌤𑌿𑌧॒𑌰𑍍𑌤𑌾 𑌪॑𑌞𑍍𑌚𑌦॒𑌶𑌸𑍍𑌤𑍍𑌵𑌾॒ 𑌸𑍍𑌤𑍋𑌮𑌃॑ 𑌪𑍃𑌥𑌿॒𑌵𑍍𑌯𑌾𑌗𑍍 𑌶𑍍𑌰॑𑌯𑌤𑍁॒ 𑌪𑍍𑌰-𑌉॑𑌗𑌮𑍁॒𑌕𑍍𑌥-𑌮𑌵𑍍𑌯॑𑌥𑌯-𑌥𑍍𑌸𑍍𑌤𑌭𑍍𑌨𑌾𑌤𑍁 𑌬𑍃॒𑌹-𑌥𑍍𑌸𑌾𑌮॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 𑌸॒𑌮𑍍𑌰𑌾𑌡॑𑌸𑌿 𑌪𑍍𑌰॒𑌤𑍀𑌚𑍀॒ 𑌦𑌿- [𑌦𑌿𑌕𑍍, 𑌆॒𑌦𑌿॒𑌤𑍍𑌯𑌾𑌸𑍍𑌤𑍇॑] 4
-𑌗𑌾॑𑌦𑌿॒𑌤𑍍𑌯𑌾𑌸𑍍𑌤𑍇॑ 𑌦𑍇॒𑌵𑌾 𑌅𑌧𑌿॑𑌪𑌤𑌯॒-𑌸𑍍𑌸𑍋𑌮𑍋॑ 𑌹𑍇𑌤𑍀॒𑌨𑌾-𑌮𑍍𑌪𑍍𑌰॑𑌤𑌿𑌧॒𑌰𑍍𑌤𑌾 𑌸॑𑌪𑍍𑌤𑌦॒𑌶𑌸𑍍𑌤𑍍𑌵𑌾॒ 𑌸𑍍𑌤𑍋𑌮𑌃॑ 𑌪𑍃𑌥𑌿॒𑌵𑍍𑌯𑌾𑌗𑍍 𑌶𑍍𑌰॑𑌯𑌤𑍁 𑌮𑌰𑍁𑌤𑍍𑌵॒𑌤𑍀𑌯॑𑌮𑍁॒𑌕𑍍𑌥-𑌮𑌵𑍍𑌯॑𑌥𑌯-𑌥𑍍𑌸𑍍𑌤𑌭𑍍𑌨𑌾𑌤𑍁 𑌵𑍈𑌰𑍂॒𑌪𑌗𑍍𑌮𑍍 𑌸𑌾𑌮॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑌾𑌯𑍈 𑌸𑍍𑌵॒𑌰𑌾𑌡॒𑌸𑍍𑌯𑍁𑌦𑍀॑𑌚𑍀॒ 𑌦𑌿𑌗𑍍 𑌵𑌿𑌶𑍍𑌵𑍇॑ 𑌤𑍇 𑌦𑍇॒𑌵𑌾 𑌅𑌧𑌿॑𑌪𑌤𑌯𑍋॒ 𑌵𑌰𑍁॑𑌣𑍋 𑌹𑍇𑌤𑍀॒𑌨𑌾-𑌮𑍍𑌪𑍍𑌰॑𑌤𑌿𑌧॒𑌰𑍍𑌤𑍈𑌕॑𑌵𑌿॒𑌗𑍍𑌮𑍍॒𑌶 𑌸𑍍𑌤𑍍𑌵𑌾॒ 𑌸𑍍𑌤𑍋𑌮𑌃॑ 𑌪𑍃𑌥𑌿॒𑌵𑍍𑌯𑌾𑌗𑍍 𑌶𑍍𑌰॑𑌯𑌤𑍁॒ 𑌨𑌿𑌷𑍍𑌕𑍇॑𑌵𑌲𑍍𑌯-𑌮𑍁॒𑌕𑍍𑌥𑌮𑌵𑍍𑌯॑𑌥𑌯-𑌥𑍍𑌸𑍍𑌤𑌭𑍍𑌨𑌾𑌤𑍁 𑌵𑍈𑌰𑌾॒𑌜𑌗𑍍𑌮𑍍 𑌸𑌾𑌮॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑌾॒ 𑌅𑌧𑌿॑𑌪𑌤𑍍𑌨𑍍𑌯𑌸𑌿 𑌬𑍃𑌹॒𑌤𑍀 𑌦𑌿𑌮𑍍𑌮॒𑌰𑍁𑌤॑𑌸𑍍𑌤𑍇 𑌦𑍇॒𑌵𑌾 𑌅𑌧𑌿॑𑌪𑌤𑌯𑍋॒ [𑌅𑌧𑌿॑𑌪𑌤𑌯𑌃, 𑌬𑍃𑌹॒𑌸𑍍𑌪𑌤𑌿॑𑌰𑍍𑌹𑍇𑌤𑍀॒-] 5
𑌬𑍃𑌹॒𑌸𑍍𑌪𑌤𑌿॑𑌰𑍍𑌹𑍇𑌤𑍀॒𑌨𑌾-𑌮𑍍𑌪𑍍𑌰॑𑌤𑌿𑌧॒𑌰𑍍𑌤𑌾 𑌤𑍍𑌰𑌿॑𑌣𑌵𑌤𑍍𑌰𑌯𑌸𑍍𑌤𑍍𑌰𑌿॒𑌗𑍍𑌮𑍍॒𑌶𑍌 𑌤𑍍𑌵𑌾॒ 𑌸𑍍𑌤𑍋𑌮𑍌॑ 𑌪𑍃𑌥𑌿॒𑌵𑍍𑌯𑌾𑌗𑍍 𑌶𑍍𑌰॑𑌯𑌤𑌾𑌂-𑌵𑍈𑌁𑌶𑍍𑌵𑌦𑍇𑌵𑌾𑌗𑍍𑌨𑌿𑌮𑌾𑌰𑍁॒𑌤𑍇 𑌉॒𑌕𑍍𑌥𑍇 𑌅𑌵𑍍𑌯॑𑌥𑌯𑌨𑍍𑌤𑍀 𑌸𑍍𑌤𑌭𑍍𑌨𑍀𑌤𑌾𑌗𑍍𑌮𑍍 𑌶𑌾𑌕𑍍𑌵𑌰𑌰𑍈𑌵॒𑌤𑍇 𑌸𑌾𑌮॑𑌨𑍀॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑌾 𑌅॒𑌨𑍍𑌤𑌰𑌿॑𑌕𑍍𑌷𑌾॒𑌯𑌰𑍍𑌷॑𑌯𑌸𑍍𑌤𑍍𑌵𑌾 𑌪𑍍𑌰𑌥𑌮॒𑌜𑌾 𑌦𑍇॒𑌵𑍇𑌷𑍁॑ 𑌦𑌿॒𑌵𑍋 𑌮𑌾𑌤𑍍𑌰॑𑌯𑌾 𑌵𑌰𑌿॒𑌣𑌾 𑌪𑍍𑌰॑𑌥𑌨𑍍𑌤𑍁 𑌵𑌿𑌧॒𑌰𑍍𑌤𑌾 𑌚𑌾॒𑌯𑌮𑌧𑌿॑𑌪𑌤𑌿𑌶𑍍𑌚॒ 𑌤𑍇 𑌤𑍍𑌵𑌾॒ 𑌸𑌰𑍍𑌵𑍇॑ 𑌸𑌂𑌵𑌿𑌁𑌦𑌾॒𑌨𑌾 𑌨𑌾𑌕॑𑌸𑍍𑌯 𑌪𑍃॒𑌷𑍍𑌠𑍇 𑌸𑍁॑𑌵॒𑌰𑍍𑌗𑍇 𑌲𑍋॒𑌕𑍇 𑌯𑌜॑𑌮𑌾𑌨-𑌞𑍍𑌚 𑌸𑌾𑌦𑌯𑌨𑍍𑌤𑍁 ॥ 6 ॥
(𑌪𑍍𑌰॒𑌤𑍀𑌚𑍀॒ 𑌦𑌿𑌂 – 𑌮॒𑌰𑍁𑌤॑𑌸𑍍𑌤𑍇 𑌦𑍇॒𑌵𑌾 𑌅𑌧𑌿॑𑌪𑌤𑌯 – 𑌶𑍍𑌚𑌤𑍍𑌵𑌾𑌰𑌿॒𑌗𑍍𑌮𑍍॒𑌶𑌚𑍍𑌚॑) (𑌅. 2)
𑌅॒𑌯-𑌮𑍍𑌪𑍁॒𑌰𑍋 𑌹𑌰𑌿॑𑌕𑍇𑌶॒-𑌸𑍍𑌸𑍂𑌰𑍍𑌯॑𑌰𑌶𑍍𑌮𑌿॒𑌸𑍍𑌤𑌸𑍍𑌯॑ 𑌰𑌥𑌗𑍃॒𑌥𑍍𑌸𑌶𑍍𑌚॒ 𑌰𑌥𑍌॑𑌜𑌾𑌶𑍍𑌚 𑌸𑍇𑌨𑌾𑌨𑌿 𑌗𑍍𑌰𑌾𑌮॒𑌣𑍍𑌯𑍌॑ 𑌪𑍁𑌞𑍍𑌜𑌿𑌕𑌸𑍍𑌥॒𑌲𑌾 𑌚॑ 𑌕𑍃𑌤𑌸𑍍𑌥॒𑌲𑌾 𑌚𑌾᳚𑌫𑍍𑌸॒𑌰𑌸𑍌॑ 𑌯𑌾𑌤𑍁॒𑌧𑌾𑌨𑌾॑ 𑌹𑍇॒𑌤𑍀 𑌰𑌕𑍍𑌷𑌾𑌗𑍍𑌮𑍍॑𑌸𑌿॒ 𑌪𑍍𑌰𑌹𑍇॑𑌤𑌿 𑌰॒𑌯-𑌨𑍍𑌦॑𑌕𑍍𑌷𑌿॒𑌣𑌾 𑌵𑌿॒𑌶𑍍𑌵 𑌕॑𑌰𑍍𑌮𑌾॒ 𑌤𑌸𑍍𑌯॑ 𑌰𑌥𑌸𑍍𑌵॒𑌨𑌶𑍍𑌚॒ 𑌰𑌥𑍇॑𑌚𑌿𑌤𑍍𑌰𑌶𑍍𑌚 𑌸𑍇𑌨𑌾𑌨𑌿 𑌗𑍍𑌰𑌾𑌮॒𑌣𑍍𑌯𑍌॑ 𑌮𑍇𑌨॒𑌕𑌾 𑌚॑ 𑌸𑌹𑌜॒𑌨𑍍𑌯𑌾 𑌚𑌾᳚𑌫𑍍𑌸॒𑌰𑌸𑍌॑ 𑌦𑌂॒𑌣𑌵𑌃॑ 𑌪॒𑌶𑌵𑍋॑ 𑌹𑍇॒𑌤𑌿𑌃 𑌪𑍌𑌰𑍁॑𑌷𑍇𑌯𑍋 𑌵॒𑌧𑌃 𑌪𑍍𑌰𑌹𑍇॑𑌤𑌿 𑌰॒𑌯-𑌮𑍍𑌪॒𑌶𑍍𑌚𑌾-𑌦𑍍𑌵𑌿॒𑌶𑍍𑌵𑌵𑍍𑌯॑𑌚𑌾॒ 𑌸𑍍𑌤𑌸𑍍𑌯॒ 𑌰𑌥॑ 𑌪𑍍𑌰𑍋𑌤॒𑌶𑍍𑌚𑌾-𑌸॑𑌮𑌰𑌥𑌶𑍍𑌚 𑌸𑍇𑌨𑌾𑌨𑌿 𑌗𑍍𑌰𑌾𑌮॒𑌣𑍍𑌯𑍌᳚ 𑌪𑍍𑌰॒𑌮𑍍𑌲𑍋𑌚॑𑌨𑍍𑌤𑍀 𑌚𑌾- [𑌪𑍍𑌰॒𑌮𑍍𑌲𑍋𑌚॑𑌨𑍍𑌤𑍀 𑌚, 𑌅॒𑌨𑍁॒𑌮𑍍𑌲𑍋𑌚॑𑌨𑍍𑌤𑍀-]
-𑌽𑌨𑍁॒𑌮𑍍𑌲𑍋𑌚॑𑌨𑍍𑌤𑍀-𑌚𑌾𑌫𑍍𑌸॒𑌰𑌸𑍌॑ 𑌸॒𑌰𑍍𑌪𑌾 𑌹𑍇॒𑌤𑌿 𑌰𑍍𑌵𑍍𑌯𑌾॒𑌘𑍍𑌰𑌾𑌃 𑌪𑍍𑌰𑌹𑍇॑𑌤𑌿 𑌰॒𑌯 𑌮𑍁॑𑌤𑍍𑌤॒𑌰𑌾-𑌥𑍍𑌸𑌂॒𑌯𑌁𑌞𑍍𑌦𑍍- 𑌵॑𑌸𑍁॒𑌸𑍍𑌤𑌸𑍍𑌯॑ 𑌸𑍇𑌨॒𑌜𑌿𑌚𑍍𑌚॑ 𑌸𑍁॒𑌷𑍇𑌣॑𑌶𑍍𑌚 𑌸𑍇𑌨𑌾𑌨𑌿 𑌗𑍍𑌰𑌾𑌮॒𑌣𑍍𑌯𑍌॑ 𑌵𑌿॒𑌶𑍍𑌵𑌾𑌚𑍀॑ 𑌚 𑌘𑍃॒𑌤𑌾𑌚𑍀॑ 𑌚𑌾𑌫𑍍𑌸॒𑌰𑌸𑌾॒ 𑌵𑌾𑌪𑍋॑ 𑌹𑍇॒𑌤𑌿 𑌰𑍍𑌵𑌾𑌤𑌃॒ 𑌪𑍍𑌰𑌹𑍇॑𑌤𑌿 𑌰॒𑌯𑌮𑍁॒𑌪𑌰𑍍𑌯॒ 𑌰𑍍𑌵𑌾𑌗𑍍𑌵॑-𑌸𑍁॒𑌸𑍍𑌤𑌸𑍍𑌯॒ 𑌤𑌾𑌰𑍍𑌕𑍍𑌷𑍍𑌯॒-𑌶𑍍𑌚𑌾𑌰𑌿॑𑌷𑍍𑌟-𑌨𑍇𑌮𑌿𑌶𑍍𑌚 𑌸𑍇𑌨𑌾𑌨𑌿 𑌗𑍍𑌰𑌾𑌮॒𑌣𑍍𑌯𑌾॑ 𑌵𑍁॒𑌰𑍍𑌵𑌶𑍀॑ 𑌚 𑌪𑍂॒𑌰𑍍𑌵𑌚𑌿॑𑌤𑍍𑌤𑌿𑌶𑍍𑌚𑌾-𑌫𑍍𑌸॒𑌰𑌸𑍌॑ 𑌵𑌿॒𑌦𑍍𑌯𑍁𑌦𑍍𑌧𑍇॒𑌤𑌿𑌰॑-𑌵॒𑌸𑍍𑌫𑍂𑌰𑍍𑌜॒-𑌨𑍍𑌪𑍍𑌰𑌹𑍇॑𑌤𑌿॒ 𑌸𑍍𑌤𑍇𑌭𑍍𑌯𑍋॒ 𑌨𑌮॒𑌸𑍍𑌤𑍇 𑌨𑍋॑ 𑌮𑍃𑌡𑌯𑌨𑍍𑌤𑍁॒ 𑌤𑍇 𑌯- [𑌤𑍇 𑌯𑌮𑍍, 𑌦𑍍𑌵𑌿॒𑌷𑍍𑌮𑍋]
-𑌨𑍍𑌦𑍍𑌵𑌿॒𑌷𑍍𑌮𑍋 𑌯𑌶𑍍𑌚॑ 𑌨𑍋॒ 𑌦𑍍𑌵𑍇𑌷𑍍𑌟𑌿॒ 𑌤𑌂-𑌵𑍋𑌁॒ 𑌜𑌮𑍍𑌭𑍇॑ 𑌦𑌧𑌾𑌮𑍍𑌯𑌾॒𑌯𑍋𑌸𑍍𑌤𑍍𑌵𑌾॒ 𑌸𑌦॑𑌨𑍇 𑌸𑌾𑌦𑌯𑌾॒𑌮𑍍𑌯𑌵॑𑌤 𑌶𑍍𑌛𑌾॒𑌯𑌾𑌯𑌾॒-𑌨𑍍𑌨𑌮॑-𑌸𑍍𑌸𑌮𑍁॒𑌦𑍍𑌰𑌾𑌯॒ 𑌨𑌮॑-𑌸𑍍𑌸𑌮𑍁॒𑌦𑍍𑌰𑌸𑍍𑌯॒ 𑌚𑌕𑍍𑌷॑𑌸𑍇 𑌪𑌰𑌮𑍇॒𑌷𑍍𑌠𑍀 𑌤𑍍𑌵𑌾॑ 𑌸𑌾𑌦𑌯𑌤𑍁 𑌦𑌿॒𑌵𑌃 𑌪𑍃॒𑌷𑍍𑌠𑍇 𑌵𑍍𑌯𑌚॑𑌸𑍍𑌵𑌤𑍀॒-𑌮𑍍𑌪𑍍𑌰𑌥॑𑌸𑍍𑌵𑌤𑍀𑌂-𑌵𑌿𑌁॒𑌭𑍂𑌮॑𑌤𑍀-𑌮𑍍𑌪𑍍𑌰॒𑌭𑍂𑌮॑𑌤𑍀-𑌮𑍍𑌪𑌰𑌿॒𑌭𑍂𑌮॑𑌤𑍀॒-𑌨𑍍𑌦𑌿𑌵𑌂॑-𑌯𑌁𑌚𑍍𑌛॒ 𑌦𑌿𑌵॑-𑌨𑍍𑌦𑍃𑌗𑍍𑌮𑍍𑌹॒ 𑌦𑌿𑌵॒-𑌮𑍍𑌮𑌾 𑌹𑌿𑌗𑍍𑌮𑍍॑𑌸𑍀॒𑌰𑍍𑌵𑌿𑌶𑍍𑌵॑𑌸𑍍𑌮𑍈 𑌪𑍍𑌰𑌾॒𑌣𑌾𑌯𑌾॑𑌪𑌾॒𑌨𑌾𑌯॑ 𑌵𑍍𑌯𑌾॒𑌨𑌾𑌯𑍋॑𑌦𑌾॒𑌨𑌾𑌯॑ 𑌪𑍍𑌰𑌤𑌿॒𑌷𑍍𑌠𑌾𑌯𑍈॑ 𑌚॒𑌰𑌿𑌤𑍍𑌰𑌾॑𑌯॒ 𑌸𑍂𑌰𑍍𑌯॑𑌸𑍍𑌤𑍍𑌵𑌾॒-𑌽𑌭𑌿 𑌪𑌾॑𑌤𑍁 𑌮॒𑌹𑍍𑌯𑌾 𑌸𑍍𑌵॒𑌸𑍍𑌤𑍍𑌯𑌾 𑌛॒𑌰𑍍𑌦𑌿𑌷𑌾॒ 𑌶𑌨𑍍𑌤॑𑌮𑍇𑌨॒ 𑌤𑌯𑌾॑ 𑌦𑍇॒𑌵𑌤॑𑌯𑌾-𑌽𑌙𑍍𑌗𑌿𑌰॒𑌸𑍍𑌵-𑌦𑍍𑌧𑍍𑌰𑍁॒𑌵𑌾 𑌸𑍀॑𑌦 ॥ 𑌪𑍍𑌰𑍋𑌥॒𑌦𑌶𑍍𑌵𑍋॒ 𑌨 𑌯𑌵॑𑌸𑍇 𑌅𑌵𑌿॒𑌷𑍍𑌯𑌨𑍍. 𑌯॒𑌦𑌾 𑌮॒𑌹-𑌸𑍍𑌸॒𑌵𑌁𑌰॑𑌣𑌾॒-𑌦𑍍𑌵𑍍𑌯𑌸𑍍𑌥𑌾᳚𑌤𑍍 । 𑌆𑌦॑𑌸𑍍𑌯॒ 𑌵𑌾𑌤𑍋॒ 𑌅𑌨𑍁॑ 𑌵𑌾𑌤𑌿 𑌶𑍋॒𑌚𑌿𑌰𑌧॑ 𑌸𑍍𑌮 𑌤𑍇॒ 𑌵𑍍𑌰𑌜॑𑌨-𑌙𑍍𑌕𑍃॒𑌷𑍍𑌣𑌮॑𑌸𑍍𑌤𑌿 ॥ ॥
(𑌪𑍍𑌰॒𑌮𑍍𑌲𑍋𑌚॑𑌨𑍍𑌤𑍀 𑌚॒ – 𑌯𑌗𑍍𑌗𑍍 – 𑌸𑍍𑌵॒𑌸𑍍𑌤𑍍𑌯𑌾 – 𑌽𑌷𑍍𑌟𑌾𑌵𑌿𑌗𑍍𑌮𑍍॑𑌶𑌤𑌿𑌶𑍍𑌚) (𑌅. 3)
𑌅॒𑌗𑍍𑌨𑌿𑌰𑍍𑌮𑍂॒𑌰𑍍𑌧𑌾 𑌦𑌿॒𑌵𑌃 𑌕॒𑌕𑍁-𑌤𑍍𑌪𑌤𑌿𑌃॑ 𑌪𑍃𑌥𑌿॒𑌵𑍍𑌯𑌾 𑌅॒𑌯𑌮𑍍 । 𑌅॒𑌪𑌾𑌗𑍍𑌮𑍍 𑌰𑍇𑌤𑌾𑌗𑍍𑌮𑍍॑𑌸𑌿 𑌜𑌿𑌨𑍍𑌵𑌤𑌿 ॥ 𑌤𑍍𑌵𑌾𑌮॑𑌗𑍍𑌨𑍇॒ 𑌪𑍁𑌷𑍍𑌕॑𑌰𑌾॒𑌦𑌦𑍍𑌧𑍍𑌯𑌥॑𑌰𑍍𑌵𑌾॒ 𑌨𑌿𑌰॑𑌮𑌨𑍍𑌥𑌤 । 𑌮𑍂॒𑌰𑍍𑌧𑍍𑌨𑍋 𑌵𑌿𑌶𑍍𑌵॑𑌸𑍍𑌯 𑌵𑌾॒𑌘𑌤𑌃॑ ॥ 𑌅॒𑌯𑌮॒𑌗𑍍𑌨𑌿-𑌸𑍍𑌸॑𑌹॒𑌸𑍍𑌰𑌿𑌣𑍋॒ 𑌵𑌾𑌜॑𑌸𑍍𑌯 𑌶॒𑌤𑌿𑌨॒𑌸𑍍𑌪𑌤𑌿𑌃॑ । 𑌮𑍂॒𑌰𑍍𑌧𑌾 𑌕॒𑌵𑍀 𑌰॑𑌯𑍀॒𑌣𑌾𑌮𑍍 ॥ 𑌭𑍁𑌵𑍋॑ 𑌯॒𑌜𑍍𑌞𑌸𑍍𑌯॒ 𑌰𑌜॑𑌸𑌶𑍍𑌚 𑌨𑍇॒𑌤𑌾 𑌯𑌤𑍍𑌰𑌾॑ 𑌨𑌿॒𑌯𑍁𑌦𑍍𑌭𑌿॒-𑌸𑍍𑌸𑌚॑𑌸𑍇 𑌶𑌿॒𑌵𑌾𑌭𑌿𑌃॑ । 𑌦𑌿॒𑌵𑌿 𑌮𑍂॒𑌰𑍍𑌧𑌾𑌨॑-𑌨𑍍𑌦𑌧𑌿𑌷𑍇 𑌸𑍁𑌵॒𑌰𑍍॒𑌷𑌾-𑌞𑍍𑌜𑌿॒𑌹𑍍𑌵𑌾𑌮॑𑌗𑍍𑌨𑍇 𑌚𑌕𑍃𑌷𑍇 𑌹𑌵𑍍𑌯॒𑌵𑌾𑌹᳚𑌮𑍍 ॥ 𑌅𑌬𑍋᳚𑌦𑍍𑌧𑍍𑌯॒𑌗𑍍𑌨𑌿-𑌸𑍍𑌸॒𑌮𑌿𑌧𑌾॒ 𑌜𑌨𑌾॑𑌨𑌾॒- [𑌜𑌨𑌾॑𑌨𑌾𑌮𑍍, 𑌪𑍍𑌰𑌤𑌿॑] 10
-𑌮𑍍𑌪𑍍𑌰𑌤𑌿॑ 𑌧𑍇॒𑌨𑍁𑌮𑌿॑𑌵𑌾 𑌯॒𑌤𑍀𑌮𑍁॒𑌷𑌾𑌸᳚𑌮𑍍 । 𑌯॒𑌹𑍍𑌵𑌾 𑌇॑𑌵॒ 𑌪𑍍𑌰𑌵॒𑌯𑌾 𑌮𑍁॒𑌜𑍍𑌜𑌿𑌹𑌾॑𑌨𑌾𑌃॒ 𑌪𑍍𑌰 𑌭𑌾॒𑌨𑌵॑-𑌸𑍍𑌸𑌿𑌸𑍍𑌰𑌤𑍇॒ 𑌨𑌾𑌕॒𑌮𑌚𑍍𑌛॑ ॥ 𑌅𑌵𑍋॑𑌚𑌾𑌮 𑌕॒𑌵𑌯𑍇॒ 𑌮𑍇𑌦𑍍𑌧𑍍𑌯𑌾॑𑌯॒ 𑌵𑌚𑍋॑ 𑌵॒𑌨𑍍𑌦𑌾𑌰𑍁॑ 𑌵𑍃𑌷॒𑌭𑌾𑌯॒ 𑌵𑍃𑌷𑍍𑌣𑍇᳚ । 𑌗𑌵𑌿॑𑌷𑍍𑌠𑌿𑌰𑍋॒ 𑌨𑌮॑𑌸𑌾॒ 𑌸𑍍𑌤𑍋𑌮॑𑌮॒𑌗𑍍𑌨𑍌 𑌦𑌿॒𑌵𑍀𑌵॑ 𑌰𑍁॒𑌕𑍍𑌮𑌮𑍁॒𑌰𑍍𑌵𑍍𑌯𑌞𑍍𑌚॑𑌮𑌶𑍍𑌰𑍇𑌤𑍍 ॥ 𑌜𑌨॑𑌸𑍍𑌯 𑌗𑍋॒𑌪𑌾 𑌅॑𑌜𑌨𑌿𑌷𑍍𑌟॒ 𑌜𑌾𑌗𑍃॑𑌵𑌿𑌰॒𑌗𑍍𑌨𑌿-𑌸𑍍𑌸𑍁॒𑌦𑌕𑍍𑌷॑-𑌸𑍍𑌸𑍁𑌵𑌿॒𑌤𑌾𑌯॒ 𑌨𑌵𑍍𑌯॑𑌸𑍇 । 𑌘𑍃॒𑌤𑌪𑍍𑌰॑𑌤𑍀𑌕𑍋 𑌬𑍃𑌹॒𑌤𑌾 𑌦𑌿॑𑌵𑌿॒𑌸𑍍𑌪𑍃𑌶𑌾᳚ 𑌦𑍍𑌯𑍁॒𑌮𑌦𑍍𑌵𑌿 𑌭𑌾॑𑌤𑌿 𑌭𑌰॒𑌤𑍇𑌭𑍍𑌯॒-𑌶𑍍𑌶𑍁𑌚𑌿𑌃॑ ॥ 𑌤𑍍𑌵𑌾𑌮॑𑌗𑍍𑌨𑍇॒ 𑌅𑌙𑍍𑌗𑌿॑𑌰𑌸𑍋॒ [𑌅𑌙𑍍𑌗𑌿॑𑌰𑌸𑌃, 𑌗𑍁𑌹𑌾॑ 𑌹𑌿॒𑌤𑌮𑌨𑍍𑌵॑-] 11
𑌗𑍁𑌹𑌾॑ 𑌹𑌿॒𑌤𑌮𑌨𑍍𑌵॑-𑌵𑌿𑌨𑍍𑌦𑌞𑍍𑌛𑌿𑌶𑍍𑌰𑌿𑌯𑌾॒𑌣𑌂-𑌵𑌁𑌨𑍇॑𑌵𑌨𑍇 । 𑌸 𑌜𑌾॑𑌯𑌸𑍇 𑌮॒𑌥𑍍𑌯𑌮𑌾॑𑌨॒-𑌸𑍍𑌸𑌹𑍋॑ 𑌮॒𑌹-𑌤𑍍𑌤𑍍𑌵𑌾𑌮𑌾॑𑌹𑍁॒-𑌸𑍍𑌸𑌹॑𑌸𑌸𑍍𑌪𑍁॒𑌤𑍍𑌰𑌮॑𑌙𑍍𑌗𑌿𑌰𑌃 ॥ 𑌯॒𑌜𑍍𑌞𑌸𑍍𑌯॑ 𑌕𑍇॒𑌤𑍁-𑌮𑍍𑌪𑍍𑌰॑𑌥॒𑌮-𑌮𑍍𑌪𑍁॒𑌰𑍋𑌹𑌿॑𑌤𑌮॒𑌗𑍍𑌨𑌿-𑌨𑍍𑌨𑌰॑𑌸𑍍𑌤𑍍𑌰𑌿𑌷𑌧॒𑌸𑍍𑌥𑍇 𑌸𑌮𑌿॑𑌨𑍍𑌧𑌤𑍇 । 𑌇𑌨𑍍𑌦𑍍𑌰𑍇॑𑌣 𑌦𑍇॒𑌵𑍈-𑌸𑍍𑌸॒𑌰𑌥॒𑌗𑍍𑌮𑍍॒ 𑌸 𑌬॒𑌰𑍍॒𑌹𑌿𑌷𑌿॒ 𑌸𑍀𑌦॒𑌨𑍍𑌨𑌿 𑌹𑍋𑌤𑌾॑ 𑌯॒𑌜𑌥𑌾॑𑌯 𑌸𑍁॒𑌕𑍍𑌰𑌤𑍁𑌃॑ ॥ 𑌤𑍍𑌵𑌾-𑌞𑍍𑌚𑌿॑𑌤𑍍𑌰𑌶𑍍𑌰𑌵𑌸𑍍𑌤𑌮॒ 𑌹𑌵॑𑌨𑍍𑌤𑍇 𑌵𑌿॒𑌕𑍍𑌷𑍁 𑌜॒𑌨𑍍𑌤𑌵𑌃॑ । 𑌶𑍋॒𑌚𑌿𑌷𑍍𑌕𑍇॑𑌶-𑌮𑍍𑌪𑍁𑌰𑍁𑌪𑍍𑌰𑌿॒𑌯𑌾𑌗𑍍𑌨𑍇॑ 𑌹॒𑌵𑍍𑌯𑌾𑌯॒ 𑌵𑍋𑌢॑𑌵𑍇 ॥ 𑌸𑌖𑌾॑𑌯॒-𑌸𑍍𑌸𑌂𑌵𑌁॑-𑌸𑍍𑌸॒𑌮𑍍𑌯𑌞𑍍𑌚॒-𑌮𑌿𑌷॒𑌗𑍍𑌗𑍍॒- [-𑌮𑌿𑌷᳚𑌮𑍍, 𑌸𑍍𑌤𑍋𑌮॑-𑌞𑍍𑌚𑌾॒𑌗𑍍𑌨𑌯𑍇᳚ ।] 12
-𑌸𑍍𑌤𑍋𑌮॑-𑌞𑍍𑌚𑌾॒𑌗𑍍𑌨𑌯𑍇᳚ । 𑌵𑌰𑍍𑌷𑌿॑𑌷𑍍𑌠𑌾𑌯 𑌕𑍍𑌷𑌿𑌤𑍀॒𑌨𑌾𑌮𑍂॒𑌰𑍍𑌜𑍋 𑌨𑌪𑍍𑌤𑍍𑌰𑍇॒ 𑌸𑌹॑𑌸𑍍𑌵𑌤𑍇 ॥ 𑌸𑌗𑍍𑌮𑍍𑌸॒𑌮𑌿𑌦𑍍𑌯𑍁॑𑌵𑌸𑍇 𑌵𑍃𑌷॒𑌨𑍍𑌨𑌗𑍍𑌨𑍇॒ 𑌵𑌿𑌶𑍍𑌵𑌾᳚𑌨𑍍𑌯॒𑌰𑍍𑌯 𑌆 । 𑌇॒𑌡𑌸𑍍𑌪॒𑌦𑍇 𑌸𑌮𑌿॑𑌦𑍍𑌧𑍍𑌯𑌸𑍇॒ 𑌸 𑌨𑍋॒ 𑌵𑌸𑍂॒𑌨𑍍𑌯𑌾 𑌭॑𑌰 ॥ 𑌏॒𑌨𑌾 𑌵𑍋॑ 𑌅॒𑌗𑍍𑌨𑌿-𑌨𑍍𑌨𑌮॑𑌸𑍋॒𑌰𑍍𑌜𑍋 𑌨𑌪𑌾॑𑌤॒𑌮𑌾 𑌹𑍁॑𑌵𑍇 । 𑌪𑍍𑌰𑌿॒𑌯-𑌞𑍍𑌚𑍇𑌤𑌿॑𑌷𑍍𑌠𑌮𑌰॒𑌤𑌿𑌗𑍍𑌗𑍍 𑌸𑍍𑌵॑𑌦𑍍𑌧𑍍𑌵॒𑌰𑌂-𑌵𑌿𑌁𑌶𑍍𑌵॑𑌸𑍍𑌯 𑌦𑍂॒𑌤𑌮॒𑌮𑍃𑌤᳚𑌮𑍍 ॥ 𑌸 𑌯𑍋॑𑌜𑌤𑍇 𑌅𑌰𑍁॒𑌷𑍋 𑌵𑌿॒𑌶𑍍𑌵𑌭𑍋॑𑌜𑌸𑌾॒ 𑌸 𑌦𑍁॑𑌦𑍍𑌰𑌵॒-𑌥𑍍𑌸𑍍𑌵𑌾॑𑌹𑍁𑌤𑌃 । 𑌸𑍁॒𑌬𑍍𑌰𑌹𑍍𑌮𑌾॑ 𑌯॒𑌜𑍍𑌞-𑌸𑍍𑌸𑍁॒𑌶𑌮𑍀॒ [𑌯॒𑌜𑍍𑌞-𑌸𑍍𑌸𑍁॒𑌶𑌮𑍀᳚, 𑌵𑌸𑍂॑𑌨𑌾-] 13
𑌵𑌸𑍂॑𑌨𑌾-𑌨𑍍𑌦𑍇॒𑌵𑌗𑍍𑌮𑍍 𑌰𑌾𑌧𑍋॒ 𑌜𑌨𑌾॑𑌨𑌾𑌮𑍍 ॥ 𑌉𑌦॑𑌸𑍍𑌯 𑌶𑍋॒𑌚𑌿𑌰॑𑌸𑍍𑌥𑌾𑌦𑌾॒-𑌜𑍁𑌹𑍍𑌵𑌾॑𑌨𑌸𑍍𑌯 𑌮𑍀॒𑌢𑍁𑌷𑌃॑ । 𑌉𑌦𑍍𑌧॒𑌮𑌾𑌸𑍋॑ 𑌅𑌰𑍁॒𑌷𑌾𑌸𑍋॑ 𑌦𑌿𑌵𑌿॒𑌸𑍍𑌪𑍃𑌶॒-𑌸𑍍𑌸𑌮॒𑌗𑍍𑌨𑌿𑌮𑌿॑𑌨𑍍𑌧𑌤𑍇॒ 𑌨𑌰𑌃॑ ॥ 𑌅𑌗𑍍𑌨𑍇॒ 𑌵𑌾𑌜॑𑌸𑍍𑌯॒ 𑌗𑍋𑌮॑𑌤॒ 𑌈𑌶𑌾॑𑌨-𑌸𑍍𑌸𑌹𑌸𑍋 𑌯𑌹𑍋 । 𑌅॒𑌸𑍍𑌮𑍇 𑌧𑍇॑𑌹𑌿 𑌜𑌾𑌤𑌵𑍇𑌦𑍋॒ 𑌮𑌹𑌿॒ 𑌶𑍍𑌰𑌵𑌃॑ ॥ 𑌸 𑌇॑𑌧𑌾॒𑌨𑍋 𑌵𑌸𑍁॑𑌷𑍍𑌕॒𑌵𑌿-𑌰॒𑌗𑍍𑌨𑌿𑌰𑍀॒𑌡𑍇𑌨𑍍𑌯𑍋॑ 𑌗𑌿॒𑌰𑌾 । 𑌰𑍇॒𑌵𑌦॒𑌸𑍍𑌮𑌭𑍍𑌯॑-𑌮𑍍𑌪𑍁𑌰𑍍𑌵𑌣𑍀𑌕 𑌦𑍀𑌦𑌿𑌹𑌿 ॥ 𑌕𑍍𑌷॒𑌪𑍋 𑌰𑌾॑𑌜𑌨𑍍𑌨𑍁॒𑌤 𑌤𑍍𑌮𑌨𑌾-𑌽𑌗𑍍𑌨𑍇॒ 𑌵𑌸𑍍𑌤𑍋॑𑌰𑍁॒𑌤𑍋𑌷𑌸𑌃॑ । 𑌸 𑌤𑌿॑𑌗𑍍𑌮𑌜𑌮𑍍𑌭 [ ] 14
𑌰॒𑌕𑍍𑌷𑌸𑍋॑ 𑌦𑌹॒ 𑌪𑍍𑌰𑌤𑌿॑ ॥ 𑌆 𑌤𑍇॑ 𑌅𑌗𑍍𑌨 𑌇𑌧𑍀𑌮𑌹𑌿 𑌦𑍍𑌯𑍁॒𑌮𑌨𑍍𑌤॑-𑌨𑍍𑌦𑍇𑌵𑌾॒𑌜𑌰᳚𑌮𑍍 । 𑌯𑌦𑍍𑌧॒ 𑌸𑍍𑌯𑌾 𑌤𑍇॒ 𑌪𑌨𑍀॑𑌯𑌸𑍀 𑌸॒𑌮𑌿-𑌦𑍍𑌦𑍀॒𑌦𑌯॑𑌤𑌿॒ 𑌦𑍍𑌯𑌵𑍀𑌷𑌗𑍍𑌗𑍍॑ 𑌸𑍍𑌤𑍋॒𑌤𑍃𑌭𑍍𑌯॒ 𑌆 𑌭॑𑌰 ॥ 𑌆 𑌤𑍇॑ 𑌅𑌗𑍍𑌨 𑌋॒𑌚𑌾 𑌹॒𑌵𑌿-𑌶𑍍𑌶𑍁॒𑌕𑍍𑌰𑌸𑍍𑌯॑ 𑌜𑍍𑌯𑍋𑌤𑌿𑌷𑌸𑍍𑌪𑌤𑍇 । 𑌸𑍁𑌶𑍍𑌚॑𑌨𑍍𑌦𑍍𑌰॒ 𑌦𑌸𑍍𑌮॒ 𑌵𑌿𑌶𑍍𑌪॑𑌤𑍇॒ 𑌹𑌵𑍍𑌯॑𑌵𑌾॒-𑌟𑍍𑌤𑍁𑌭𑍍𑌯𑌗𑍍𑌮𑍍॑ 𑌹𑍂𑌯𑌤॒ 𑌇𑌷𑌗𑍍𑌗𑍍॑ 𑌸𑍍𑌤𑍋॒𑌤𑍃𑌭𑍍𑌯॒ 𑌆 𑌭॑𑌰 ॥ 𑌉॒𑌭𑍇 𑌸𑍁॑𑌶𑍍𑌚𑌨𑍍𑌦𑍍𑌰 𑌸॒𑌰𑍍𑌪𑌿𑌷𑍋॒ 𑌦𑌰𑍍𑌵𑍀᳚ 𑌶𑍍𑌰𑍀𑌣𑍀𑌷 𑌆॒𑌸𑌨𑌿॑ । 𑌉॒𑌤𑍋 𑌨॒ 𑌉-𑌤𑍍𑌪𑍁॑𑌪𑍂𑌰𑍍𑌯𑌾 [𑌉-𑌤𑍍𑌪𑍁॑𑌪𑍂𑌰𑍍𑌯𑌾𑌃, 𑌉॒𑌕𑍍𑌥𑍇𑌷𑍁॑] 15
𑌉॒𑌕𑍍𑌥𑍇𑌷𑍁॑ 𑌶𑌵𑌸𑌸𑍍𑌪𑌤॒ 𑌇𑌷𑌗𑍍𑌗𑍍॑ 𑌸𑍍𑌤𑍋॒𑌤𑍃𑌭𑍍𑌯॒ 𑌆 𑌭॑𑌰 ॥ 𑌅𑌗𑍍𑌨𑍇॒ 𑌤𑌮॒𑌦𑍍𑌯𑌾𑌶𑍍𑌵॒-𑌨𑍍𑌨 𑌸𑍍𑌤𑍋𑌮𑍈𑌃॒ 𑌕𑍍𑌰𑌤𑍁॒-𑌨𑍍𑌨 𑌭॒𑌦𑍍𑌰𑌗𑍍𑌮𑍍 𑌹𑍃॑𑌦𑌿॒𑌸𑍍𑌪𑍃𑌶᳚𑌮𑍍 । 𑌋॒𑌦𑍍𑌧𑍍𑌯𑌾𑌮𑌾॑ 𑌤॒ 𑌓𑌹𑍈𑌃᳚ ॥ 𑌅𑌧𑌾॒ 𑌹𑍍𑌯॑𑌗𑍍𑌨𑍇॒ 𑌕𑍍𑌰𑌤𑍋᳚𑌰𑍍𑌭॒𑌦𑍍𑌰𑌸𑍍𑌯॒ 𑌦𑌕𑍍𑌷॑𑌸𑍍𑌯 𑌸𑌾॒𑌧𑍋𑌃 । 𑌰॒𑌥𑍀𑌰𑍍-𑌋॒𑌤𑌸𑍍𑌯॑ 𑌬𑍃𑌹॒𑌤𑍋 𑌬॒𑌭𑍂𑌥॑ ॥ 𑌆॒𑌭𑌿𑌷𑍍𑌟𑍇॑ 𑌅॒𑌦𑍍𑌯 𑌗𑍀॒𑌰𑍍𑌭𑌿𑌰𑍍𑌗𑍃॒𑌣𑌨𑍍𑌤𑍋-𑌽𑌗𑍍𑌨𑍇॒ 𑌦𑌾𑌶𑍇॑𑌮 । 𑌪𑍍𑌰 𑌤𑍇॑ 𑌦𑌿॒𑌵𑍋 𑌨 𑌸𑍍𑌤॑𑌨𑌯𑌨𑍍𑌤𑌿॒ 𑌶𑍁𑌷𑍍𑌮𑌾𑌃᳚ ॥ 𑌏॒𑌭𑌿𑌰𑍍𑌨𑍋॑ 𑌅॒𑌰𑍍𑌕𑍈𑌰𑍍𑌭𑌵𑌾॑ 𑌨𑍋 𑌅॒𑌰𑍍𑌵𑌾- [𑌅॒𑌰𑍍𑌵𑌾𑌙𑍍, 𑌸𑍁𑌵॒𑌰𑍍𑌨 𑌜𑍍𑌯𑍋𑌤𑌿𑌃॑ ।] 16
-𑌙𑍍𑌖𑍍𑌸𑍁𑌵॒𑌰𑍍𑌨 𑌜𑍍𑌯𑍋𑌤𑌿𑌃॑ । 𑌅𑌗𑍍𑌨𑍇॒ 𑌵𑌿𑌶𑍍𑌵𑍇॑𑌭𑌿-𑌸𑍍𑌸𑍁॒𑌮𑌨𑌾॒ 𑌅𑌨𑍀॑𑌕𑍈𑌃 ॥ 𑌅॒𑌗𑍍𑌨𑌿𑌗𑍍𑌮𑍍 𑌹𑍋𑌤𑌾॑𑌰-𑌮𑍍𑌮𑌨𑍍𑌯𑍇॒ 𑌦𑌾𑌸𑍍𑌵॑𑌨𑍍𑌤𑌂॒-𑌵𑌁𑌸𑍋᳚-𑌸𑍍𑌸𑍂॒𑌨𑍁𑌗𑍍𑌮𑍍 𑌸𑌹॑𑌸𑍋 𑌜𑌾॒𑌤𑌵𑍇॑𑌦𑌸𑌮𑍍 । 𑌵𑌿𑌪𑍍𑌰॒-𑌨𑍍𑌨 𑌜𑌾॒𑌤𑌵𑍇॑𑌦𑌸𑌮𑍍 । 𑌯 𑌊॒𑌰𑍍𑌧𑍍𑌵𑌯𑌾᳚ 𑌸𑍍𑌵𑌦𑍍𑌧𑍍𑌵॒𑌰𑍋 𑌦𑍇॒𑌵𑍋 𑌦𑍇॒𑌵𑌾𑌚𑍍𑌯𑌾॑ 𑌕𑍃॒𑌪𑌾 । 𑌘𑍃॒𑌤𑌸𑍍𑌯॒ 𑌵𑌿𑌭𑍍𑌰𑌾᳚𑌷𑍍𑌟𑌿॒𑌮𑌨𑍁॑ 𑌶𑍁॒𑌕𑍍𑌰𑌶𑍋॑𑌚𑌿𑌷 𑌆॒𑌜𑍁𑌹𑍍𑌵𑌾॑𑌨𑌸𑍍𑌯 𑌸॒𑌰𑍍𑌪𑌿𑌷𑌃॑ ॥ 𑌅𑌗𑍍𑌨𑍇॒ 𑌤𑍍𑌵-𑌨𑍍𑌨𑍋॒ 𑌅𑌨𑍍𑌤॑𑌮𑌃 । 𑌉॒𑌤 𑌤𑍍𑌰𑌾॒𑌤𑌾 𑌶𑌿॒𑌵𑍋 𑌭॑𑌵 𑌵𑌰𑍂॒𑌥𑍍𑌯𑌃॑ ॥ 𑌤-𑌨𑍍𑌤𑍍𑌵𑌾॑ 𑌶𑍋𑌚𑌿𑌷𑍍𑌠 𑌦𑍀𑌦𑌿𑌵𑌃 । 𑌸𑍁॒𑌮𑍍𑌨𑌾𑌯॑ 𑌨𑍂॒𑌨𑌮𑍀॑𑌮𑌹𑍇॒ 𑌸𑌖𑌿॑𑌭𑍍𑌯𑌃 ॥ 𑌵𑌸𑍁॑𑌰॒𑌗𑍍𑌨𑌿𑌰𑍍𑌵𑌸𑍁॑𑌶𑍍𑌰𑌵𑌾𑌃 । 𑌅𑌚𑍍𑌛𑌾॑ 𑌨𑌕𑍍𑌷𑌿 𑌦𑍍𑌯𑍁॒𑌮𑌤𑍍𑌤॑𑌮𑍋 𑌰॒𑌯𑌿-𑌨𑍍𑌦𑌾𑌃᳚ ॥ 1 ॥
(𑌜𑌨𑌾॑𑌨𑌾॒ – 𑌮𑌙𑍍𑌗𑌿॑𑌰𑌸॒ – 𑌇𑌷𑌗𑍍𑌮𑍍॑ – 𑌸𑍁॒𑌶𑌮𑍀॑ – 𑌤𑌿𑌗𑍍𑌮𑌜𑌮𑍍𑌭 – 𑌪𑍁𑌪𑍂𑌰𑍍𑌯𑌾 – 𑌅॒𑌰𑍍𑌵𑌾𑌂 – 𑌵𑌸𑍁॑𑌶𑍍𑌰𑌵𑌾𑌃॒ – 𑌪𑌞𑍍𑌚॑ 𑌚) (𑌅. 4)
𑌇॒𑌨𑍍𑌦𑍍𑌰𑌾॒𑌗𑍍𑌨𑌿𑌭𑍍𑌯𑌾᳚-𑌨𑍍𑌤𑍍𑌵𑌾 𑌸॒𑌯𑍁𑌜𑌾॑ 𑌯𑍁॒𑌜𑌾 𑌯𑍁॑𑌨𑌜𑍍𑌮𑍍𑌯𑌾 𑌘𑌾॒𑌰𑌾𑌭𑍍𑌯𑌾॒-𑌨𑍍𑌤𑍇𑌜॑𑌸𑌾॒ 𑌵𑌰𑍍𑌚॑𑌸𑍋॒ 𑌕𑍍𑌥𑍇𑌭𑌿॒-𑌸𑍍𑌸𑍍𑌤𑍋𑌮𑍇॑𑌭𑌿॒ 𑌶𑍍𑌛𑌨𑍍𑌦𑍋॑𑌭𑍀 𑌰॒𑌯𑍍𑌯𑍈 𑌪𑍋𑌷𑌾॑𑌯 𑌸𑌜𑌾॒𑌤𑌾𑌨𑌾᳚-𑌮𑍍𑌮𑌦𑍍𑌧𑍍𑌯𑌮॒𑌸𑍍𑌥𑍇𑌯𑌾॑𑌯॒ 𑌮𑌯𑌾᳚ 𑌤𑍍𑌵𑌾 𑌸॒𑌯𑍁𑌜𑌾॑ 𑌯𑍁॒𑌜𑌾 𑌯𑍁॑𑌨𑌜𑍍𑌮𑍍𑌯॒𑌬𑌾-𑌨𑍍𑌦𑍁॒𑌲𑌾 𑌨𑌿॑𑌤॒𑌤𑍍𑌨𑌿 𑌰॒𑌭𑍍𑌰𑌯॑𑌨𑍍𑌤𑍀 𑌮𑍇॒𑌘𑌯॑𑌨𑍍𑌤𑍀 𑌵॒𑌰𑍍॒𑌷𑌯॑𑌨𑍍𑌤𑍀 𑌚𑍁𑌪𑍁॒𑌣𑍀𑌕𑌾॒ 𑌨𑌾𑌮𑌾॑𑌸𑌿 𑌪𑍍𑌰॒𑌜𑌾𑌪॑𑌤𑌿𑌨𑌾 𑌤𑍍𑌵𑌾॒ 𑌵𑌿𑌶𑍍𑌵𑌾॑𑌭𑌿𑌰𑍍𑌧𑍀॒𑌭𑌿𑌰𑍁𑌪॑ 𑌦𑌧𑌾𑌮𑌿 𑌪𑍃𑌥𑌿॒𑌵𑍍𑌯𑍁॑𑌦𑌪𑍁॒𑌰𑌮𑌨𑍍𑌨𑍇॑𑌨 𑌵𑌿॒𑌷𑍍𑌟𑌾 𑌮॑𑌨𑍁॒𑌷𑍍𑌯𑌾᳚𑌸𑍍𑌤𑍇 𑌗𑍋॒𑌪𑍍𑌤𑌾𑌰𑍋॒ 𑌽𑌗𑍍𑌨𑌿𑌰𑍍𑌵𑌿𑌯॑𑌤𑍍𑌤𑍋-𑌽𑌸𑍍𑌯𑌾॒-𑌨𑍍𑌤𑌾𑌮॒𑌹-𑌮𑍍𑌪𑍍𑌰॑ 𑌪𑌦𑍍𑌯𑍇॒ 𑌸𑌾 [ ] 1
𑌮𑍇॒ 𑌶𑌰𑍍𑌮॑ 𑌚॒ 𑌵𑌰𑍍𑌮॑ 𑌚𑌾॒𑌸𑍍𑌤𑍍𑌵𑌧𑌿॑ 𑌦𑍍𑌯𑍌𑌰॒𑌨𑍍𑌤𑌰𑌿॑𑌕𑍍𑌷॒-𑌮𑍍𑌬𑍍𑌰𑌹𑍍𑌮॑𑌣𑌾 𑌵𑌿॒𑌷𑍍𑌟𑌾 𑌮॒𑌰𑍁𑌤॑𑌸𑍍𑌤𑍇 𑌗𑍋॒𑌪𑍍𑌤𑌾𑌰𑍋॑ 𑌵𑌾॒𑌯𑍁𑌰𑍍𑌵𑌿𑌯॑𑌤𑍍𑌤𑍋-𑌽𑌸𑍍𑌯𑌾॒-𑌨𑍍𑌤𑌾𑌮॒𑌹-𑌮𑍍𑌪𑍍𑌰 𑌪॑𑌦𑍍𑌯𑍇॒ 𑌸𑌾 𑌮𑍇॒ 𑌶𑌰𑍍𑌮॑ 𑌚॒ 𑌵𑌰𑍍𑌮॑ 𑌚𑌾𑌸𑍍𑌤𑍁॒ 𑌦𑍍𑌯𑍌𑌰𑌪॑𑌰𑌾𑌜𑌿𑌤𑌾॒-𑌽𑌮𑍃𑌤𑍇॑𑌨 𑌵𑌿॒𑌷𑍍𑌟𑌾-𑌽𑌽𑌦𑌿॒𑌤𑍍𑌯𑌾𑌸𑍍𑌤𑍇॑ 𑌗𑍋॒𑌪𑍍𑌤𑌾𑌰॒-𑌸𑍍𑌸𑍂𑌰𑍍𑌯𑍋॒ 𑌵𑌿𑌯॑𑌤𑍍𑌤𑍋-𑌽𑌸𑍍𑌯𑌾॒-𑌨𑍍𑌤𑌾𑌮॒𑌹-𑌮𑍍𑌪𑍍𑌰 𑌪॑𑌦𑍍𑌯𑍇॒ 𑌸𑌾 𑌮𑍇॒ 𑌶𑌰𑍍𑌮॑ 𑌚॒ 𑌵𑌰𑍍𑌮॑ 𑌚𑌾𑌸𑍍𑌤𑍁 ॥ 1 ॥
(𑌸𑌾 – 𑌽𑌷𑍍𑌟𑌾𑌚॑𑌤𑍍𑌵𑌾𑌰𑌿𑌗𑍍𑌮𑍍𑌶𑌚𑍍𑌚) (𑌅. 5)
𑌬𑍃𑌹॒𑌸𑍍𑌪𑌤𑌿॑𑌸𑍍𑌤𑍍𑌵𑌾 𑌸𑌾𑌦𑌯𑌤𑍁 𑌪𑍃𑌥𑌿॒𑌵𑍍𑌯𑌾𑌃 𑌪𑍃॒𑌷𑍍𑌠𑍇 𑌜𑍍𑌯𑍋𑌤𑌿॑𑌷𑍍𑌮𑌤𑍀𑌂॒-𑌵𑌿𑌁𑌶𑍍𑌵॑𑌸𑍍𑌮𑍈 𑌪𑍍𑌰𑌾॒𑌣𑌾𑌯𑌾॑𑌪𑌾॒𑌨𑌾𑌯॒ 𑌵𑌿𑌶𑍍𑌵॒-𑌞𑍍𑌜𑍍𑌯𑍋𑌤𑌿॑𑌰𑍍𑌯𑌚𑍍𑌛𑌾॒- 𑌗𑍍𑌨𑌿𑌸𑍍𑌤𑍇-𑌽𑌧𑌿॑𑌪𑌤𑌿 𑌰𑍍𑌵𑌿॒𑌶𑍍𑌵𑌕॑𑌰𑍍𑌮𑌾 𑌤𑍍𑌵𑌾 𑌸𑌾𑌦𑌯𑌤𑍍𑌵॒𑌨𑍍𑌤𑌰𑌿॑𑌕𑍍𑌷𑌸𑍍𑌯 𑌪𑍃॒𑌷𑍍𑌠𑍇 𑌜𑍍𑌯𑍋𑌤𑌿॑𑌷𑍍𑌮𑌤𑍀𑌂॒-𑌵𑌿𑌁𑌶𑍍𑌵॑𑌸𑍍𑌮𑍈 𑌪𑍍𑌰𑌾॒𑌣𑌾𑌯𑌾॑𑌪𑌾॒𑌨𑌾𑌯॒ 𑌵𑌿𑌶𑍍𑌵॒-𑌞𑍍𑌜𑍍𑌯𑍋𑌤𑌿॑𑌰𑍍𑌯𑌚𑍍𑌛 𑌵𑌾॒𑌯𑍁𑌸𑍍𑌤𑍇-𑌽𑌧𑌿॑𑌪𑌤𑌿𑌃 𑌪𑍍𑌰॒𑌜𑌾𑌪॑𑌤𑌿𑌸𑍍𑌤𑍍𑌵𑌾 𑌸𑌾𑌦𑌯𑌤𑍁 𑌦𑌿॒𑌵𑌃 𑌪𑍃॒𑌷𑍍𑌠𑍇 𑌜𑍍𑌯𑍋𑌤𑌿॑𑌷𑍍𑌮𑌤𑍀𑌂॒-𑌵𑌿𑌁𑌶𑍍𑌵॑𑌸𑍍𑌮𑍈 𑌪𑍍𑌰𑌾॒𑌣𑌾𑌯𑌾॑𑌪𑌾॒𑌨𑌾𑌯॒ 𑌵𑌿𑌶𑍍𑌵॒-𑌞𑍍𑌜𑍍𑌯𑍋𑌤𑌿॑𑌰𑍍𑌯𑌚𑍍𑌛 𑌪𑌰𑌮𑍇॒𑌷𑍍𑌠𑍀 𑌤𑍇-𑌽𑌧𑌿॑𑌪𑌤𑌿𑌃 𑌪𑍁𑌰𑍋𑌵𑌾𑌤॒𑌸𑌨𑌿॑𑌰𑌸𑍍𑌯 𑌭𑍍𑌰॒𑌸𑌨𑌿॑𑌰𑌸𑌿 𑌵𑌿𑌦𑍍𑌯𑍁॒𑌥𑍍𑌸𑌨𑌿॑- [𑌵𑌿𑌦𑍍𑌯𑍁॒𑌥𑍍𑌸𑌨𑌿𑌃॑, 𑌅॒𑌸𑌿॒ 𑌸𑍍𑌤॒𑌨॒𑌯𑌿॒𑌤𑍍𑌨𑍁॒𑌸𑌨𑌿॑𑌰𑌸𑌿] 20
-𑌰𑌸𑌿 𑌸𑍍𑌤𑌨𑌯𑌿𑌤𑍍𑌨𑍁॒𑌸𑌨𑌿॑𑌰𑌸𑌿 𑌵𑍃𑌷𑍍𑌟𑌿॒𑌸𑌨𑌿॑𑌰𑌸𑍍𑌯॒-𑌗𑍍𑌨𑍇𑌰𑍍𑌯𑌾𑌨𑍍𑌯॑𑌸𑌿 𑌦𑍇॒𑌵𑌾𑌨𑌾॑𑌮𑌗𑍍𑌨𑍇॒ 𑌯𑌾𑌨𑍍𑌯॑𑌸𑌿 𑌵𑌾॒𑌯𑍋𑌰𑍍𑌯𑌾𑌨𑍍𑌯॑𑌸𑌿 𑌦𑍇॒𑌵𑌾𑌨𑌾𑌂᳚-𑌵𑌾𑌁𑌯𑍋॒𑌯𑌾𑌨𑍍𑌯॑𑌸𑍍𑌯॒𑌨𑍍𑌤𑌰𑌿॑𑌕𑍍𑌷𑌸𑍍𑌯॒ 𑌯𑌾𑌨𑍍𑌯॑𑌸𑌿 𑌦𑍇॒𑌵𑌾𑌨𑌾॑- 𑌮𑌨𑍍𑌤𑌰𑌿𑌕𑍍𑌷॒𑌯𑌾𑌨𑍍𑌯॑𑌸𑍍𑌯॒-𑌨𑍍𑌤𑌰𑌿॑𑌕𑍍𑌷𑌮𑌸𑍍𑌯॒𑌨𑍍𑌤𑌰𑌿॑𑌕𑍍𑌷𑌾𑌯 𑌤𑍍𑌵𑌾 𑌸𑌲𑌿॒𑌲𑌾𑌯॑ 𑌤𑍍𑌵𑌾॒ 𑌸𑌰𑍍𑌣𑍀॑𑌕𑌾𑌯 𑌤𑍍𑌵𑌾॒ 𑌸𑌤𑍀॑𑌕𑌾𑌯 𑌤𑍍𑌵𑌾॒ 𑌕𑍇𑌤𑌾॑𑌯 𑌤𑍍𑌵𑌾॒ 𑌪𑍍𑌰𑌚𑍇॑𑌤𑌸𑍇 𑌤𑍍𑌵𑌾॒ 𑌵𑌿𑌵॑𑌸𑍍𑌵𑌤𑍇 𑌤𑍍𑌵𑌾 𑌦𑌿॒𑌵𑌸𑍍𑌤𑍍𑌵𑌾॒ 𑌜𑍍𑌯𑍋𑌤𑌿॑𑌷 𑌆𑌦𑌿॒𑌤𑍍𑌯𑍇𑌭𑍍𑌯॑𑌸𑍍𑌤𑍍𑌵॒𑌰𑍍𑌚𑍇 𑌤𑍍𑌵𑌾॑ 𑌰𑍁॒𑌚𑍇 𑌤𑍍𑌵𑌾᳚ 𑌦𑍍𑌯𑍁॒𑌤𑍇 𑌤𑍍𑌵𑌾॑ 𑌭𑌾॒𑌸𑍇 𑌤𑍍𑌵𑌾॒ 𑌜𑍍𑌯𑍋𑌤𑌿॑𑌷𑍇 𑌤𑍍𑌵𑌾 𑌯𑌶𑍋॒𑌦𑌾-𑌨𑍍𑌤𑍍𑌵𑌾॒ 𑌯𑌶॑𑌸𑌿 𑌤𑍇𑌜𑍋॒𑌦𑌾-𑌨𑍍𑌤𑍍𑌵𑌾॒ 𑌤𑍇𑌜॑𑌸𑌿 𑌪𑌯𑍋॒𑌦𑌾-𑌨𑍍𑌤𑍍𑌵𑌾॒ 𑌪𑌯॑𑌸𑌿 𑌵𑌰𑍍𑌚𑍋॒𑌦𑌾-𑌨𑍍𑌤𑍍𑌵𑌾॒ 𑌵𑌰𑍍𑌚॑𑌸𑌿 𑌦𑍍𑌰𑌵𑌿𑌣𑍋॒𑌦𑌾-𑌨𑍍𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑌿॒ 𑌤𑍇𑌨𑌰𑍍𑌷𑌿॑𑌣𑌾॒ 𑌤𑍇𑌨॒ 𑌬𑍍𑌰𑌹𑍍𑌮॑𑌣𑌾॒ 𑌤𑌯𑌾॑ 𑌦𑍇॒𑌵𑌤॑𑌯𑌾-𑌽𑌙𑍍𑌗𑌿𑌰॒𑌸𑍍𑌵-𑌦𑍍𑌧𑍍𑌰𑍁॒𑌵𑌾 𑌸𑍀॑𑌦 ॥ 21 ॥
(𑌵𑌿॒𑌦𑍍𑌯𑍁॒𑌥𑍍𑌸𑌨𑌿॑ – 𑌰𑍍𑌦𑍍𑌯𑍁॒𑌤𑍇 𑌤𑍍𑌵𑍈 – 𑌕𑌾॒𑌨𑍍𑌨 𑌤𑍍𑌰𑌿॒𑌗𑍍𑌮𑍍॒𑌶𑌚𑍍𑌚॑) (𑌅. 6)
𑌭𑍂॒𑌯॒𑌸𑍍𑌕𑍃𑌦॑𑌸𑌿 𑌵𑌰𑌿𑌵॒𑌸𑍍𑌕𑍃𑌦॑𑌸𑌿॒ 𑌪𑍍𑌰𑌾𑌚𑍍𑌯॑𑌸𑍍𑌯𑍂॒𑌰𑍍𑌧𑍍𑌵𑌾-𑌽𑌸𑍍𑌯॑-𑌨𑍍𑌤𑌰𑌿𑌕𑍍𑌷॒𑌸𑌦॑𑌸𑍍𑌯॒-𑌨𑍍𑌤𑌰𑌿॑𑌕𑍍𑌷𑍇 𑌸𑍀𑌦𑌾-𑌫𑍍𑌸𑍁॒𑌷𑌦॑𑌸𑌿 𑌶𑍍𑌯𑍇𑌨॒𑌸𑌦॑𑌸𑌿 𑌗𑍃𑌦𑍍𑌧𑍍𑌰॒𑌸𑌦॑𑌸𑌿 𑌸𑍁𑌪𑌰𑍍𑌣॒𑌸𑌦॑𑌸𑌿 𑌨𑌾𑌕॒𑌸𑌦॑𑌸𑌿 𑌪𑍃𑌥𑌿॒𑌵𑍍𑌯𑌾𑌸𑍍𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑍍𑌯॒-𑌨𑍍𑌤𑌰𑌿॑𑌕𑍍𑌷𑌸𑍍𑌯 𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑌿 𑌦𑌿॒𑌵𑌸𑍍𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑌿 𑌦𑌿॒𑌶𑌾-𑌨𑍍𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑌿 𑌦𑍍𑌰𑌵𑌿𑌣𑍋॒𑌦𑌾-𑌨𑍍𑌤𑍍𑌵𑌾॒ 𑌦𑍍𑌰𑌵𑌿॑𑌣𑍇 𑌸𑌾𑌦𑌯𑌾𑌮𑌿 𑌪𑍍𑌰𑌾॒𑌣-𑌮𑍍𑌮𑍇॑ 𑌪𑌾𑌹𑍍𑌯-𑌪𑌾॒𑌨-𑌮𑍍𑌮𑍇॑ 𑌪𑌾𑌹𑌿 𑌵𑍍𑌯𑌾॒𑌨-𑌮𑍍𑌮𑍇॑ [𑌵𑍍𑌯𑌾॒𑌨-𑌮𑍍𑌮𑍇᳚, 𑌪𑌾॒𑌹𑍍𑌯𑌾𑌯𑍁॑𑌰𑍍𑌮𑍇 𑌪𑌾𑌹𑌿] 22
𑌪𑌾॒𑌹𑍍𑌯𑌾𑌯𑍁॑𑌰𑍍𑌮𑍇 𑌪𑌾𑌹𑌿 𑌵𑌿॒𑌶𑍍𑌵𑌾𑌯𑍁॑𑌰𑍍𑌮𑍇 𑌪𑌾𑌹𑌿 𑌸॒𑌰𑍍𑌵𑌾𑌯𑍁॑𑌰𑍍𑌮𑍇 𑌪𑌾॒𑌹𑍍𑌯𑌗𑍍𑌨𑍇॒ 𑌯-𑌤𑍍𑌤𑍇॒ 𑌪𑌰॒𑌗𑍍𑌮𑍍॒ 𑌹𑍃𑌨𑍍𑌨𑌾𑌮॒ 𑌤𑌾𑌵𑍇𑌹𑌿॒ 𑌸𑌗𑍍𑌮𑍍 𑌰॑𑌭𑌾𑌵𑌹𑍈॒ 𑌪𑌾𑌞𑍍𑌚॑ 𑌜𑌨𑍍𑌯𑍇॒𑌷𑍍𑌵-𑌪𑍍𑌯𑍇᳚𑌦𑍍𑌧𑍍𑌯𑌗𑍍𑌨𑍇॒ 𑌯𑌾𑌵𑌾॒ 𑌅𑌯𑌾॑𑌵𑌾॒ 𑌏𑌵𑌾॒ 𑌊𑌮𑌾॒-𑌸𑍍𑌸𑌬𑍍𑌦॒-𑌸𑍍𑌸𑌗॑𑌰-𑌸𑍍𑌸𑍁॒𑌮𑍇𑌕𑌃॑ ॥ 23 ॥
(𑌵𑍍𑌯𑌾॒𑌨-𑌮𑍍𑌮𑍇॒-𑌦𑍍𑌵𑌾𑌤𑍍𑌰𑌿𑌗𑍍𑌮𑍍॑𑌶𑌚𑍍𑌚) (𑌅. )
𑌅॒𑌗𑍍𑌨𑌿𑌨𑌾॑ 𑌵𑌿𑌶𑍍𑌵𑌾॒𑌷𑌾𑌟𑍍 𑌸𑍂𑌰𑍍𑌯𑍇॑𑌣 𑌸𑍍𑌵॒𑌰𑌾-𑌟𑍍𑌕𑍍𑌰𑌤𑍍𑌵𑌾॒ 𑌶𑌚𑍀॒𑌪𑌤𑌿॑𑌰𑍍-𑌋𑌷॒𑌭𑍇𑌣॒ 𑌤𑍍𑌵𑌷𑍍𑌟𑌾॑ 𑌯॒𑌜𑍍𑌞𑍇𑌨॑ 𑌮॒𑌘𑌵𑌾॒-𑌨𑍍𑌦𑌕𑍍𑌷𑌿॑𑌣𑌯𑌾 𑌸𑍁𑌵॒𑌰𑍍𑌗𑍋 𑌮॒𑌨𑍍𑌯𑍁𑌨𑌾॑ 𑌵𑍃𑌤𑍍𑌰॒𑌹𑌾 𑌸𑍌𑌹𑌾᳚𑌰𑍍𑌦𑍍𑌯𑍇𑌨 𑌤𑌨𑍂॒𑌧𑌾 𑌅𑌨𑍍𑌨𑍇॑𑌨॒ 𑌗𑌯𑌃॑ 𑌪𑍃𑌥𑌿॒𑌵𑍍𑌯𑌾-𑌽𑌸॑𑌨𑍋 𑌦𑍃॒𑌗𑍍𑌭𑌿𑌰॑𑌨𑍍𑌨𑌾॒𑌦𑍋 𑌵॑𑌷𑌟𑍍𑌕𑌾॒𑌰𑍇𑌣॒𑌰𑍍𑌧-𑌸𑍍𑌸𑌾𑌮𑍍𑌨𑌾॑ 𑌤𑌨𑍂॒𑌪𑌾 𑌵𑌿॒𑌰𑌾𑌜𑌾॒ 𑌜𑍍𑌯𑍋𑌤𑌿॑𑌷𑍍𑌮𑌾॒-𑌨𑍍𑌬𑍍𑌰𑌹𑍍𑌮॑𑌣𑌾 𑌸𑍋𑌮॒𑌪𑌾 𑌗𑍋𑌭𑌿॑𑌰𑍍𑌯॒𑌜𑍍𑌞-𑌨𑍍𑌦𑌾॑𑌧𑌾𑌰 𑌕𑍍𑌷॒𑌤𑍍𑌰𑍇𑌣॑ 𑌮𑌨𑍁॒𑌷𑍍𑌯𑌾॑-𑌨𑌶𑍍𑌵𑍇॑𑌨 𑌚॒ 𑌰𑌥𑍇॑𑌨 𑌚 𑌵॒𑌜𑍍𑌰𑍍𑌯𑍃॑𑌤𑍁𑌭𑌿𑌃॑ 𑌪𑍍𑌰॒𑌭𑍁-𑌸𑍍𑌸𑌂॑𑌵𑌁𑌥𑍍𑌸॒𑌰𑍇𑌣॑ 𑌪𑌰𑌿॒𑌭𑍂 𑌸𑍍𑌤𑌪॒𑌸𑌾-𑌽𑌨𑌾॑𑌧𑍃𑌷𑍍𑌟॒-𑌸𑍍𑌸𑍂𑌰𑍍𑌯॒-𑌸𑍍𑌸-𑌨𑍍𑌤॒𑌨𑍂𑌭𑌿𑌃॑ ॥ 24 ॥
(𑌅॒𑌗𑍍𑌨𑌿 – 𑌰𑍈𑌕𑌾॒𑌨𑍍𑌨 𑌪॑𑌞𑍍𑌚𑌾॒𑌶𑌤𑍍) (𑌅. )
𑌪𑍍𑌰॒𑌜𑌾𑌪॑𑌤𑌿॒𑌰𑍍𑌮𑌨॒𑌸𑌾 𑌽𑌨𑍍𑌧𑍋-𑌽𑌚𑍍𑌛𑍇॑𑌤𑍋 𑌧𑌾॒𑌤𑌾 𑌦𑍀॒𑌕𑍍𑌷𑌾𑌯𑌾𑌗𑍍𑌮𑍍॑ 𑌸𑌵𑌿॒𑌤𑌾 𑌭𑍃॒𑌤𑍍𑌯𑌾-𑌮𑍍𑌪𑍂॒𑌷𑌾 𑌸𑍋॑𑌮॒𑌕𑍍𑌰𑌯॑𑌣𑍍𑌯𑌾𑌂॒-𑌵𑌁𑌰𑍁॑𑌣॒ 𑌉𑌪॑𑌨॒𑌦𑍍𑌧𑍋 𑌽𑌸𑍁॑𑌰𑌃 𑌕𑍍𑌰𑍀॒𑌯𑌮𑌾॑𑌣𑍋 𑌮𑌿॒𑌤𑍍𑌰𑌃 𑌕𑍍𑌰𑍀॒𑌤-𑌶𑍍𑌶𑌿॑𑌪𑌿𑌵𑌿॒𑌷𑍍𑌟 𑌆𑌸𑌾॑𑌦𑌿𑌤𑍋 𑌨॒𑌰𑌨𑍍𑌧𑌿॑𑌷𑌃 𑌪𑍍𑌰𑍋॒𑌹𑍍𑌯𑌮𑌾॒𑌣𑍋 𑌽𑌧𑌿॑𑌪𑌤𑌿॒𑌰𑌾𑌗॑𑌤𑌃 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰𑌣𑍀॒𑌯𑌮𑌾॑𑌨𑍋॒ 𑌽𑌗𑍍𑌨𑌿𑌰𑌾𑌗𑍍𑌨𑍀᳚𑌦𑍍𑌧𑍍𑌰𑍇॒ 𑌬𑍃𑌹॒𑌸𑍍𑌪𑌤𑌿॒𑌰𑌾𑌗𑍍𑌨𑍀᳚𑌦𑍍𑌧𑍍𑌰𑌾-𑌤𑍍𑌪𑍍𑌰𑌣𑍀॒𑌯𑌮𑌾॑𑌨॒ 𑌇𑌨𑍍𑌦𑍍𑌰𑍋॑ 𑌹𑌵𑌿॒𑌰𑍍𑌧𑌾𑌨𑍇 𑌽𑌦𑌿॑𑌤𑌿॒𑌰𑌾𑌸𑌾॑𑌦𑌿𑌤𑍋॒ 𑌵𑌿𑌷𑍍𑌣𑍁॑𑌰𑍁𑌪𑌾𑌵𑌹𑍍𑌰𑌿॒𑌯𑌮𑌾॒𑌣𑍋 𑌽𑌥॒𑌰𑍍𑌵𑍋𑌪𑍋᳚𑌤𑍍𑌤𑍋 𑌯॒𑌮𑍋॑-𑌽𑌭𑌿𑌷𑍁॑𑌤𑍋 𑌽𑌪𑍂𑌤॒𑌪𑌾 𑌆॑𑌧𑍂॒𑌯𑌮𑌾॑𑌨𑍋 𑌵𑌾॒𑌯𑍁𑌃 𑌪𑍂॒𑌯𑌮𑌾॑𑌨𑍋 𑌮𑌿॒𑌤𑍍𑌰𑌃, 𑌕𑍍𑌷𑍀॑𑌰॒𑌶𑍍𑌰𑍀𑌰𑍍𑌮॒𑌨𑍍𑌥𑍀 𑌸॑𑌕𑍍𑌤𑍁॒𑌶𑍍𑌰𑍀𑌰𑍍𑌵𑍈᳚𑌶𑍍𑌵𑌦𑍇॒𑌵 𑌉𑌨𑍍𑌨𑍀॑𑌤𑍋 𑌰𑍁॒𑌦𑍍𑌰 𑌆𑌹𑍁॑𑌤𑍋 𑌵𑌾॒𑌯𑍁𑌰𑌾𑌵𑍃॑𑌤𑍍𑌤𑍋 𑌨𑍃॒𑌚𑌕𑍍𑌷𑌾𑌃॒ 𑌪𑍍𑌰𑌤𑌿॑𑌖𑍍𑌯𑌾𑌤𑍋 𑌭॒𑌕𑍍𑌷 𑌆𑌗॑𑌤𑌃 𑌪𑌿𑌤𑍃॒𑌣𑌾-𑌨𑍍𑌨𑌾॑𑌰𑌾𑌶॒𑌗𑍍𑌮𑍍॒𑌸𑍋 𑌽𑌸𑍁॒𑌰𑌾𑌤𑍍𑌤॒-𑌸𑍍𑌸𑌿𑌨𑍍𑌧𑍁॑𑌰-𑌵𑌭𑍃॒𑌥𑌮॑𑌵𑌪𑍍𑌰॒𑌯𑌨𑍍-𑌥𑍍𑌸॑𑌮𑍁॒𑌦𑍍𑌰𑍋 𑌽𑌵॑𑌗𑌤-𑌸𑍍𑌸𑌲𑌿॒𑌲𑌃 𑌪𑍍𑌰𑌪𑍍𑌲𑍁॑𑌤॒-𑌸𑍍𑌸𑍁𑌵॑𑌰𑍁॒𑌦𑍃𑌚॑-𑌙𑍍𑌗॒𑌤𑌃 ॥ 25 ॥
(𑌰𑍁॒𑌦𑍍𑌰 – 𑌏𑌕॑𑌵𑌿𑌗𑍍𑌮𑍍𑌶𑌤𑌿𑌶𑍍𑌚) (𑌅. )
𑌕𑍃𑌤𑍍𑌤𑌿॑𑌕𑌾॒ 𑌨𑌕𑍍𑌷॑𑌤𑍍𑌰-𑌮॒𑌗𑍍𑌨𑌿𑌰𑍍𑌦𑍇॒𑌵𑌤𑌾॒-𑌽𑌗𑍍𑌨𑍇 𑌰𑍁𑌚॑-𑌸𑍍𑌸𑍍𑌥 𑌪𑍍𑌰॒𑌜𑌾𑌪॑𑌤𑍇𑌰𑍍𑌧𑌾॒𑌤𑍁-𑌸𑍍𑌸𑍋𑌮॑𑌸𑍍𑌯॒𑌰𑍍𑌚𑍇 𑌤𑍍𑌵𑌾॑ 𑌰𑍁॒𑌚𑍇 𑌤𑍍𑌵𑌾᳚ 𑌦𑍍𑌯𑍁॒𑌤𑍇 𑌤𑍍𑌵𑌾॑ 𑌭𑌾॒𑌸𑍇 𑌤𑍍𑌵𑌾॒ 𑌜𑍍𑌯𑍋𑌤𑌿॑𑌷𑍇 𑌤𑍍𑌵𑌾 𑌰𑍋𑌹𑌿॒𑌣𑍀 𑌨𑌕𑍍𑌷॑𑌤𑍍𑌰-𑌮𑍍𑌪𑍍𑌰॒𑌜𑌾𑌪॑𑌤𑌿𑌰𑍍𑌦𑍇॒𑌵𑌤𑌾॑ 𑌮𑍃𑌗𑌶𑍀॒𑌰𑍍॒𑌷॑-𑌨𑍍𑌨𑌕𑍍𑌷॑𑌤𑍍𑌰॒𑌗𑍍𑌮𑍍॒ 𑌸𑍋𑌮𑍋॑ 𑌦𑍇॒𑌵𑌤𑌾॒ 𑌽𑌽𑌰𑍍𑌦𑍍𑌰𑌾 𑌨𑌕𑍍𑌷॑𑌤𑍍𑌰𑌗𑍍𑌮𑍍 𑌰𑍁॒𑌦𑍍𑌰𑍋 𑌦𑍇॒𑌵𑌤𑌾॒ 𑌪𑍁𑌨॑𑌰𑍍𑌵𑌸𑍂॒ 𑌨𑌕𑍍𑌷॑𑌤𑍍𑌰॒𑌮𑌦𑌿॑𑌤𑌿𑌰𑍍𑌦𑍇॒𑌵𑌤𑌾॑- 𑌤𑌿॒𑌷𑍍𑌯𑍋॑ 𑌨𑌕𑍍𑌷॑𑌤𑍍𑌰॒-𑌮𑍍𑌬𑍃𑌹॒𑌸𑍍𑌪𑌤𑌿॑𑌰𑍍𑌦𑍇॒𑌵𑌤𑌾᳚ 𑌽𑌽𑌶𑍍𑌰𑍇॒𑌷𑌾 𑌨𑌕𑍍𑌷॑𑌤𑍍𑌰𑌗𑍍𑌮𑍍 𑌸॒𑌰𑍍𑌪𑌾 𑌦𑍇॒𑌵𑌤𑌾॑ 𑌮॒𑌘𑌾 𑌨𑌕𑍍𑌷॑𑌤𑍍𑌰-𑌮𑍍𑌪𑌿॒𑌤𑌰𑍋॑ 𑌦𑍇॒𑌵𑌤𑌾॒ 𑌫𑌲𑍍𑌗𑍁॑𑌨𑍀॒ 𑌨𑌕𑍍𑌷॑𑌤𑍍𑌰- [𑌨𑌕𑍍𑌷॑𑌤𑍍𑌰𑌮𑍍, 𑌅॒𑌰𑍍𑌯॒𑌮𑌾] 26
-𑌮𑌰𑍍𑌯॒𑌮𑌾 𑌦𑍇॒𑌵𑌤𑌾॒ 𑌫𑌲𑍍𑌗𑍁॑𑌨𑍀॒ 𑌨𑌕𑍍𑌷॑𑌤𑍍𑌰॒-𑌮𑍍𑌭𑌗𑍋॑ 𑌦𑍇॒𑌵𑌤𑌾॒ 𑌹𑌸𑍍𑌤𑍋॒ 𑌨𑌕𑍍𑌷॑𑌤𑍍𑌰𑌗𑍍𑌮𑍍 𑌸𑌵𑌿॒𑌤𑌾 𑌦𑍇॒𑌵𑌤𑌾॑ 𑌚𑌿॒𑌤𑍍𑌰𑌾 𑌨𑌕𑍍𑌷॑𑌤𑍍𑌰॒𑌮𑌿𑌨𑍍𑌦𑍍𑌰𑍋॑ 𑌦𑍇॒𑌵𑌤𑌾᳚ 𑌸𑍍𑌵𑌾॒𑌤𑍀 𑌨𑌕𑍍𑌷॑𑌤𑍍𑌰𑌂-𑌵𑌾𑌁॒𑌯𑍁𑌰𑍍𑌦𑍇॒𑌵𑌤𑌾॒ 𑌵𑌿𑌶𑌾॑𑌖𑍇॒ 𑌨𑌕𑍍𑌷॑𑌤𑍍𑌰𑌮𑌿𑌨𑍍𑌦𑍍𑌰𑌾॒𑌗𑍍𑌨𑍀 𑌦𑍇॒𑌵𑌤𑌾॑ 𑌽𑌨𑍂𑌰𑌾॒𑌧𑌾 𑌨𑌕𑍍𑌷॑𑌤𑍍𑌰-𑌮𑍍𑌮𑌿॒𑌤𑍍𑌰𑍋 𑌦𑍇॒𑌵𑌤𑌾॑ 𑌰𑍋𑌹𑌿॒𑌣𑍀 𑌨𑌕𑍍𑌷॑𑌤𑍍𑌰॒𑌮𑌿𑌨𑍍𑌦𑍍𑌰𑍋॑ 𑌦𑍇॒𑌵𑌤𑌾॑ 𑌵𑌿॒𑌚𑍃𑌤𑍌॒ 𑌨𑌕𑍍𑌷॑𑌤𑍍𑌰-𑌮𑍍𑌪𑌿॒𑌤𑌰𑍋॑ 𑌦𑍇॒𑌵𑌤𑌾॑ 𑌽𑌷𑌾॒𑌢𑌾 𑌨𑌕𑍍𑌷॑𑌤𑍍𑌰॒𑌮𑌾𑌪𑍋॑ 𑌦𑍇॒𑌵𑌤𑌾॑ 𑌽𑌷𑌾॒𑌢𑌾 𑌨𑌕𑍍𑌷॑𑌤𑍍𑌰𑌂॒-𑌵𑌿𑌁𑌶𑍍𑌵𑍇॑ 𑌦𑍇॒𑌵𑌾 𑌦𑍇॒𑌵𑌤𑌾᳚ 𑌶𑍍𑌰𑍋॒𑌣𑌾 𑌨𑌕𑍍𑌷॑𑌤𑍍𑌰𑌂॒-𑌵𑌿𑌁𑌷𑍍𑌣𑍁॑𑌰𑍍𑌦𑍇॒𑌵𑌤𑌾॒ 𑌶𑍍𑌰𑌵𑌿॑𑌷𑍍𑌠𑌾॒ 𑌨𑌕𑍍𑌷॑𑌤𑍍𑌰𑌂॒-𑌵𑌁𑌸॑𑌵𑍋 [𑌨𑌕𑍍𑌷॑𑌤𑍍𑌰𑌂॒-𑌵𑌁𑌸॑𑌵𑌃, 𑌦𑍇॒𑌵𑌤𑌾॑] 2
𑌦𑍇॒𑌵𑌤𑌾॑ 𑌶॒𑌤𑌭𑌿॑𑌷॒-𑌨𑍍𑌨𑌕𑍍𑌷॑𑌤𑍍𑌰॒𑌮𑌿𑌨𑍍𑌦𑍍𑌰𑍋॑ 𑌦𑍇॒𑌵𑌤𑌾᳚ 𑌪𑍍𑌰𑍋𑌷𑍍𑌠𑌪॒𑌦𑌾 𑌨𑌕𑍍𑌷॑𑌤𑍍𑌰𑌮॒𑌜 𑌏𑌕॑𑌪𑌾-𑌦𑍍𑌦𑍇॒𑌵𑌤𑌾᳚ 𑌪𑍍𑌰𑍋𑌷𑍍𑌠𑌪॒𑌦𑌾 𑌨𑌕𑍍𑌷॑𑌤𑍍𑌰॒𑌮𑌹𑌿॑𑌰𑍍𑌬𑍁॒𑌦𑍍𑌧𑍍𑌨𑌿𑌯𑍋॑ 𑌦𑍇॒𑌵𑌤𑌾॑ 𑌰𑍇॒𑌵𑌤𑍀॒ 𑌨𑌕𑍍𑌷॑𑌤𑍍𑌰-𑌮𑍍𑌪𑍂॒𑌷𑌾 𑌦𑍇॒𑌵𑌤𑌾᳚ 𑌽𑌶𑍍𑌵॒𑌯𑍁𑌜𑍌॒ 𑌨𑌕𑍍𑌷॑𑌤𑍍𑌰𑌮॒𑌶𑍍𑌵𑌿𑌨𑍌॑ 𑌦𑍇॒𑌵𑌤𑌾॑ 𑌽𑌪॒𑌭𑌰॑𑌣𑍀॒𑌰𑍍𑌨𑌕𑍍𑌷॑𑌤𑍍𑌰𑌂-𑌯𑌁॒𑌮𑍋 𑌦𑍇॒𑌵𑌤𑌾॑, 𑌪𑍂॒𑌰𑍍𑌣𑌾 𑌪॒𑌶𑍍𑌚𑌾𑌦𑍍𑌯-𑌤𑍍𑌤𑍇॑ 𑌦𑍇॒𑌵𑌾 𑌅𑌦॑𑌧𑍁𑌃 ॥ 2 ॥
(𑌫𑌲𑍍𑌗𑍁॑𑌨𑍀॒ 𑌨𑌕𑍍𑌷॑𑌤𑍍𑌰𑌂॒ – 𑌵𑌁𑌸॑𑌵॒ – 𑌸𑍍𑌤𑍍𑌰𑌯॑𑌸𑍍𑌤𑍍𑌰𑌿𑌗𑍍𑌮𑍍𑌶𑌚𑍍𑌚) (𑌅. 10)
𑌮𑌧𑍁॑𑌶𑍍𑌚॒ 𑌮𑌾𑌧॑𑌵𑌶𑍍𑌚॒ 𑌵𑌾𑌸॑𑌨𑍍𑌤𑌿𑌕𑌾𑌵𑍃॒𑌤𑍂 𑌶𑍁॒𑌕𑍍𑌰𑌶𑍍𑌚॒ 𑌶𑍁𑌚𑌿॑𑌶𑍍𑌚॒ 𑌗𑍍𑌰𑍈𑌷𑍍𑌮𑌾॑𑌵𑍃॒𑌤𑍂 𑌨𑌭॑𑌶𑍍𑌚 𑌨𑌭॒𑌸𑍍𑌯॑𑌶𑍍𑌚॒ 𑌵𑌾𑌰𑍍𑌷𑌿॑𑌕𑌾𑌵𑍃॒𑌤𑍂 𑌇॒𑌷𑌶𑍍𑌚𑍋॒𑌰𑍍𑌜𑌶𑍍𑌚॑ 𑌶𑌾𑌰॒𑌦𑌾𑌵𑍃॒𑌤𑍂 𑌸𑌹॑𑌶𑍍𑌚 𑌸𑌹॒𑌸𑍍𑌯॑𑌶𑍍𑌚॒ 𑌹𑍈𑌮॑𑌨𑍍𑌤𑌿𑌕𑌾𑌵𑍃॒𑌤𑍂 𑌤𑌪॑𑌶𑍍𑌚 𑌤𑌪॒𑌸𑍍𑌯॑𑌶𑍍𑌚 𑌶𑍈𑌶𑌿॒𑌰𑌾𑌵𑍃॒𑌤𑍂 𑌅॒𑌗𑍍𑌨𑍇𑌰॑𑌨𑍍𑌤-𑌶𑍍𑌶𑍍𑌲𑍇॒𑌷𑍋॑-𑌽𑌸𑌿॒ 𑌕𑌲𑍍𑌪𑍇॑𑌤𑌾॒-𑌨𑍍𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌕𑌲𑍍𑌪॑𑌨𑍍𑌤𑌾॒𑌮𑌾𑌪॒ 𑌓𑌷॑𑌧𑍀𑌃॒ 𑌕𑌲𑍍𑌪॑𑌨𑍍𑌤𑌾𑌮॒𑌗𑍍𑌨𑌯𑌃॒ 𑌪𑍃𑌥॒𑌮𑍍𑌮𑌮॒ 𑌜𑍍𑌯𑍈𑌷𑍍𑌠𑍍𑌯॑𑌯॒ 𑌸𑌵𑍍𑌰॑𑌤𑌾॒ [𑌸𑌵𑍍𑌰॑𑌤𑌾𑌃, 𑌯𑍇᳚-𑌽𑌗𑍍𑌨𑌯॒-] 2
𑌯𑍇᳚-𑌽𑌗𑍍𑌨𑌯॒-𑌸𑍍𑌸𑌮॑𑌨𑌸𑍋-𑌽𑌨𑍍𑌤॒𑌰𑌾 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌶𑍈॑𑌶𑌿॒𑌰𑌾𑌵𑍃॒𑌤𑍂 𑌅॒𑌭𑌿 𑌕𑌲𑍍𑌪॑𑌮𑌾𑌨𑌾॒ 𑌇𑌨𑍍𑌦𑍍𑌰॑𑌮𑌿𑌵 𑌦𑍇॒𑌵𑌾 𑌅॒𑌭𑌿 𑌸𑌂𑌵𑌿𑌁॑𑌶𑌨𑍍𑌤𑍁 𑌸𑌂॒𑌯𑌁𑌚𑍍𑌚॒ 𑌪𑍍𑌰𑌚𑍇॑𑌤𑌾𑌶𑍍𑌚𑌾॒𑌗𑍍𑌨𑍇-𑌸𑍍𑌸𑍋𑌮॑𑌸𑍍𑌯॒ 𑌸𑍂𑌰𑍍𑌯॑𑌸𑍍𑌯𑍋॒-𑌗𑍍𑌰𑌾 𑌚॑ 𑌭𑍀॒𑌮𑌾 𑌚॑ 𑌪𑌿𑌤𑍃॒𑌣𑌾𑌂-𑌯𑌁॒𑌮𑌸𑍍𑌯𑍇𑌨𑍍𑌦𑍍𑌰॑𑌸𑍍𑌯 𑌧𑍍𑌰𑍁॒𑌵𑌾 𑌚॑ 𑌪𑍃𑌥𑌿॒𑌵𑍀 𑌚॑ 𑌦𑍇॒𑌵𑌸𑍍𑌯॑ 𑌸𑌵𑌿॒𑌤𑍁𑌰𑍍𑌮॒𑌰𑍁𑌤𑌾𑌂॒-𑌵𑌁𑌰𑍁॑𑌣𑌸𑍍𑌯 𑌧॒𑌰𑍍𑌤𑍍𑌰𑍀 𑌚॒ 𑌧𑌰𑌿॑𑌤𑍍𑌰𑍀 𑌚 𑌮𑌿॒𑌤𑍍𑌰𑌾𑌵𑌰𑍁॑𑌣𑌯𑍋 𑌰𑍍𑌮𑌿॒𑌤𑍍𑌰𑌸𑍍𑌯॑ 𑌧𑌾॒𑌤𑍁𑌃 𑌪𑍍𑌰𑌾𑌚𑍀॑ 𑌚 𑌪𑍍𑌰॒𑌤𑍀𑌚𑍀॑ 𑌚॒ 𑌵𑌸𑍂॑𑌨𑌾𑌗𑍍𑌮𑍍 𑌰𑍁॒𑌦𑍍𑌰𑌾𑌣𑌾॑- [𑌰𑍁॒𑌦𑍍𑌰𑌾𑌣𑌾᳚𑌮𑍍, 𑌆॒𑌦𑌿॒𑌤𑍍𑌯𑌾𑌨𑌾॒-𑌨𑍍𑌤𑍇] 30
-𑌮𑌾𑌦𑌿॒𑌤𑍍𑌯𑌾𑌨𑌾॒-𑌨𑍍𑌤𑍇 𑌤𑍇-𑌽𑌧𑌿॑𑌪𑌤𑌯॒𑌸𑍍𑌤𑍇𑌭𑍍𑌯𑍋॒ 𑌨𑌮॒𑌸𑍍𑌤𑍇 𑌨𑍋॑ 𑌮𑍃𑌡𑌯𑌨𑍍𑌤𑍁॒ 𑌤𑍇 𑌯-𑌨𑍍𑌦𑍍𑌵𑌿॒𑌷𑍍𑌮𑍋 𑌯𑌶𑍍𑌚॑ 𑌨𑍋॒ 𑌦𑍍𑌵𑍇𑌷𑍍𑌟𑌿॒ 𑌤𑌂-𑌵𑍋𑌁॒ 𑌜𑌮𑍍𑌭𑍇॑ 𑌦𑌧𑌾𑌮𑌿 𑌸॒𑌹𑌸𑍍𑌰॑𑌸𑍍𑌯 𑌪𑍍𑌰॒𑌮𑌾 𑌅॑𑌸𑌿 𑌸॒𑌹𑌸𑍍𑌰॑𑌸𑍍𑌯 𑌪𑍍𑌰𑌤𑌿॒𑌮𑌾 𑌅॑𑌸𑌿 𑌸॒𑌹𑌸𑍍𑌰॑𑌸𑍍𑌯 𑌵𑌿॒𑌮𑌾 𑌅॑𑌸𑌿 𑌸॒𑌹𑌸𑍍𑌰॑𑌸𑍍𑌯𑍋॒𑌨𑍍𑌮𑌾 𑌅॑𑌸𑌿 𑌸𑌾𑌹॒𑌸𑍍𑌰𑍋॑-𑌽𑌸𑌿 𑌸॒𑌹𑌸𑍍𑌰𑌾॑𑌯 𑌤𑍍𑌵𑍇॒𑌮𑌾 𑌮𑍇॑ 𑌅𑌗𑍍𑌨॒ 𑌇𑌷𑍍𑌟॑𑌕𑌾 𑌧𑍇॒𑌨𑌵॑-𑌸𑍍𑌸॒𑌨𑍍𑌤𑍍𑌵𑍇𑌕𑌾॑ 𑌚 𑌶॒𑌤-𑌞𑍍𑌚॑ 𑌸॒𑌹𑌸𑍍𑌰॑-𑌞𑍍𑌚𑌾॒𑌯𑍁𑌤॑-𑌞𑍍𑌚 [ ] 31
𑌨𑌿॒𑌯𑍁𑌤॑-𑌞𑍍𑌚 𑌪𑍍𑌰॒𑌯𑍁𑌤॒-𑌞𑍍𑌚𑌾𑌰𑍍𑌬𑍁॑𑌦-𑌞𑍍𑌚॒ 𑌨𑍍𑌯॑𑌰𑍍𑌬𑍁𑌦-𑌞𑍍𑌚 𑌸𑌮𑍁॒𑌦𑍍𑌰𑌶𑍍𑌚॒ 𑌮𑌦𑍍𑌧𑍍𑌯॒-𑌞𑍍𑌚𑌾𑌨𑍍𑌤॑𑌶𑍍𑌚 𑌪𑌰𑌾॒𑌰𑍍𑌧𑌶𑍍𑌚𑍇॒𑌮𑌾 𑌮𑍇॑ 𑌅𑌗𑍍𑌨॒ 𑌇𑌷𑍍𑌟॑𑌕𑌾 𑌧𑍇॒𑌨𑌵॑-𑌸𑍍𑌸𑌨𑍍𑌤𑍁 𑌷॒𑌷𑍍𑌠𑌿-𑌸𑍍𑌸॒𑌹𑌸𑍍𑌰॑𑌮॒𑌯𑍁𑌤॒-𑌮𑌕𑍍𑌷𑍀॑𑌯𑌮𑌾𑌣𑌾 𑌋𑌤॒𑌸𑍍𑌥𑌾 𑌸𑍍𑌥॑𑌰𑍍𑌤𑌾॒𑌵𑍃𑌧𑍋॑ 𑌘𑍃𑌤॒𑌶𑍍𑌚𑍁𑌤𑍋॑ 𑌮𑌧𑍁॒𑌶𑍍𑌚𑍁𑌤॒ 𑌊𑌰𑍍𑌜॑𑌸𑍍𑌵𑌤𑍀-𑌸𑍍𑌸𑍍𑌵𑌧𑌾॒𑌵𑌿𑌨𑍀॒𑌸𑍍𑌤𑌾 𑌮𑍇॑ 𑌅𑌗𑍍𑌨॒ 𑌇𑌷𑍍𑌟॑𑌕𑌾 𑌧𑍇॒𑌨𑌵॑-𑌸𑍍𑌸𑌨𑍍𑌤𑍁 𑌵𑌿॒𑌰𑌾𑌜𑍋॒ 𑌨𑌾𑌮॑ 𑌕𑌾𑌮॒𑌦𑍁𑌘𑌾॑ 𑌅॒𑌮𑍁𑌤𑍍𑌰𑌾॒𑌮𑍁𑌷𑍍𑌮𑌿॑-𑌲𑍍𑌲𑍋𑌁॒𑌕𑍇 ॥ 32 ॥
(𑌸𑌵𑍍𑌰॑𑌤𑌾 – 𑌰𑍁॒𑌦𑍍𑌰𑌾𑌣𑌾॑ – 𑌮॒𑌯𑍁𑌤॑𑌞𑍍𑌚॒ – 𑌪𑌞𑍍𑌚॑𑌚𑌤𑍍𑌵𑌾𑌰𑌿𑌗𑍍𑌮𑍍𑌶𑌚𑍍𑌚) (𑌅. 11)
𑌸॒𑌮𑌿-𑌦𑍍𑌦𑌿॒𑌶𑌾𑌮𑌾॒𑌶𑌯𑌾॑ 𑌨-𑌸𑍍𑌸𑍁𑌵॒𑌰𑍍𑌵𑌿𑌨𑍍𑌮𑌧𑍋॒𑌰𑌤𑍋॒ 𑌮𑌾𑌧॑𑌵𑌃 𑌪𑌾𑌤𑍍𑌵॒𑌸𑍍𑌮𑌾𑌨𑍍 । 𑌅॒𑌗𑍍𑌨𑌿𑌰𑍍𑌦𑍇॒𑌵𑍋 𑌦𑍁॒𑌷𑍍𑌟𑌰𑍀॑𑌤𑍁॒𑌰𑌦𑌾᳚𑌭𑍍𑌯 𑌇॒𑌦-𑌙𑍍𑌕𑍍𑌷॒𑌤𑍍𑌰𑌗𑍍𑌮𑍍 𑌰॑𑌕𑍍𑌷𑌤𑍁॒ 𑌪𑌾𑌤𑍍𑌵॒𑌸𑍍𑌮𑌾𑌨𑍍 ॥ 𑌰॒𑌥॒𑌨𑍍𑌤॒𑌰𑌗𑍍𑌮𑍍 𑌸𑌾𑌮॑𑌭𑌿𑌃 𑌪𑌾𑌤𑍍𑌵॒𑌸𑍍𑌮𑌾-𑌨𑍍𑌗𑌾॑𑌯॒𑌤𑍍𑌰𑍀 𑌛𑌨𑍍𑌦॑𑌸𑌾𑌂-𑌵𑌿𑌁॒𑌶𑍍𑌵𑌰𑍂॑𑌪𑌾 । 𑌤𑍍𑌰𑌿॒𑌵𑍃𑌨𑍍𑌨𑍋॑ 𑌵𑌿॒𑌷𑍍𑌠𑌯𑌾॒ 𑌸𑍍𑌤𑍋𑌮𑍋॒ 𑌅𑌹𑍍𑌨𑌾𑌗𑍍𑌮𑍍॑ 𑌸𑌮𑍁॒𑌦𑍍𑌰𑍋 𑌵𑌾𑌤॑ 𑌇॒𑌦𑌮𑍋𑌜𑌃॑ 𑌪𑌿𑌪𑌰𑍍𑌤𑍁 ॥ 𑌉॒𑌗𑍍𑌰𑌾 𑌦𑌿॒𑌶𑌾𑌮॒𑌭𑌿-𑌭𑍂॑𑌤𑌿𑌰𑍍𑌵𑌯𑍋॒𑌧𑌾-𑌶𑍍𑌶𑍁𑌚𑌿॑-𑌶𑍍𑌶𑍁॒𑌕𑍍𑌰𑍇 𑌅𑌹॑𑌨𑍍𑌯𑍋𑌜॒𑌸𑍀𑌨𑌾᳚ । 𑌇𑌨𑍍𑌦𑍍𑌰𑌾𑌧𑌿॑𑌪𑌤𑌿𑌃 𑌪𑌿𑌪𑍃𑌤𑌾॒𑌦𑌤𑍋॑ 𑌨𑍋॒ 𑌮𑌹𑌿॑ [ ] 33
𑌕𑍍𑌷॒𑌤𑍍𑌰𑌂-𑌵𑌿𑌁॒𑌶𑍍𑌵𑌤𑍋॑ 𑌧𑌾𑌰𑌯𑍇॒𑌦𑌮𑍍 ॥ 𑌬𑍃॒𑌹-𑌥𑍍𑌸𑌾𑌮॑ 𑌕𑍍𑌷𑌤𑍍𑌰॒𑌭𑍃-𑌦𑍍𑌵𑍃॒𑌦𑍍𑌧 𑌵𑍃॑𑌷𑍍𑌣𑌿𑌯-𑌨𑍍𑌤𑍍𑌰𑌿॒𑌷𑍍𑌟𑍁𑌭𑍌𑌜॑-𑌶𑍍𑌶𑍁𑌭𑌿॒𑌤 𑌮𑍁॒𑌗𑍍𑌰𑌵𑍀॑𑌰𑌮𑍍 । 𑌇𑌨𑍍𑌦𑍍𑌰॒ 𑌸𑍍𑌤𑍋𑌮𑍇॑𑌨 𑌪𑌞𑍍𑌚𑌦॒𑌶𑍇𑌨॒ 𑌮𑌦𑍍𑌧𑍍𑌯॑𑌮𑌿॒𑌦𑌂-𑌵𑌾𑌁𑌤𑍇॑𑌨॒ 𑌸𑌗॑𑌰𑍇𑌣 𑌰𑌕𑍍𑌷 ॥ 𑌪𑍍𑌰𑌾𑌚𑍀॑ 𑌦𑌿॒𑌶𑌾𑌗𑍍𑌮𑍍 𑌸॒𑌹𑌯॑𑌶𑌾॒ 𑌯𑌶॑𑌸𑍍𑌵𑌤𑍀॒ 𑌵𑌿𑌶𑍍𑌵𑍇॑ 𑌦𑍇𑌵𑌾𑌃 𑌪𑍍𑌰𑌾॒𑌵𑍃𑌷𑌾 𑌽𑌹𑍍𑌨𑌾॒𑌗𑍍𑌮𑍍॒ 𑌸𑍁𑌵॑𑌰𑍍𑌵𑌤𑍀 । 𑌇॒𑌦-𑌙𑍍𑌕𑍍𑌷॒𑌤𑍍𑌰-𑌨𑍍𑌦𑍁॒𑌷𑍍𑌟𑌰॑𑌮॒𑌸𑍍𑌤𑍍𑌵𑍋𑌜𑍋 𑌽𑌨𑌾॑𑌧𑍃𑌷𑍍𑌟𑌗𑍍𑌮𑍍 𑌸𑌹॒𑌸𑍍𑌰𑌿𑌯॒𑌗𑍍𑌮𑍍॒ 𑌸𑌹॑𑌸𑍍𑌵𑌤𑍍 ॥ 𑌵𑍈॒𑌰𑍂॒𑌪𑍇 𑌸𑌾𑌮॑𑌨𑍍𑌨𑌿॒𑌹 𑌤𑌚𑍍𑌛॑𑌕𑍇𑌮॒ 𑌜𑌗॑𑌤𑍍𑌯𑍈𑌨𑌂-𑌵𑌿𑌁॒𑌕𑍍𑌷𑍍𑌵𑌾 𑌵𑍇॑𑌶𑌯𑌾𑌮𑌃 । 𑌵𑌿𑌶𑍍𑌵𑍇॑ 𑌦𑍇𑌵𑌾-𑌸𑍍𑌸𑌪𑍍𑌤𑌦॒𑌶𑍇𑌨॒ [𑌸𑌪𑍍𑌤𑌦॒𑌶𑍇𑌨॑, 𑌵𑌰𑍍𑌚॑ 𑌇॒𑌦-𑌙𑍍𑌕𑍍𑌷॒𑌤𑍍𑌰𑌗𑍍𑌮𑍍] 34
𑌵𑌰𑍍𑌚॑ 𑌇॒𑌦-𑌙𑍍𑌕𑍍𑌷॒𑌤𑍍𑌰𑌗𑍍𑌮𑍍 𑌸॑𑌲𑌿॒𑌲𑌵𑌾॑𑌤𑌮𑍁॒𑌗𑍍𑌰𑌮𑍍 ॥ 𑌧॒𑌰𑍍𑌤𑍍𑌰𑍀 𑌦𑌿॒𑌶𑌾-𑌙𑍍𑌕𑍍𑌷॒𑌤𑍍𑌰𑌮𑌿॒𑌦-𑌨𑍍𑌦𑌾॑𑌧𑌾𑌰𑍋𑌪॒𑌸𑍍𑌥𑌾-𑌽𑌽𑌶𑌾॑𑌨𑌾-𑌮𑍍𑌮𑌿॒𑌤𑍍𑌰𑌵॑𑌦॒𑌸𑍍𑌤𑍍𑌵𑍋𑌜𑌃॑ । 𑌮𑌿𑌤𑍍𑌰𑌾॑𑌵𑌰𑍁𑌣𑌾 𑌶॒𑌰𑌦𑌾-𑌽𑌹𑍍𑌨𑌾᳚-𑌞𑍍𑌚𑌿𑌕𑌿𑌤𑍍𑌨𑍂 𑌅॒𑌸𑍍𑌮𑍈 𑌰𑌾॒𑌷𑍍𑌟𑍍𑌰𑌾𑌯॒ 𑌮𑌹𑌿॒ 𑌶𑌰𑍍𑌮॑ 𑌯𑌚𑍍𑌛𑌤𑌮𑍍 ॥ 𑌵𑍈॒𑌰𑌾॒𑌜𑍇 𑌸𑌾𑌮॒𑌨𑍍𑌨𑌧𑌿॑ 𑌮𑍇 𑌮𑌨𑍀॒𑌷𑌾-𑌽𑌨𑍁॒𑌷𑍍𑌟𑍁𑌭𑌾॒ 𑌸𑌮𑍍𑌭𑍃॑𑌤𑌂-𑌵𑍀𑌁॒𑌰𑍍𑌯𑌗𑍍𑌮𑍍॑ 𑌸𑌹𑌃॑ । 𑌇॒𑌦-𑌙𑍍𑌕𑍍𑌷॒𑌤𑍍𑌰-𑌮𑍍𑌮𑌿॒𑌤𑍍𑌰𑌵॑𑌦𑌾॒𑌰𑍍𑌦𑍍𑌰𑌦𑌾॑𑌨𑍁॒ 𑌮𑌿𑌤𑍍𑌰𑌾॑𑌵𑌰𑍁𑌣𑌾॒ 𑌰𑌕𑍍𑌷॑𑌤॒-𑌮𑌾𑌧𑌿॑𑌪𑌤𑍍𑌯𑍈𑌃 ॥ 𑌸॒𑌮𑍍𑌰𑌾-𑌡𑍍𑌦𑌿॒𑌶𑌾𑌗𑍍𑌮𑍍 𑌸॒𑌹𑌸𑌾᳚𑌮𑍍𑌨𑍀॒ 𑌸𑌹॑𑌸𑍍𑌵𑌤𑍍𑌯𑍃॒𑌤𑍁𑌰𑍍𑌹𑍇॑𑌮॒𑌨𑍍𑌤𑍋 𑌵𑌿॒𑌷𑍍𑌠𑌯𑌾॑ 𑌨𑌃 𑌪𑌿𑌪𑌰𑍍𑌤𑍁 । 𑌅॒𑌵॒𑌸𑍍𑌯𑍁𑌵𑌾॑𑌤𑌾 [𑌅॒𑌵॒𑌸𑍍𑌯𑍁𑌵𑌾॑𑌤𑌾𑌃, 𑌬𑍃॒𑌹॒𑌤𑍀𑌰𑍍𑌨𑍁] 35
𑌬𑍃𑌹॒𑌤𑍀𑌰𑍍𑌨𑍁 𑌶𑌕𑍍𑌵॑𑌰𑍀𑌰𑌿॒𑌮𑌂-𑌯𑌁॒𑌜𑍍𑌞𑌮॑𑌵𑌨𑍍𑌤𑍁 𑌨𑍋 𑌘𑍃॒𑌤𑌾𑌚𑍀𑌃᳚ ॥ 𑌸𑍁𑌵॑𑌰𑍍𑌵𑌤𑍀 𑌸𑍁॒𑌦𑍁𑌘𑌾॑ 𑌨𑌃॒ 𑌪𑌯॑𑌸𑍍𑌵𑌤𑍀 𑌦𑌿॒𑌶𑌾-𑌨𑍍𑌦𑍇॒𑌵𑍍𑌯॑𑌵𑌤𑍁 𑌨𑍋 𑌘𑍃॒𑌤𑌾𑌚𑍀᳚ । 𑌤𑍍𑌵-𑌙𑍍𑌗𑍋॒𑌪𑌾𑌃 𑌪𑍁॑𑌰𑌏॒𑌤𑍋𑌤 𑌪॒𑌶𑍍𑌚𑌾-𑌦𑍍𑌬𑍃𑌹॑𑌸𑍍𑌪𑌤𑍇॒ 𑌯𑌾𑌮𑍍𑌯𑌾𑌂᳚-𑌯𑍁𑌁𑌙𑍍𑌗𑍍𑌧𑌿॒ 𑌵𑌾𑌚᳚𑌮𑍍 ॥ 𑌊॒𑌰𑍍𑌧𑍍𑌵𑌾 𑌦𑌿॒𑌶𑌾𑌗𑍍𑌮𑍍 𑌰𑌨𑍍𑌤𑌿॒𑌰𑌾𑌶𑍌𑌷॑𑌧𑍀𑌨𑌾𑌗𑍍𑌮𑍍 𑌸𑌂𑌵𑌁𑌥𑍍𑌸॒𑌰𑍇𑌣॑ 𑌸𑌵𑌿॒𑌤𑌾 𑌨𑍋॒ 𑌅𑌹𑍍𑌨𑌾᳚𑌮𑍍 । 𑌰𑍇॒𑌵-𑌥𑍍𑌸𑌾𑌮𑌾𑌤𑌿॑𑌚𑍍𑌛𑌨𑍍𑌦𑌾 𑌉॒ 𑌛𑌨𑍍𑌦𑍋-𑌽𑌜𑌾॑𑌤 𑌶𑌤𑍍𑌰𑍁-𑌸𑍍𑌸𑍍𑌯𑍋॒𑌨𑌾 𑌨𑍋॑ 𑌅𑌸𑍍𑌤𑍁 ॥ 𑌸𑍍𑌤𑍋𑌮॑𑌤𑍍𑌰𑌯𑌸𑍍𑌤𑍍𑌰𑌿𑌗𑍍𑌮𑍍𑌶𑍇॒ 𑌭𑍁𑌵॑𑌨𑌸𑍍𑌯 𑌪𑌤𑍍𑌨𑌿॒ 𑌵𑌿𑌵॑𑌸𑍍𑌵𑌦𑍍𑌵𑌾𑌤𑍇 𑌅॒𑌭𑌿 𑌨𑍋॑ [𑌅॒𑌭𑌿 𑌨𑌃॑, 𑌗𑍃॒𑌣𑌾॒𑌹𑌿॒ ।] 36
𑌗𑍃𑌣𑌾𑌹𑌿 । 𑌘𑍃॒𑌤𑌵॑𑌤𑍀 𑌸𑌵𑌿𑌤॒𑌰𑌾𑌧𑌿॑𑌪𑌤𑍍𑌯𑍈𑌃॒ 𑌪𑌯॑𑌸𑍍𑌵𑌤𑍀॒ 𑌰𑌨𑍍𑌤𑌿॒𑌰𑌾𑌶𑌾॑ 𑌨𑍋 𑌅𑌸𑍍𑌤𑍁 ॥ 𑌧𑍍𑌰𑍁॒𑌵𑌾 𑌦𑌿॒𑌶𑌾𑌂-𑌵𑌿𑌁𑌷𑍍𑌣𑍁॑𑌪॒𑌤𑍍𑌨𑍍𑌯𑌘𑍋॑𑌰𑌾॒-𑌽𑌸𑍍𑌯𑍇𑌶𑌾॑𑌨𑌾॒ 𑌸𑌹॑𑌸𑍋॒ 𑌯𑌾 𑌮॒𑌨𑍋𑌤𑌾᳚ । 𑌬𑍃𑌹॒𑌸𑍍𑌪𑌤𑌿॑ 𑌰𑍍𑌮𑌾𑌤॒𑌰𑌿𑌶𑍍𑌵𑍋॒𑌤 𑌵𑌾॒𑌯𑍁-𑌸𑍍𑌸॑𑌨𑍍𑌧𑍁𑌵𑌾॒𑌨𑌾 𑌵𑌾𑌤𑌾॑ 𑌅॒𑌭𑌿 𑌨𑍋॑ 𑌗𑍃𑌣𑌨𑍍𑌤𑍁 ॥ 𑌵𑌿॒𑌷𑍍𑌟॒𑌭𑍋-𑌨𑍍𑌦𑌿॒𑌵𑍋 𑌧॒𑌰𑍁𑌣𑌃॑ 𑌪𑍃𑌥𑌿॒𑌵𑍍𑌯𑌾 𑌅॒𑌸𑍍𑌯𑍇𑌶𑌾॑𑌨𑌾॒ 𑌜𑌗॑𑌤𑍋॒ 𑌵𑌿𑌷𑍍𑌣𑍁॑𑌪𑌤𑍍𑌨𑍀 । 𑌵𑌿॒𑌶𑍍𑌵𑌵𑍍𑌯॑𑌚𑌾 𑌇॒𑌷𑌯॑𑌨𑍍𑌤𑍀॒ 𑌸𑍁𑌭𑍂॑𑌤𑌿-𑌶𑍍𑌶𑌿॒𑌵𑌾 𑌨𑍋॑ 𑌅॒𑌸𑍍𑌤𑍍𑌵𑌦𑌿॑𑌤𑌿𑌰𑍁॒𑌪𑌸𑍍𑌥𑍇᳚ ॥ 𑌵𑍈॒𑌶𑍍𑌵𑌾॒𑌨॒𑌰𑍋 𑌨॑ 𑌊॒𑌤𑍍𑌯𑌾𑌪𑍃॒𑌷𑍍𑌟𑍋 𑌦𑌿॒𑌵𑍍𑌯𑌨𑍁॑ 𑌨𑍋॒ 𑌽𑌦𑍍𑌯𑌾𑌨𑍁॑𑌮𑌤𑌿॒𑌰𑌨𑍍𑌵𑌿𑌦॑𑌨𑍁𑌮𑌤𑍇॒ 𑌤𑍍𑌵-𑌙𑍍𑌕𑌯𑌾॑ 𑌨𑌶𑍍𑌚𑌿॒𑌤𑍍𑌰 𑌆𑌭𑍁॑𑌵॒𑌤𑍍𑌕𑍋 𑌅॒𑌦𑍍𑌯 𑌯𑍁॑𑌙𑍍𑌕𑍍𑌤𑍇 ॥ 3 ॥
(𑌮𑌹𑌿॑ – 𑌸𑌪𑍍𑌤𑌦॒𑌶𑍇𑌨𑌾॑ – 𑌽𑌵॒𑌸𑍍𑌯𑍁𑌵𑌾॑𑌤𑌾 – 𑌅॒𑌭𑌿 𑌨𑍋 – 𑌽𑌨𑍁॑ 𑌨॒ – 𑌶𑍍𑌚𑌤𑍁॑𑌰𑍍𑌦𑌶 𑌚) (𑌅. 12)
(𑌰॒𑌶𑍍𑌮𑌿𑌰॑𑌸𑌿॒ – 𑌰𑌾𑌜𑍍𑌞𑍍𑌯॑𑌸𑍍𑌯॒ – 𑌯-𑌮𑍍𑌪𑍁॒𑌰𑍋 𑌹𑌰𑌿॑𑌕𑍇𑌶𑍋॒ – 𑌽𑌗𑍍𑌨𑌿𑌰𑍍𑌮𑍂॒𑌰𑍍𑌧 – 𑌨𑍍𑌦𑍍𑌰𑌾॒𑌗𑍍𑌨𑌿𑌭𑍍𑌯𑌾𑌂॒ – 𑌬𑍃𑌹॒𑌸𑍍𑌪𑌤𑌿॑ – 𑌰𑍍𑌭𑍂𑌯॒𑌸𑍍𑌕𑍃𑌦॑ – 𑌸𑍍𑌯॒𑌗𑍍𑌨𑌿𑌨𑌾॑ 𑌵𑌿𑌶𑍍𑌵𑌾॒𑌷𑌾𑌟𑍍 – 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌮𑌨॑𑌸𑌾॒ – 𑌕𑍃𑌤𑍍𑌤𑌿॑𑌕𑌾॒ – 𑌮𑌧𑍁॑𑌶𑍍𑌚 – 𑌸॒𑌮𑌿𑌦𑍍𑌦𑌿॒𑌶𑌾𑌂 – 𑌦𑍍𑌵𑌾𑌦॑𑌶 )
(𑌰॒𑌶𑍍𑌮𑌿𑌰॑𑌸𑌿॒ – 𑌪𑍍𑌰𑌤𑌿॑ 𑌧𑍇॒𑌨𑍁- 𑌮॑𑌸𑌿 𑌸𑍍𑌤𑌨𑌯𑌿𑌤𑍍𑌨𑍁॒𑌸𑌨𑌿॑𑌰 – 𑌸𑍍𑌯𑌾𑌦𑌿॒𑌤𑍍𑌯𑌾𑌨𑌾𑌗𑍍𑌮𑍍॑ – 𑌸॒𑌪𑍍𑌤𑌤𑍍𑌰𑌿𑌗𑍍𑌮𑍍॑𑌶𑌤𑍍 )
(𑌰॒𑌶𑍍𑌮𑌿𑌰॑𑌸𑌿॒, 𑌕𑍋 𑌅॒𑌦𑍍𑌯 𑌯𑍁॑𑌙𑍍𑌕𑍍𑌤𑍇)
॥ 𑌹𑌰𑌿𑌃॑ 𑌓𑌮𑍍 ॥
॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌸𑌂𑌹𑌿𑌤𑌾𑌯𑌾-𑌞𑍍𑌚𑌤𑍁𑌰𑍍𑌥 𑌕𑌾𑌣𑍍𑌡𑍇 𑌚𑌤𑍁𑌰𑍍𑌥𑌃 𑌪𑍍𑌰𑌶𑍍𑌨-𑌸𑍍𑌸𑌮𑌾𑌪𑍍𑌤𑌃 ॥
